Baghlayani Bible
यशायाह 49
इस्राएल, जातिया-जातिया रिया तँईं प्रयासा
यहोवे रा दास बोलोआ, “ओ दूर देशो रे लोको मेरी गल्ल कान लगाई की सुणो; ओर दूरो-दूरो रे राज रे लोको, त्यान लगाई की मेरी सुणो! यहोवे आऊँ गर्भो ते ई चूणी राखेया, जेबे आऊँ माया रे पेटो दे था, तेबेई तिने आऊँ आपणा दास चूणी ला दा ए।”1 यहोवे मेरा मूँ पैनी तलवारी जेड़ा बणाया ओर तिने आऊँ आपणे आथो पीछे लकोया; तिने आऊँ चमकीला तीर बणाई की आपणे तरकशो दे गुप्त राखेया; यहोवे माखे बोलेया, “तूँ मेरा दास इस्राएल ए, मां तांते ओर इस्राएली लोका ते आपणी महिमा करवाणी।”2
तेबे मैं आपणे आपू ते बोलेया, “मेरी मईणत बेकार ऊई, मैं आपणी सामर्थ बेकार लगाई, तेबे बी मेरा न्याय पक्का यहोवे गे ए ओर मेरी मईणता रा फल़ मेरे परमेशरो रे आथो दे ए।” ओर एबे यहोवे जिने आऊँ जन्मो ते ई इजी खे बणाई राखेया ताकि आऊँ तेसरा दास बणी की याकूबो खे तेसरी तरफा खे फेरी की ल्याऊँ, मतलब इस्राएलो रे लोका खे तेसगे कट्ठा करुँ, कऊँकि आऊँ यहोवे री नजरा रे आदरो जोगा ए ओर मेरा परमेशर मेरी तागत ए, यहोवे माखे ये बी बोलेया, “ये तो अल़्की जी गल्ल ए कि तूँ याकूबो रे गोत्रो रा उद्धार करने ओर इस्राएलो रे बचे रे लोका खे वापस ल्याऊणे खे मेरा दास बणे; मां तूँ जातिया-जातिया रे लोका खे ज्योति ठराणा, ताकि मेरा उद्धार तरतिया रे एक कनारे ते दूजे कनारे तक फैली जाओ।”3 इस्राएलो रा पवित्र यहोवा ओर उद्धार करने वाल़ा तेस माणूंए खे जो बऊत ई त्यागेया दा ए, जेसते देश बी नफरत करोए ओर जो परदाना रा दास ए, बोलोआ, “राजेया तूँ आजाद ऊँदा ऊआ देखणा, ओर तेरी इज्जत करने खे उठणे; अधिकारिया बी ये देखणा, ओर तिना तेरी इज्जत करने खे थाले चुकणा।” ये इजी खे ऊणा कऊँकि यहोवे आपणा दास ऊणे खे चूणी राखेया; इस्राएलो रा पवित्र परमेशर आपणे वादे खे पूरा करोआ।
यरूशलेम शईरो रा दुबारा बनाणा
यहोवा ईंयाँ बोलोआ, “आपणी खुशिया रे बखते मैं तेरी सुणी, उद्धार करने रे दिने मैं तेरी मताद करी राखी; मां तेरी रक्षा करी की तूँ लोका खे एक वाचा ठराणा, ताकि देशो खे स्थिर करे ओर ऊजड़ी री जगा खे तिना रे अधिकारिया रे आथो रे देई दे”4 ओर कैदिया खे बोले जेला ते निकल़ी जाओ ओर जो न्हेरे दे ए तिना खे बोलो, “आपणे आपू खे दखाओ।” तिना बाटा रे कनारे-कनारे पेट परना, सारे सूके टीलेया पाँदे बी तिना खे खाणे खे मिलणा।5 गुलामिया ते वापस आऊणे वाल़े इस्राएली लोक पूखे-त्याये नि रणे, ना ई तिना खे सूरजो री गर्मी लगणी, कऊँकि से जो तिना पाँदे दया करोआ, यहोवा तिना रा अगुवा ऊणा ओर तेस सेयो पाणिए री सूबल़ा गे निणे।6 मां आपणे सारे पाह्ड़ तोड़ी की सीदिया बाटा बणाई देणियां ओर मां आपणे उबड़ खाबड़ राज्य रिया सड़का सीदिया करनिया। देखो, मेरे लोक दूरा ते आऊणे, कुछ उत्तर दिशा ते आऊणे कुछ पच्छमा ते आऊणे, कुछ सीनियों रे देशो ते आऊणे। ओ सर्ग जयजयकार कर, ओ तरती मगन ओ; ओ पाह्ड़ो गल़ा खोली की जयजयकार करो! कऊँकि यहोवे आपणी प्रजा खे शान्ति देई राखी ओर आपणे शरीफ लोका पाँदे दया करी राखी।7 पर सिय्योने बोलेया, “यहोवे आसे छाडी ते रे, म्हारा प्रभु आसा खे पूली गा दा।” यहोवा सिय्योनो री शकाईता रा ज्वाब देओआ, “क्या एड़ा ऊई सकोआ कि कोई माये आपणे दूद पींदे बच्चे खे पूली जाओ ओर आपणे जमाए रे बच्चे पाँदे दया नि करो? आ, से तो पूली सकोई, पर आऊँ तुसा खे नि पूली सकदा। देख, मैं तेरा नाओं आपणे आथो पाँदे लिखी राखेया, आऊँ सदा तेरे बारे दे सोचदा रऊँआ। तेरे बच्चे तांगे वापस आई जाणे। जिने लोके तेरा शईर उजाड़ी राखेया सेयो तुसा रा शईर छाडी की जाणे लगी रे।” आपणी आखी चकी की चऊँ कनारे देख, तेरे लोक सारे के सारे कट्ठे ऊई की तांगे आऊणे लगी रे। यहोवे री ये बाणी ए कि मेरी जिन्दगिया री कसम, तां पक्का सेयो गईणे जेड़े पईनणे, तां लाड़िया जेड़े सेयो आपणे शरीरो रे बानी लणे।8 तेरिया जो जगा सुनसाण ओर ऊजड़ी रिया ए ओर तेरे जो देश खण्डहर ई खण्डहर ए, तिना रे एबे माणूं नि रणे ओर ताखे नाश करने वाल़े तेरे दुश्मण दूर ऊई जाणे। तेरे बच्चे जो तांते लई ले दे तिना फेर तेरे कानो रे बोलणा, “ये जगा आसा खे छोटी ए, आसा खे रणे खे ओर जगा दे कि।” तेबे तां मनो रे बोलणा, “यो बच्चे मेरिया तँईं किने पैदा कित्ते? आऊँ तो बाँज ऊई गी थी, आऊँ तो बिना बच्चे री ऊई गी थी, आऊँ गुलामिया रे ओर ओरे-पोरे कूमदी रई, यो किने पाल़े? देख, आऊँ कल्ली रईगी थी; तेबे यो केई थे?” प्रभु यहोवा ईंयाँ बोलोआ, “देख, आऊँ आपणा आथ जातिया-जातिया रे लोका पाँदे चकूँआ ओर मां आपणा चण्डा देशा-देशा रे लोका सामणे खड़ा करना; तेबे सेयो तेरे पाऊआ खे आपणी गोदा रे लई की आऊणे ओर तेरी बेटिया खे आपणी कान्दा पाँदे चढ़ाई की तांगे आऊणे। राजे तेरे बच्चेया गे नौकर ओर राणिया तेरी बेटिया रिया दाईया ऊणिया। तिना आपणे नाक रगड़ी की तांगे माथा टेकणा ओर तेरे पैरा री तूड़ चाटणी। तेबे ताखे पता लगी जाणा कि आऊँ ई यहोवा ए; मेरी बाट न्याल़ने वाल़े कदी शर्मिंदा नि ऊणे।”9 क्या शेरो रे मुंओ ते कोई शकार छुड़ाई सकोआ? क्या अत्याचारी राजे रे आथो ते बन्दी छुड़ाई सकोए कदी बीनी।10 तेबे बी यहोवा ईंयाँ बोलोआ, “आ, वीरो रे बन्दी तेसते छुड़ाए जाणे ओर दुष्टो रा शिकार तेसरे आथो ते छुड़ाई लणा, कऊँकि जो तां साथे लड़ोए, तिना साथे मां आपू मुकद्दमा लड़ना ओर मां तेरे बाल-बच्चेया रा उद्धार करना। मां तां पाँदे अन्देर करने वाल़े आपू बीचे लड़ाई की एकी दूजे खे काणे खे मजबूर करी देणे, ओर सेयो तिना एकी दूजे खे नाश करी देणा, जेड़े नये शराबो खे पी की ओए। तेबे सबी लोका खे पता लगी जाणा कि तेरा उद्धार करने वाल़ा यहोवा ओर तेरा छुड़ाणे वाल़ा याकूबो रा शक्तिमान परमेशर आऊँ ईए।”11
Source notes (11)
- Footnote यिर्म. 90:8, गला. 1:15
- Footnote 2 थिस्स. 1:10
- Footnote लूक. 2:32, प्रेरि. 13:47, पज. 98:2,3
- Footnote पज. 69:13, 2 कुरि. 6:2
- Footnote लूक. 4:18
- Footnote प्रका. 7:16,17
- Footnote पज. 96:11-13, यिर्म. 31:13
- Footnote रोम. 14:11
- Footnote पज. 72:9-11, योए. 2:27
- Footnote मत्ती 12:29
- Footnote प्रका. 16:6
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.