यशायाह 18

कूशो रिया तँईं परमेशरो रा सन्देश

1लाणत ए तेसा जमीना खे जो कूशो रिया नदिया साथे-साथे फैली री। ए जमीन टिड्डिया ते परी री ए। तुसे तिना पंखा रा फड़फड़ाणा सुणी सकोए। 2ओर समुद्रो पाँदे दूता खे नंगल़ो री किस्तिया दे बठयाल़ी की नील नदिया री बाटा ते ये बोली की पेजेया, “ओ फुर्तिले दूतो, एक एड़िया जातिया रे लोका गे जाओ जेसा रे लोक तगड़े ओर सुन्दर ए, जो शुरूओ ते आजो तक डराऊणे ए, जो नापणे ओर केसणे वाल़ा बीए ओर जिना रा देश बड़ी नदिया साथे दो इस्से दे करी राखेया।” 3सुणो, तरतिया रे सब रणे वाल़े लोको, जेबे लड़ाईया खे चण्डे खे पाह्ड़ो पाँदे खड़ा करो, तो तेसखे देखो! जेबे नरसिंगा बजोगा, तेबे सुणो! 4कऊँकि यहोवे मांगे ईंयाँ बोली राखेया, “तूपा री तेज गर्मी या बडाईया रे बखतो दे बर्खा वाल़े बादल़ो जेड़ा मां शान्त ऊई की देखणा। 5कऊँकि अंगूर तोड़ने रे बखतो ते पईले जेबे फूल फूली चुके ओर अंगूरा रे गुच्छे पाकणे लगे, तेबे यहोवे तिना रिया पाँगटिया दाचिया साथे बाडणियां ओर फैली रिया डाल़िया तोड़ी-तोड़ी की लग सेटी देणियां। 6सेयो अँगूर ओर फैलणे वाल़ी डाल़िया1 पाह्ड़ो रे मासाहारी पंछीया2 खे ओर बणो रे डांगरा खे खाणे रिया तँईं छाडी देणियां। गर्मिया दे पंछीया इना अँगूरा रिया बेला दे रणा ओर सारे प्रकारा रे बणो रे डांगरा तिना खे खांदे-खांदे ठण्ड बीताणी। 7तेस बखते जेसा जातिया रे लोक3 तगड़े ओर सुन्दर ऊणे ओर जो शुरूओ ते ई डराऊणे ऊँदे आई रे ओर नापणे ओर केसणे वाल़े ए ओर जिना रा देश नदिया साथे दो इस्से करी राखेया, तेसा जातिया ते सेना रे यहोवे रे नाओं री जगा, सिय्योन पाह्ड़ो4 पाँदे सेना रे यहोवे गे पेंट पऊँचाया जाणी।”