Baghlayani Bible
यशायाह 9
शान्तिया रे राजकुमारो रा जन्म
तेबे बी मुसीबता ते फरेया रा न्हेरा जांदा रणा। पईले तो तिने जबूलून ओर नप्तालिया रे देशो री बेज्जती कित्ती, पर अन्तो रे दिना दे भूमध्य समुद्रो रिया तरफा खे यरदन नदिया ते पारली दूजी जातिया रे गलील प्रदेशो खे इज्जत देणी। जो लोक न्हेरे दे चलणे लगी रे थे, तिने बड़ा प्रयासा देखेया ओर जो लोक अन्दकूप न्हेरे ते परे रे मौता रे देशो दे रओ थे, तिना पाँदे ज्योति चमकी।1 ओ मेरे यहोवा तैं एस देशो रे लोक बऊत बढ़ाए, तैं तिना खे बऊत मजे दित्ते, सेयो तां सामणे बडाईया रे बखतो री जी खुशी करोए ओर एड़े मगन ए, जेड़े लोक लूट बांडणे रे बखते मगन रओए। कऊँकि तैं तेसरी क्याड़िया पाँदला पारी जूँगड़ा, तिजी री पँजाल़िया और तेस पाँदे अन्देर करने वाल़े रा डण्डा, यो सारे एड़े तोड़ी ते रे, ठीक तेड़े ई जेड़े तुसे बऊत पईले मिद्यानिया री सेना अराई थी।
कऊँकि युद्धो रे लड़ने वाल़े सिपाईया रे बूट ओर खूनो साथे लथपथ टाल्ले सारे आगी दे फूखी जाणे। कऊँकि आसा रिया तँईं एक बाल़क पैदा ऊआ, यहोवे आसा खे एक पाऊ दित्तेया ओर राज्य रा बोज तेसरी कांदा पाँदे ऊणा ओर तेसरा नाओं “अद्भुत काम करने वाल़ा पराक्रमी परमेशर, अनन्तकालो रा बाओ ओर शान्तिया रा राजकुमार राखेया जाणा।” तेसरा राज्य सदा बढ़दा रणा ओर तेसरी शान्तिया रा अन्त नि ऊणा, इजी री खातर तेस से दाऊदो री राजगद्दिया पाँदे, एस बखतो ते लई की सदा खे न्याय ओर तर्मो रे जरीये पक्का करी की सम्बाल़ी की राखणा। सेना रे यहोवे री धुना रे जरीये ये ऊई जाणा।2
इस्राएलो रिया तँईं परमेशरो रा गुस्सा
परमेशरे इस्राएलो खे चतौणी देई की एक सन्देश पेजी राखेया; ओर से सच्च ऊणा। ओर सारी प्रजा खे, एप्रैमी ओर सामरिया रे रणे वाल़ेया खे पता लगी जाणा जो कमण्ड ओर सख्ताईया रे बोलोए, “ईटा री दवाला तो टल़ी गिया, पर आसा कअड़े रे पात्थरा साथे कअर बनाणा, गूलरो री लकड़िया री कड़िया बाडी तिया दिया ए, पर आसा तिना रे बदले देवदारो रा इस्तेमाल करना।” इजी बजा ते यहोवे इस्राएलिया रे खलाफ रसीनो रे बैरी प्रबल करने, ओर तिना रे दुश्मणा खे, मतलब पईले अराम ओर तेबे पलिश्ती उभारने ओर तिना मूँ खोली की इस्राएली निगल़ी लणे। इतणा ऊणे ते बाद बी तेसरा रोष शान्त नि ऊआ ओर एबु बी तेसरा आथ तिना रे खलाफ उठेया रा ए। तेबे बी यो इस्राएलो रे लोक तेस परमेशरो रे नेड़े नि आए जिने सेयो काईते थे। ओर ना सेना रे यहोवे खे टोल़दे। इजी बजा ते यहोवे इस्राएलो बीचा ते सिर ओर पूँछ, खजूरी री डाल़िया ओर नंगल़ एक ई दिने बाडी देणे3।
बुजुर्ग ओर इज्जतदार मर्द तो सिर ए ओर चूठी गल्ल सिखाणे वाल़ा नबी पूँछ ए, कऊँकि जो इना लोका ते आगे चलोए, सेयो इना खे बाटा ते पटकाई देओए ओर जो इना पीछे चलोए, सेयो नाश ऊई जाओए। इजी बजा ते प्रभु ना तो तिना रे जवाना ते खुश ऊणा ओर ना तेस इना रे अनाथ बाल़का ओर बिदुआ पाँदे दया करनी, कऊँकि हर एक पग्ति हीन ओर कुकर्मी ए ओर हर एकी रे मुंए ते मूर्खता री गल्ल निकल़ोई, इतणा ऊणे ते बी तेसरा रोष शान्त नि ऊआ ओर तेसरा आथ एबुए तक सजा देणे खे आगे बढ़ेया राए। कऊँकि दुष्टता आगी जेड़ी पड़कोई, से कांडे-चीट फूकी देओई, बल्कि से कणे जंगल़ा रे जाड़ो रे आग लगाओई ओर से तुएँ रे चड़चड़ करी की ऊबो खे उठोई। सेना रे यहोवे रे रोषो रिया बजा ते ये इस्राएल देश फूकीगा ओर यो लोक आगी रे फेऊआ जेड़े ए, ओर केसी आपणा पाई पनि छाडणा। लोका आपणे दाँणे कनारे रे पड़ोसिये पाँदे अमला करना, पर तेबे बी पूखे ई रणे। तिना आपणे खूँजे कनारे रे पड़ोसी खाई जाणे, पर रजणे नि। अंतो दे तिना आपणे ई बच्चेया रा मास खाई जाणा। मनश्शे एप्रैमो रे लोक एकी दूजे पाँदे अमला करोए, ओर साथे मिली की सेयो यहूदा पाँदे अमला करोए। इतणे ते बी तेसरा रोष शान्त नि ऊआ ओर यहोवे रा आथ एबुए तक सजा देणे खे बढ़ेया राए।
Source notes (3)
- Footnote तिना पाँदे ज्योति चमकी। मत्ती 4:15, लूक. 1:79
- Footnote लूक. 1:32,33, यिर्म. 23:5
- Footnote नरम खजूरी री डाल़िया जेड़े लोक ओर जरूरतमंद लोक
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.