Baghlayani Bible
यहेजकेल 19
राजकुमारो रिया तँईं इस्राएलो रा शोग
यहोवे माखे बोलेया, “यहेजकेल इस्राएलो रे दुनी परदाना रे बारे दे तूँ ये शोगो रा गीत सुणा, ‘इस्राएलो रे हाकिमा खे बोल, एड़ा लगोआ जेड़े तुसा री माये एक एड़ी शेरनी थी, जेसे आपणे बच्चेया खे दूजे जवान शेरा बीचे पाल़ेया था।’ तेसे आपणे एक बच्चे खे शिकार करने खे जानवर पकड़ने सिखाए, जिंयाँ-जिंयाँ से बड़ा ऊआ, तिने लोका खे खाणा शुरू करी ता। जेबे ओरी देशो रे लोके तेसरे बारे दे सुणेया। तिने एक खड्डा खणेया ओर आपणे जाल़ो दे से फसाईता। तिने तेसदे कांडे पाए ओर तेसखे मिस्रो दे लईगे। तेसरी माये तेसरे कअरे आऊणे रा इन्तजार करोई। से नि आया ओर तेसे तेसरिया तँईं उम्मीद करना छाडीता। तेसे आपणे दूजे माठे खे एक जवान शेर बणने दे मताद कित्ती। तेबे से जवान शेर ऊई की शेरा बीचे चलणे-फिरने लगेया ओर से बी शिकार पकड़ना सीखी गा ओर तिने बी माणूंआ रा शिकार करना ओर खाणा शुरू करिता। तिने तिना रे मईलो पाँदे अमला कित्तेया। तिने शईर नाश कित्ते ओर सेयो उजाड़ी ते, बल्कि तेसरे गरजणे रे डरो रे मारे यहूदा देश ओर जो कुछ तिदे था सब ऊजड़ी गा। तेबे तेसरे चऊँ कनारले देशा रे लोक आपणे-आपणे राज ते तेसरे खलाफ निकल़ी की आए, ओर तिने तेस पाँदे जाल़ सेटेया। तिने से आपणे जाल़ो दे फसाईता। तेबे सेयो तेसरे नकेल लगाई की जेला दे बन्द करी की बाबेलो रे राजे गे लईगे ओर गढ़ो दे बन्द करी ता, ताकि तेसरी आवाज इस्राएलो रे पाह्ड़ी देशो दे फेर नि सुणो।”
तेरी माये जेसा ते तूँ जम्मेया, से कनारे पाँदे लगी री अंगूरा री बेला जेड़ी थी ओर डूगे पाणिए रिया बजा ते फल ओर डाल़िया साथे परी री थी। राज करने वाल़ेया रे राजदण्डो खे तेते बेला दे मोटिया-मोटिया पाँगटिया थिया ओर से इतणी ऊच्ची ऊई कि से बादल़ा तँईं खे पऊँची ओर आपणी बऊत सारी डाल़िया समेत से बऊत ई लाम्बी ओर मजबूत दिशणे लगी। तेबे बी से बेल रोषो रे आई की जमीना दे पट्टी की सेटी ती ओर तेतेरे फल तूप पखणे रिया बजा ते सूकी गे ओर तेतेरी मोटिया पाँगटिया टूटी की सूकी गिया ओर सेयो आगी रे स्वा ऊईगिया। एबे से बेल रेगिस्तानो दे जमणे लगी री। से गर्म, सूकिया जगा दे ए जेती पाणी नि ए। आगी तेते रा चोठ जल़ाना शुरू करिता, फेर तेतेरी पाँगटिया जल़ाना शुरू करिता ओर सारे अँगूर जल़ाईते। एबे एक बी मजबूत डाल़ी नि बची री; सेयो कदी बी राजे रिया तँईं राजदण्ड नि बणने। येई शोगो रा गीत ए ओर ये शोगो रे बखते गाया जाणा चाईयो।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.