Baghlayani Bible
यशायाह 32
तार्मिकता रा राज
आऊँ जो गल्ला बताणे लगी रा, देखो, कुछ दिन एकी राजे तर्मो साथे राज करना ओर राजकुमारा न्याय साथे राज करना।1 नवां राजा ओर तेसरे सब अधिकारी मानो तूफानो ते लूकणे री जगा ओर छाछा ते लूकणे खे ऊणे या बिना पाणिए रे देशो दे पाणिए रे झरने ओर तपी री जमीना दे बड़ी चट्टानी री छांए ऊणे। तेस बखते देखणे वाल़े रिया आखी तुँदल़िया नि ऊणिया ओर सुणने वाल़ेया रे कान लगे दे रणे। पराऊणी करने वाल़ेया रे मना ज्ञानो रिया गल्ला समजणियां ओर तोतला बोलणे वाल़ेया रिया जीबा फटाफट ओर साफ बोलणा। मूर्ख लोका खे फेर ज्ञानी नि बोलेया जाणा ओर ना कँजूसो खे दानी बोलेया जाणा। कऊँकि मूर्ख तो मूर्खता री गल्ला बोलोआ ओर से आपणे मनो दे अनर्थ ई सोचदा रओआ ताकि से पापो रे काम करो ओर यहोवे रे खलाफ चूठ बोलो, पूखे खे पूखा ई रणी दो ओर त्याये खे त्याया ई। कपटिये रिया गल्ला बुरिया ओईया, से बुरिया योजना निकयाल़दा रओआ ताकि गरीबो खे बी प्यारो साथे बोली की चूठी गल्ला दे लूटो। पर खरा माणूं खरिया ई योजना निकयाल़ोआ, से खराईया साथे स्थिर बी रणा।
यरूशलेम शईरो रिया जवाणसा
ओ सुखी जवाणसो, उठी की मेरी सुणो; ओ बेफिकर बेटियो, मेरे वचना रिया तरफा खे कान लगाओ। ओ बेफिकर जवाणसो, एकी सालो ते बाद ई तुसा पाँदे विपत्ति आऊणे वाल़ी ए, कऊँकि तुसे एक साल बाद अंगूर कट्ठे नि करी सकदिया, इजी री बजा ये कि तेस बखते ना तो तोड़ने खे अंगूर ऊणे ओर ना ई कोई फल़ मिलणा। ओ सुखी जवाणसो, डरो, ओ बेफिकर जवाणसो, आपणे-आपणे अच्छे टाल्ले खोली की आपणे-आपणे लको दे शोगो री टाट बानो। तुसा खरे डोरूआ खे ओर फल़ लगणे वाल़ी अंगूरा री बेला खे छाती पीटणी। मेरे लोका री जमीना पाँदे कांडे वाल़े डाल़ जमणे लगी रे। तिना सबी कअरा खे रोओ जेती लोक खुश थे ओर तेस यरूशलेम शईरो रिया तँईं जो जिन्दगिया साथे परेया रा था। कऊँकि राजे री जगा खाली ऊई जाणी, आल्ला करने वाल़ेया रा शईर सुनसाण ऊई जाणा, ओर पाह्ड़ी ओर तिना पाँदले पईरेदारा रे कअर सदा खे गुफा ओर बणो रे गह्देया खे कूमणे री जगा ओर करेलू डांगरा खे चरने री जगा तदुओ तक बणी दी रणी, जदुओ तक परमेशर आपणा आत्मा उबा ते आसा पाँदे नि लटी देयोगा ओर जंगल़ फल़ देणे वाल़ा बगीचा नि बणी जाओगा ओर फल़ देणे वाल़ा बगीचा फेर बण नि गिणेया जाओगा। तेबे तेस जंगल़ो दे न्याय बसणा ओर तेस फल़ देणे वाल़े बगीचे दे तर्म रणा। ओर तर्मो रा फल़ शान्ति ओर तिजी रा नतीजा सदा रा चैन ओर बेफिकर ऊणा।2 मेरे लोक शान्तिया रिया बांकिया जगा दे बेफिकर रणे ओर रामो री जगा दे सुखो साथे रणे। पर जंगल़ो रे नाशो रे बखते ओल़े बरसणे ओर शईर पूरी तरअ ते बर्बाद ऊई जाणा। तुसे बऊत तन्य ए जो सबी पाणिए रे कनारे बिऊ लगाओए ओर बल़द ओर गह्देया खे रामो दे चराओए।
Source notes (2)
- Footnote प्रका. 19:11, इब्रा. 1:8-9
- Footnote रोम. 14:7, याकू. 3:18
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.