Baghlayani Bible
यहेजकेल 48
गोत्रो दे जमीन बाडणा
इस्राएलो रे गोत्रो रे इस्से ये ए: उत्तरी बन्ने ते लगेया रा हेतलोन शईरो री बाटा गे हमात जगा री काट्टिया तक ओर दमिश्क रे बन्ने रे हसरेनान शईरो ते उत्तरो रिया तरफा खे हमात तक एक इस्सा दानो रा ओ ओर तेतेरे पूर्वी ओर पच्छमी बन्ना बी ओ। दान गोत्रो रे बन्ने ते लगेया रा पूर्बो ते पच्छमा तक आशेर गोत्रो रा एक इस्सा ओ। आशेर गोत्रो रे बन्ने ते लगेया रा, पूर्बो ते पच्छमा तक नप्तालिया रे गोत्रो रा एक इस्सा ओ। नप्ताली गोत्रो रे बन्ने ते लगेया रा पूर्बो ते पच्छमा तक मनश्शे गोत्रो रा एक इस्सा ओ। मनश्शे गोत्रो रे बन्ने ते लगेया रा पूर्बो ते पच्छमा तक एप्रैम गोत्रो रा एक इस्सा ओ। एप्रैम गोत्रो रे बन्ने ते लगेया रा पूर्बो ते पच्छमा तक रूबेन गोत्रो रा एक इस्सा ओ। रूबेन गोत्रो रे बन्ने ते लगेया रा पूर्बो ते पच्छमा तक यहूदा गोत्रो रा एक इस्सा ओ।
देशो रे बीचे जमीना रा खास इस्सा
यहूदा गोत्रो रे बन्ने ते लगेया रा पूर्बो ते पच्छमा तक से चढ़ाया रा इस्सा ओ, जो तुसा खे चढ़ाणा पड़ना, से साडे बारह किलोमीटर चौड़ा ओर पूर्बो ते लई की पच्छमा तक केसी एक गोत्रो रे इस्से जेड़ा लाम्बा ओ ओर तेते बीचे मन्दर ओ। जो इस्सा तुसा यहोवे खे चढ़ाणा पड़ना, से साडे बारह किलोमीटर लाम्बा ओर दस किलोमीटर चौड़ा ओ। ये चढ़ाया रा पवित्र इस्सा पुरोईता खे मिलो; से उत्तर ओर दखणो रिया तरफा खे साडे बारह किलोमीटर लाम्बा, पच्छमा ओर पूर्बो रिया तरफा खे पाँज किलोमीटर चौड़ा ऊणा चाईयो ओर पूर्बो रिया तरफा खे पाँज किलोमीटर चौड़ी ओर दक्खणो ते साडे बारह किलोमीटर लाम्बी ऊणी। तेतेरे बीचो बीच यहोवे रा मन्दर ऊणा चाईयो। ये खास पवित्र इस्सा सादोको री ल्वादा रे तिना पवित्र पुरोईता खे ओ जो मेरी आज्ञा रा पालण करदे आई रे ओर इस्राएलिया रे पटकणे रे बखते लेविया जेड़े नि पटके थे। इजी री खातर देशो रे चढ़ाए रे इस्से बीचा ते ये तिना खे चढ़ाया रा इस्सा, मतलब बऊत पवित्र देश ठईरो ओर लेवी गोत्रो रे बन्ने साथे लगेया रा रओ। पुरोईता रे बन्ने ते लगेया रा लेविया रा इस्सा ओ, से साडे बारह किलोमीटर लाम्बा ओर पाँज किलोमीटर चौड़ा ओ, इया सारी लम्बाई-चौड़ाई येई ओ। पुरोईत ओर लेवी तेते बीचा ते ना तो कुछ बेचो, ना दूजी जमीना साथे बदलो ओर ना जमीना री पईली उपज ओरी केसी खे देयो, कऊँकि से यहोवे खे पवित्र ए। साडे बारह किलोमीटर लाम्बी ओर टाई किलोमीटर चौड़ा इस्सा बचेया रा रणा, से शईर, बस्ती ओर चराईया खे आम इस्सा ओ ओर यरूशलेम शईर तेते बीचे ओ। शईरो रा नाप ये ऊणा चाईयो, मतलब उत्तर, दक्खण, पूर्ब ओर पच्छमा रिया तरफा खे स्वा दो किलोमीटर लाम्बा। शईरो गे उत्तर, दक्खण, पूर्ब ओर पच्छमा दे चराईया ओ। जो 410 फुट चौड़ाईया ऊणिया चाईयो। चढ़ाए रे पवित्र जमीना रे इस्से री लम्बाईया बीचा ते बचेया दा इस्सा पूर्बा रिया तरफा खे पाँज किलोमीटर ओर पच्छमा रिया तरफा खे पाँज किलोमीटर ऊणा। ये इस्सा पवित्र, चढ़ाए दे इस्से साथे लगेया दा ऊणा। तेतेरी उपजा ते तीना लोका खे खाणा मिलणा जो यरूशलेम शईरो दे काम करोए। इस्राएलो रे सारे गोत्रो बीचा ते जो यरूशलेम शईरो दे काम करो, से तेतेरी खेती करेया करो। सारा चढ़ाया रा इस्सा साडे बारह किलोमीटर चौड़ा-लाम्बा ओ, तुसा खे चौरस पवित्र जगा चढ़ाणी पड़नी जिदे शईरो री खास जमीन ओ। जो इस्सा रयी जाओगा, से परदाना खे मिलो। पवित्र चढ़ाए रे इस्से री ओर शईरो री खास जमीना रे दुँईं कनारे, मतलब तिना रे पूर्ब ओर पश्चिम कनारे साडे बारह किलोमीटर चौड़ाई, जो ओरी गोत्रा रे इस्से रे रओ, से परदाना खे मिलो ओर चढ़ाया रा पवित्र इस्सा ओर मन्दरो री पवित्र जगा तिना बीचे ऊणी चाईयो। जो परदानो रा इस्सा ऊणा, से लेविया बीचे ओर शईरो री खास जमीन ओ। परदानो रा इस्सा यहूदा रे गोत्रो री जमीन ओर दक्खणा दे बिन्यामीन गोत्रो री जमीना बीचे ऊणा।
ओरी गोत्रो रे इस्से
तेसा खास जगा रे दक्खणा दे, हर ओरी गोत्रा खे जमीना रा एक इस्सा देया जाणा चाईयो जो कि इस्राएलो रे पूर्बो रे बन्ने ते लई की पच्छमा दे बड़े समुद्रो तक फैलेया दा ए। उत्तरा रिया तरफा ते शुरू ऊई की बिन्यामीन गोत्रो खे जमीन ऊणी। बिन्यामीनो रे बन्ने ते लगेया रा पूर्बो ते पच्छमा तक शिमोन गोत्रो रा एक इस्सा। शिमोन रे बन्ने ते लगेया रा पूर्बो ते पच्छमा तक इस्साकार गोत्रो रा एक इस्सा। इस्साकारो रे बन्ने ते लगेया रा पूर्बो ते पच्छमा तक जबूलून गोत्रो रा एक इस्सा। जबूलून रे बन्ने ते लगेया रा पूर्बो ते पच्छमा तक गाद गोत्रो रा एक इस्सा। ओर गाद रे बन्ने गे दक्खण तरफा रा बन्ना तामार शईरो ते लई की मरीबा-कादेश नाओं री सूबल़ा तक ओर मिस्रो रे नाल़े ओर समुद्रो तक पऊँचे। जो इस्राएल देश तुसा खे इस्राएलो रे गोत्रा खे बाँडणे पड़ने से यो ईए ओर तिना रे इस्से बी यो ईए, परमेशर यहोवे री येई बाणी ए।
शईरो रे द्वार
शईरो ते निकल़ने रे द्वार ए ऊणे। मतलब उत्तरो रिया तरफा खे जेतेरी लम्बाई स्वा दो किलोमीटर ऊणी। तिना रे तीन बड़े द्वार ओ; मतलब एक रूबेन रा बड़े द्वार, एक यहूदा रा बड़े द्वार ओर एक लेविये रा बड़े द्वार ओ; कऊँकि शईरो रे बड़े द्वारो रे नाओं इस्राएलो रे गोत्रा पाँदे राखणे पड़ने। पूर्बो रिया तरफा खे स्वा दो किलोमीटर लाम्बा बन्ना ओ ओर तिदे तीन बड़े द्वार ऊणे चाईयो, मतलब एक यूसुफो रा बड़े द्वार, एक बिन्यामीनो रा बड़े द्वार ओर एक दान रा बड़े द्वार ओ। दक्खण तरफा खे स्वा दो किलोमीटर लाम्बा ओ ओर तिदे तीन बड़े द्वार ओ, मतलब एक शिमोन रा बड़े द्वार, एक इस्साकारो रा बड़े द्वार ओर एक जबूलूनो रा बड़े द्वार ओ। ओर पच्छमा रिया तरफा खे स्वा दो किलोमीटर लाम्बा ओर तिदे तीन बड़े द्वार ओ, मतलब एक गाद रा बड़े द्वार, एक आशेर रा बड़े द्वार ओर एक नप्ताली रा बड़े द्वार ओ। इजी री खातर शईरो रे चऊँ कनारे रा केरा नौ किलोमीटर ऊणा ओर तेस दिनो ते बाद शईरो रा नाओं “यहोवा एती ए”1 रणा।
Source notes (1)
- Footnote यहोवा एती ए यहोवा शामा
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.