Baghlayani Bible
यहोशू 10
इस्राएली लोका रा एमोरी लोका खे अराणा
जेबे यरूशलेम शईरो रे राजे अदोनीसेदेके1 सुणेया कि यहोशूए आई शईरो खे लई ला ओर से नाश करी ता ओर जेड़ा तिने यरीहो शईर ओर तेथो रे राजेया साथे कित्तेया, तेड़ा ई आई शईर ओर तेथो रे राजे साथे बी कित्तेया ओर ये बी सुणेया कि गिबोन शईरो रे रणे वाल़ेया तिना साथे मेल कित्तेया ओर तिना साथे रणे लगी रे, तेबे राजा ओर तेसरे लोक बऊत डरी गे, कऊँकि गिबोन एक बड़ा शईर, बल्कि राज शईरो जेड़ा था ओर आई शईरो ते बी बड़ा था ओर तेथो रे रणे वाल़े मर्द शूरवीर थे। इजी री खातर यरूशलेम शईरो रे राजे अदोनीसेदेके हेब्रोन शईरो रे राजा होहाम, यर्मूत शईरो रे राजा पिराम, लाकीश शईरो रे राजा यापी ओर एग्लोन शईरो रे राजा दबीरो गे ये सन्देसा पेजेया, “मांगे आई की मेरी मताद करो ओर चलो आसे गिबोन शईरो दे रणे वाल़ेया खे काई देऊँए, कऊँकि तिने यहोशू ओर इस्राएली लोका साथे मेल करी ला रा।” तेबे यरूशलेम, हेब्रोन, यर्मूत, लाकीश ओर एग्लोन शईरो रे पाँजो राजे आपणी-आपणी सेना कट्ठी करी की अमला करने खे गये ओर तिने गिबोनो सामणे डेरे लगाई की तिना साथे लड़ाई करने खे त्यार ऊए।
तेबे गिबोनो रे रणे वाल़ेया गिलगाल जगा दे डेरे दे यहोशूए खे ये सन्देसा पेजेया कि आपणे दासा खे छाडी नि देणा, फटाफट आसा गे आई की आसा खे बचाई लो ओर म्हारी मताद कर, कऊँकि पाह्ड़ी जगा दे रणे वाल़े एमोरिया रे सब राजा म्हारे खलाफ कट्ठे ऊई रे। तेबे यहोशू सारे योद्धा ओर शूरवीरा खे साथे लई की गिलगालो ते चली पड़ेया। ओर यहोवे यहोशूए खे बोलेया, “तिना ते नि डर, कऊँकि मां सेयो तेरे कब्जे दे करी देणे, तिना बीचा ते एक बी सिपाई ताखे अराई नि सकणा।” तेबे यहोशू आपणी सेना साथे पूरी रात गिलगालो ते चलदा रया ओर जाई की एकदम एमोरिया पाँदे अमला करिता। तेबे यहोवे एड़ा कित्तेया कि सेयो इस्राएली सेना खे देखी की कबराई गे ओर इस्राएलिये गिबोनो गे तिना रा बड़ा नाश कित्तेया, तेबे बेथोरोन शईरो री चढ़ाईया पाँदे तिना रा पीछा करदे ऊए अजेका ओर मक्केदा शईरो तक तिना खे काँदे गये। जेबे एमोरी सिपाई इस्राएली लोका रे सामणे ते नठी की बेथोरोनो री उतराईया दे आए, तेबे अजेका पऊँचणे तक यहोवे सर्गो ते तिना पाँदे बड़े-बड़े पात्थरा जेड़े ओल़े बरसाए ओर सेयो मरी गे, जो ओल़ेया ते मरे थे तिना री गिणती इस्राएली सैनिका री तलवारी साथे मरने वाल़ेया ते जादा थी।
तेस बखते, मतलब जेस दिने परमेशरे एमोरी लोक इस्राएली लोका रे वशो रे करीते, तेस दिने यहोशूए यहोवे ते इस्राएली लोका सामणे ये प्रार्थना की ओर बोलेया, “ओ सूरज, तूँ गिबोनो पाँदे ओर चाँद, तूँ अय्यालोनो रिया तराईया पाँदे रूकेया रा रओ।” ओर सूरज तेस बखतो तक रूकेया दा रया ओर चाँद तेस बखतो तक ठईरेया दा रया, जदुओ तक इस्राएलो रे लोके आपणे दुश्मणा ते पूरी तरआ ते बदला नि लई ला। ये गल्ल याशार नाओं कताबा दे लिखी राखी ए कि सूरज सर्गो दे बीचे रूकेया रा रया ओर सारा दिन रूकेया दा रया। ना तो तिजी ते पईले एड़ा कोई दिन ऊआ ओर ना तेसते बाद, जिदे यहोवे केसी माणूंए री प्रार्थना सुणी की एड़ा नऊखा काम कित्तेया ओ, पक्का यहोवा तो इस्राएलो रिया तरफा ते लड़ो था। तेबे यहोशू सारी इस्राएली सेना समेत गिलगालो दे आपणे डेरे दे वापस ऊई गा।
एमोरिया रे पाँजो राजेया खे काणा
सेयो पाँजो एमोरी राजा नठी की मक्केदा शईरो रे नेड़े री डवारा दे लूकी गे। तेबे यहोशूए खे किने ये सन्देश दितेया, “कि पाँजो राजा मक्केदा रे नेड़े री गुफा दे लूके दे ए।” यहोशूए बोलेया, “गुफा रे मुरे दे बड़े-बड़े पात्थर तकेली की तिना री पईरेदारी करने खे सिपाईया खे तेती ठराई देयो। पर तुसे सबी तेती नि रूकणा, आपणे दुश्मणा रा पीछा करी की तिना बीचा ते जो-जो पिछड़ी गे रे तिना खे काओ, तिना खे आपणे-आपणे शईरो दे जाणे रा मोका नि देयो, कऊँकि तुसा रे यहोवा परमेशरे सेयो तुसा रे वशो दे करीते रे।” जेबे यहोशू ओर इस्राएली सिपाई तिना खे काई की तिना खे पूरा नाश करी चुके पर तिना बीचा ते जो बची गे सेयो आपणे-आपणे गढ़वाल़े शईरो दे कूसी गे, लड़ाईया ते बाद सारे सैनिक मक्केदा रे डेरे दे यहोशूए गे ठीक-ठाक वापस आईगे ओर तेते प्रदेशो दे केसी दे बी इतणी ईम्मत नि थी कि सेयो इस्राएली लोका रे खलाफ कुछ बोली बी सको।
तेबे यहोशूए आपणेया सिपाईया खे आज्ञा दित्ती, “गुफा रे पात्थर टाई की तिना पाँजो राजेया खे मांगे निकयाल़ी की ली आओ।” तिने एड़ा ई कित्तेया ओर यरूशलेम, हेब्रोन, यर्मूत, लाकीश ओर एग्लोन शईरो रे सेयो पाँजो राजे गुफा ते निकाल़ी की तेसगे ली आए। जेबे सेयो तिना राजेया खे यहोशूए गे ली आए, तेबे यहोशूए सेयो पाँजो राजा थाले लटयाल़ी की इस्राएलो रे सारे सैनिका खे बुलाई की आपू साथे लड़ाई करने वाल़े परदाना खे बोलेया, “नेड़े जाई की आपणे-आपणे पैर इना राजेया री क्याड़िया पाँदे राखो।” ओर तिने नेड़े जाई की आपणे-आपणे पैर तिना री क्याड़िया पाँदे राखी ते। तेबे यहोशूए आपणी सेना रे परदाना खे बोलेया, “डरो नि ओर ना ई कबराओ, याओ बानी की मजबूत रओ, कऊँकि यहोवा तुसा रे सबी दुश्मणा साथे एड़ा ई करना जिना साथे तुसे लड़ने वाल़े ए।” इजी ते बाद यहोशूए सेयो मरवाईते ओर पाँजो डाल़ा दे लटकाईते। ओर सेयो साँजा तक तिना डाल़ा दे लटके रे रये। सूरज डूबदे-डूबदे यहोशूए आज्ञा दित्ती ओर लोके सेयो डाल़ा ते उतारी की तेते गुफा दे जेते दे सेयो लूकी रे थे तिदे पाई ते ओर तेते गुफा दे बड़े-बड़े पात्थर राखी ते, सेयो आजो तक तेथी राखे रे ए।2 तेस ई दिने यहोशूए मक्केदा शईर ओर तेथो रे राजे पाँदे अमला कित्तेया ओर से तलवारे की नाश करिता। ओर तिने तेते शईरो दे सब काईते ओर जितणे माणूं तिदे थे तिना बीचा ते कोई बी जिऊँदा नि छाडेया ओर जेड़ा तिने यरीहो रे राजे साथे कित्तेया था तेड़ा ई मक्केदा रे राजे साथे बी कित्तेया।
यहोशूए रा दक्खण शईरा पाँदे अमला
इजी ते बाद यहोशू आपणी सारी इस्राएली सेना खे लई की मक्केदा शईरो ते चली की लिब्ना शईरो खे गया ओर तिना साथे लड़े; ओर यहोवे लिब्ना रे राजा ओर तेथो रे लोक इस्राएली लोका रे कब्जे दे करीते ओर यहोशूए तेस शईरो रे सारे लोक तलवारी साथे काईते ओर तिना बीचा ते कोई बी जिऊँदा नि छाडेया ओर तेथो रे राजे साथे तेड़ा ई कित्तेया जेड़ा तिने यरीहो रे राजे साथे कित्तेया था।
इजी ते बाद यहोशू सबी इस्राएली सैनिका समेत लिब्ना शईरो ते चली की लाकीश शईरो खे गया ओर तेसरे खलाफ केरे पाई की लड़ाई शुरू कित्ती। ओर पईले दिने परमेशरे लाकीश शईरो रे लोक इस्राएली सेना रे कब्जे दे करीते ओर दूजे दिने तिने से जीती ला ओर जेड़ा तिने लिब्ना रे सारे प्राणी तलवारी साथे काये थे, तेड़ा ई तिने लाकीशो साथे बी कित्तेया। तेबे गेजेर शईरो रा राजा होराम लाकीशो री मताद करने खे आपणी सेना लई की आया ओर यहोशूए सेना समेत से बी एड़ा काया कि तेसरे केसी बी माणूंए खे जिऊँदा नि छाडेया।
तेबे यहोशू सबी इस्राएली सेना समेत लाकीशो ते चली की एग्लोन शईरो खे गया ओर से चऊँ कनारा ते केरेया ओर युद्ध करने लगेया। ओर तेस ई दिने तिने शईरो पाँदे कब्जा करी ला ओर शईरो रे सब लोक तलवारे की काईते ओर जेड़े तिने लाकीशो रे सारे प्राणी नाश कित्ते थे तेड़ा ई तिने एग्लोनो साथे बी कित्तेया।
तेबे यहोशू सबी इस्राएली सेना समेत एग्लोन शईरो ते चली की हेब्रोन शईरो खे गया ओर तेथो रे लोका साथे लड़ने लगेया। यहोशू ओर इस्राएली सेने से शईर लई ला, ओर तिने तेथो रा राजा ओर सारे लोक तलवारे की काईते, जेड़ा यहोशूए एग्लोनो साथे कित्तेया था तेड़ा ई हेब्रोनो दे बी कोई जिऊँदा नि छाडेया, तिने से ओर तेथो रे सारे प्राणी नाश करीते।
तेबे यहोशू सबी इस्राएली सेना समेत कूमी की दबीर शईरो खे गया ओर तेस साथे लड़ने लगेया ओर तिने तेथो रे राजा समेत शईर ओर सारे गाँवो लई ले ओर जितणे प्राणी तिदे थे सेयो सारे तलवारे की नाश करीते, कोई बी जिऊँदा नि छाडेया। जेड़ा यहोशूए हेब्रोन ओर लिब्ना ओर तिना रे राजेया साथे कित्तेया था, तेड़ा ई तिने दबीर ओर तेथो रे राजे साथे बी कित्तेया।
ईंयाँ यहोशूए से सारा देश आपणे कब्जे दे लई ला, मतलब पाह्ड़ी इलाका, दक्खणा दे रेगिस्तान, ओर मैदानी इलाके री सारी जगा, ओर खारे समुद्रो वाल़ी जगा, तिना रे सब राजेया समेत काये ओर इस्राएलो रे प्रभु परमेशरो री आज्ञा रे मुताबिक कोई बी जिऊँदा नि छाडेया, बल्कि जितणे प्राणी थे सब नाश करीते। तेबे यहोशूए कादेशबर्ने शईरो ते लई की गाजा शईरो तक ओर गिबोन शईरो तक रे सारे गोशेन शईर जीती ले। इना सबी शईरा रे राजे तिना रे शईरा समेत यहोशूए एक ई बखतो रे लड़ी की जीती ले, कऊँकि इस्राएलो रा यहोवा परमेशर तिना रिया तरफा ते लड़ो था। तेबे यहोशू सबी इस्राएली सेना समेत गिलगालो दे आपणे डेरे दे वापस आया।
Source notes (2)
- Footnote अदोनीसेदेके मतलब तार्मिकता रा प्रभु
- Footnote सेयो आजो तक तेथी राखे रे ए। यहोशूए री कताब लिखणे वाल़े रे जिऊँदे रणे तक
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.