यहेजकेल 23

दो व्याभिचारणिया बईणा

1यहोवे रा ये सन्देश फेर माखे मिलेया, 2“ओ नाश ऊणे वाल़े माणूंआ, दो बईणी थिया, जो एक ई माया रिया बेटिया थिया। 3सेयो आपणे बचपनो तेई वेश्या रा काम मिस्रो दे करने लगिया; तिना री छातिया कुआँरिया रेई मर्द छूँओ थे ओर तिना रा कुआँरापन बी खोईता ओर सेयो वेश्या बणीगिया। 4बड़िया बईणी रा नाओं ओहोला1 था ओर छोटिया रा नाओं ओहोलीबा2 था। ओहोला रा मतलब सामरिया था, ओर ओहोलीबा रा मतलब यरूशलेम था। सेयो मेरिया लाड़िया बणीगिया ओर बादो ते तिने मेरिया तँईं माठे ओर बेटिया पैदा कित्ते।”

बड़ी बईण सामरी

5ओहोला जेबे मेरी थी, तेबेई व्याभिचारिणी ऊई की आपणे दोस्ता पाँदे मोहित ऊणे लगी जो तेसा रे पड़ोसी अश्शूरी थे। 6सेयो सारे के सारे तो नीले टाल्ले पईनणे वाल़े सुन्दर सिपाई, परदान ओर सरदार थे ओर तिना बीचा ते कुछ लोक कोड़ेया पाँदे सवार थे। 7इजी री खातर तेसे तिना ई साथे व्याभिचार कित्तेया जो सारे के सारे परदान अश्शूरी थे। से जेस साथे चाओ थी तेस साथे बुरा काम करो थी। से तिना री मूर्तिया री पूजा करो थी ओर आपू खे अशुद्ध बणाओ थी। 8जो व्याभिचार तेसे मिस्रो रे सिखेया था, से तेसे नि छाडेया, कऊँकि बचपनो दे मिस्रो रे माणूंए तेसा साथे कुकर्म कित्तेया ओर तेसा रिया छातिया छूँईंया ओर तन-मनो साथे तेसा साथे व्याभिचार कित्तेया। 9इजी बजा ते मैं से तिना अश्शूरी दोस्ता रे आथो रेई करी ती जिना पाँदे से मोहित ऊई थी। 10तिने तेसा खे बदनाम करने खे तेसा रे टाल्ले खुलाईते। तिने तेसा रे माठे बेटिया छुड़ाईते। तिने तेसा पाँदे अमला कित्तेया ओर से काईती। तेसारी सजा री बजा ते हर जगा जवाणसा तेसा रिया किस्मता रे बारे दे गल्ला करो थिया।

छोटी बईण, यरूशलेम

11यहोवे माखे बोलेया, “तेसा री छोटी बईण ओहोलीबे ये देखेया, तेबे बी से मोहित ऊई की व्याभिचार करने रे आपणी बईणी ते बी जादा बढ़ी गी। 12ओहोलीबा बी आपणे अश्शूरी पड़ोसिया पाँदे मोहित ओ थी, जो सारे के सारे बऊत सुन्दर टाल्ले पईनणे वाल़े ओर तिना बीचा ते कुछ लोक कोड़ेया पाँदे सवार थे, सिपाई, सरदार ओर सबी प्रकारा रे परदान थे। 13तेबे मैं देखेया कि से बी अशुद्ध ऊई गी; तिना दुँईं बईणी री एक जेड़ी चाल थी।” 14पर छोटी बईण ओहोलीबा जादा व्याभिचार करदी गई; तेसे कांदा दे मर्दा रे चित्र देखे। सेयो चमकणे वाल़े लाल रंगो रे चित्र थे जो लोके बेबीलोनो रे मर्दा रे बणाई राखे थे। 15तिने बेबीलोनो रे माणूंए लको दे चादर बानी राखी थी ओर तिना रे सिरो पाँदे लाम्बी पगड़िया थिया। ओर तिना रे सिरो पाँदे रंग-बरंगी पगड़िया थिया। सेयो सब मर्द बड़े अधिकारी दिशणे लगी रे थे। ये सारे बेबीलोनो दे रणे वाल़े थे जिना री जन्म-भूमि कसदिया रा देश था। 16तेबे बेबीलोनो रिया तिना छावणिया खे देखदे ई ओहोलीबा तिना पाँदे मोहित ऊई गी ओर तिना गे कसदिया रे देशो रे दूत पेजे। 17तेबे बाबेली तेसा गे माँजे पाँदे आए ओर तेसा साथे व्याभिचार करी की से अशुद्ध करी ती ओर जेबे से तिना ते अशुद्ध ऊई गी, तेबे तेसा रा मन तिना ते फिरी गा। 18तेसे आपणे आपू खे सबी रे सामणे ल्याया ओर सबी खे दशी ता कि से एक वेश्या ए। माखे तेसा ते तितणी ई नफरत ऊणे लगी री थी जितणी माखे तेसा री बड़ी बईणी ते ओ थी। 19तेबे बी ओहोलीबा मिस्र देशो रे आपणे बचपनो रे दिन याद करी की जेबे से वेश्या रा काम करो थी, ओर जादा व्याभिचार करदी गई; 20तेती से एड़े मिस्रो रे मर्दा पाँदे मोहित ऊई थी, जिना रे गुप्त अंग गह्देया जेड़े ओर वीर्य कोड़ेया जेड़ा था। 21तैं सोचेया ऊणा कि जेबे तूँ जवान थी तो आपू किंयाँ गन्दे तरीके ते व्याभिचार करो थी। तूँ चाए थी कि मर्द तेरे दुदु पकड़ो ओर तांते प्यार करो जेड़ा कि मिस्रो रे मर्दे कित्तेया था।

यरूशलेमो पाँदे न्याय

22इजी बजा ते ओ ओहोलीबा, परमेशर यहोवा ताखे ईंयाँ बोलोआ, “देख, मां तेरे दोस्त, जिना ते तेरा मन फिरी गा चऊँ कनारे ते तेरे खलाफ ली आऊणे। 23मतलब बाबेली ओर सारे कसदी ओर पकोदो रे लोक, शोया ओर कोआ जातिया रे लोका खे; ओर तिना साथे सारे अश्शूरी ल्याऊणे, जो सारे के सारे कोड़ेया रे सवार सुन्दर सिपाई, परदान ओर कई प्रकारा रे सरदार, परदान ओर नामी मर्द थे। 24ओबालिया रे सब प्यार करने वाल़े लोका री पीड़ तुसा गे आऊणी। सेयो आपणे कोड़ेया पाँदे सवार ओर आपणे रथो पाँदे आऊणे। लोक गिणतिया दे बऊत ऊणे। तिना गे तिना रे भाल़े तिना रिया ढाला ओर तिना रे सिरो रे सुरक्षा कवच ऊणे। सेओ तुसा रे चऊँ कनारे कट्ठे ऊणे। मां तिना खे बताणा कि तुसे मां साथे क्या करी राखेया ओर तिना आपणी तरफा ते तुसा खे दण्डो री सजा देणी।” 25मां तां पाँदे जल़ना, जेतेते तिना बी तुसा साथे रोषो रे आई की बर्ताव करना। तिना तेसरा नाक ओर कान बाडी देणे ओर तेरा जो बी बचेया रा रणा से तलवारी साथे काई देणा। तिना तेसरे बच्चे छुड़ाई की लई जाणे ओर तेरे कअरो दे जो बी जिऊँदे बची जाणे, सेयो आगी रे फूखी जाणे। 26तेरे पईलके प्रेमिया तेरे टाल्ले खोली की तेरे सुन्दर-सुन्दर गईणे लई जाणे। 27ईंयाँ मां तेरा माहापाप ओर जो वेश्या रा काम तैं मिस्र देशो रे सिखेया था, से बी तांते छुड़ाणा, एथो तक कि तां फेर आपणी आख तिना रिया तरफा खे नि लगाणी ओर ना मिस्र देश फेर याद करना। 28प्रभु यहोवे माखे यरूशलेमो रे लोका खे बोलणे खे बोलेया: मां तूँ तिना लोका रे आथो दे करी देणी जिना ते तूँ नफरत करेई। यो से लोक ए जिना तैं इजी बजा ते मूँ मोड़ी ला कऊँकि तूँ परेशान थी। 29ओर तिना तां साथे दुश्मणिया साथे बर्ताव करना ओर तेरी सारी कमाई लई लणी ओर तूँ नांगी करी की छाडी देणी ओर जेबे तूँ क्वाड़नी, तेबे तेरे सारे पाप ओर व्याभिचार सामणे आई जाणे। 30यो काम तां साथे इजी खे करे जाणे कऊँकि तूँ दूजी जातिया पीछे व्याभिचारणिया जेड़ी ऊई गी ओर तिना रिया मूर्तिया खे पूजी की अशुद्ध ऊई गी। 31तूँ आपणी बड़ी बईणी री चाला पाँदे चली री, इजी बजा ते मां तेरे आथो दे तेसा जेड़ा सजा रा कटोरा देणा।

32प्रभु यहोवा ईंयाँ बोलोआ, “ताखे आपणी बड़ी बईणी रे सजा वाल़े कटोरे ते पीणा जो मैं तेरिया बईणी खे देई राखेया। ये एक एड़ा कटोरा ए जिदे बऊत सजा ए। लोक तुसा पाँदे आसणे ओर तुसा री बेजती करनी। 33तूँ नशे दे ओर दु:खो साथे रज्जी जाणी। तूँ आपणी बड़ी बईणी ओहोले सामरिया रा नाओं राखेया, मतलब नाश ओर उजाड़ पी की रज्जी जाणी। 34तेते बीचा ते तां चाटी-चाटी की पीणा ओर तेतेरे ठीकरे बी चबाणे ओर दु:खो दे आपणी छातिया काईल करी देणियां; कऊँकि मैं ई एड़ा बोली राखेया, प्रभु यहोवे री येई बाणी ए।” 35तैं जो आऊँ पुलाई ता रा ओर आपणा मूँ मांते फेरी ता रा, इजी री खातर तूँ आपू ई आपणे पापा ओर व्याभिचारो री सजा रा बोज चक, परमेशर यहोवे रा येई वचन ए।

दूई बईणा खे परमेशरो री सजा

36यहोवे माखे बोलेया, “ओ नाश ऊणे वाल़े माणूंआ, तूँ ओहोला ओर ओहोलीबा रा न्याय कर। तिना पाँदे तिना रे कित्ते रे घिनौने कामा रा दोष लगा। 37कऊँकि तिने सबी व्याभिचार करी राखेया ओर तिना रे आथो रे खून लगी रा; तिने आपणी मूर्तिया साथे व्याभिचार कित्तेया ओर आपणे बच्चे जो मांते पैदा ऊए थे, तिना मूर्तिया सामणे बलि करने खे चढ़ाए। 38तेबे तिने मां साथे एड़ा बर्ताव कित्तेया कि तेते साथे ई मेरी पवित्र जगा बी अशुद्ध कित्ती ओर मेरा रामो रा दिन बी अपवित्र करिता। 39सेयो आपणे बच्चे मूर्तिया सामणे बलि करी की तेस दिने ई मेरे पवित्र मन्दरो दे कूसी गे। सेयो मेरे आराधना रे मन्दरो दे आए ओर से अपवित्र करिता। 40ओहोले ओर ओहोलीबे दूनी बऊत दूरा ते माणूं बुलाए ओर सेयो आए बी। तिना रिया तँईं तूँ नाह्यी तोई की, आखी दे काजल़ लगाई की, गईणे पईनी की; 41तू सुन्दर माँजे पाँदे बैठी दी रयी ओर तां सामणे एक मेज राखेया दा था, जेते पाँदे तैं मेरा तूप ओर मेरा जैतूनो रा तेल जो मेरिया पूजा खे थे राखेया। 42उजाड़ जगा दे यरूशलेमो रे निश्चिंत लोका री पीड़ा रा आल्ला सुणेया ओर तिना आम लोका गे जंगल़ो ते बुलाए रे नशेड़ी लोक बी थे, तिने तिना दुँईं बईणी रे आथो रे बांगा पन्याईया ओर तिना रे सिरो पाँदे सुन्दर मुकुट राखेया। 43तेबे जो व्याभिचार करदे-करदे सयाणियां ऊई चुकिया थिया, तिना रे बारे दे मैं आपणे आपू ते बोलेया, एबे तो तिना तेसा साथे ई व्याभिचार करना। 44कऊँकि सेयो लोक तेसा गे एड़े गये जेड़े लोक वेश्या गे जाओए। तेड़े ई सेयो ओहोला ओर ओहोलीबा नाओं री माहापापणी जवाणसा गे गये। 45इजी री खातर तर्मी लोक व्याभिचारणिया ओर अत्यारे जोगा ओहोला ओर ओहोलीबा रा न्याय करो, कऊँकि सेयो व्याभिचारणिया ए ओर तिना रे आथो दे अत्या रा खून लगी रा।” 46इजी बजा ते मैं परमेशर यहोवा ये बोलेया, “मां एक पीड़ा ते ओहोला रे खलाफ जेसा रा नाओं सामरिया ओर ओहोलीबा रा नाओं यरूशलेम राखेया ए तिना पाँदे अमला कराई की सेयो एड़िया करनिया कि सेयो मारिया-मारिया फिरनियां ओर लूटी जाणिया। 47सेना रे तिना दुश्मणा ओहोला ओहोलीबा पाँदे पत्थराव करी की सेयो कायी देणियां ओर आपणी तलवारी साथे बाडी देणियां, तेबे तिना, तिना रे बच्चे काई की तिना रे कअर फूकी देणे।” 48परमेशर बोलोआ, “ईंयाँ मां पाप देशो ते दूर करी देणा ओर तेबे सबी जवाणसा खे शिक्षा मिलणी ओर सेयो तुसा जेड़ा पाप करने ते बची जाणिया। 49तुसा दूनी बईणा रा महापाप तुसा रे सिरो पाँदे ई पड़ना ओर तुसा जरूर आपणी मूर्तिया री आराधना करी की आपणे ई पापा रा बोज चकणा ओर तेबे तुसा खे पता लगी जाणा कि आऊँ परमेशर यहोवा ए।”