Baghlayani Bible
एस्तेर 9
यहूदिया रा आपणे दुश्मणा खे नाश करना
अदान नाओं रे बारूए मीन्ने रे तेरूए दिने, जेस दिने राजे री आज्ञा ओर नियम पूरे ऊणे वाल़े थे ओर यहूदिया रे दुश्मण तिना पाँदे प्रबल ऊणे री उम्मीद राखो थे, पर इजी रे उल्टे यहूदी आपणे बैरिया पाँदे प्रबल ऊए; तेस दिने, यहूदी लोक राजा क्षयर्षो रे सबी राज्य दे आपणे-आपणे शईरो दे कट्ठे ऊए, ताकि जो तिना रा नुकशाण करने री कोशिश करो, ओर तिना पाँदे अमला करो। पर कोई तिना रा सामणा नि करी सकेया, कऊँकि तिना रा डर देशो-देशो रे सबी लोका रे मनो रे समाई गा था। बल्कि राज्य रे सारे हाकिम, ओर राज्यपाल, ओर राजे रे कर्मचारिये यहूदिया री मताद कित्ती, कऊँकि तिना रे मनो रे मोर्दकैए रा डर समाई गा था। मोर्दकै तो राजे गे बऊत इज्जतदार था ओर तेसरी कीर्ति सबी जगा दे फैली गी; ओर मोर्दकैए तागतबर ऊँदा चली गा। तेबे यहूदिये आपणे सारे दुश्मण तलवारी साथे काई की ओर कायल करी की नाश करीते ओर आपणे बैरिया साथे आपणी इच्छा रे मुताबिक बर्ताव कित्तेया।
शूशन शईरो रे गढ़ो दे यहूदिये 500 माणूं काई की नाश करीते। तिने यहूदिया रे दुश्मण हामान हम्मदातो रे दसो पाऊ काईते जिना रे नाओं ये ए: पर्शन्दाता, दल्पोन, अस्पाता, पोराता, अदल्या, अरीदाता, पर्मशता, अरीसै, अरीदै ओर वैजाता, तिने हामान हम्मदातो रे दसो पाऊ जो यहूदिया रे दुश्मण थे काईते; पर तिने हामानो रा तअन नि लूटेया। तेस दिने शूशन शईरो रे गढ़ो दे काये दे माणूंआ री गिणती राजे गे सुणाई। तेबे राजे एस्तेर राणिया खे बोलेया, “यहूदिये शूशन राजगढ़ो देई 500 माणूं ओर हामानो रे दस पाऊ बी काई की नाश करीते; तेबे राज्य दे ओरी-ओरी जगा दे तिने क्या पता क्या-क्या कित्तेया ऊणा! एबे इजी ते जादा तेरी क्या प्रार्थना ए? से बी पूरी करेया जाणी ओर तूँ क्या माँगेई? से बी ताखे दित्तेया जाणा।” एस्तेरे बोलेया, “जे राजे खे ठीक लगो तो शूशनो रे यहूदिया खे आज की जेड़ी काल बी आज्ञा दित्ती जाओ ओर हामानो रे दसो पाऊ फाँसिया रे खम्बेया पाँदे लटकाए जाओ।” राजे आपणे परदाना खे बोलेया, “एड़ा ई करेया जाओ;” तेबे ये आज्ञा शूशनो दे दित्ती ओर हामानो रे दसो पाऊ लटकाईते। दूजे दिने तेबे शूशन शईरो दे यहूदिये अदार मीन्ने रे चौदुए दिने बी कट्ठे ऊई की शूशनो दे 300 माणूं काये, पर तअन नि लूटेया। राज्य री ओरी जगा दे यहूदी कट्ठे ऊई की आपणा-आपणा प्राण बचाणे खे खड़े ऊए ओर आपणे दुश्मणा बीचा ते 75,000 माणूं काई की आपणे दुश्मणा ते राम पाया; पर तिना रा तअन नि लूटेया। ये अदार मीन्ने रे तेरूए दिने कित्तेया ओर चौदुए दिने तिने राम करी की पाट्टी कित्ती ओर खुशिया रा दिन ठराया।
पर शूशनो रे यहूदी अदार मीन्ने रे तेरूए दिने ओर तेस मीन्ने रेई चौदुए दिने कट्ठे ऊए ओर आपणे दुश्मण काये ओर तेस मीन्ने रेई पन्द्रुए दिने तिने राम करी की पाट्टिया रा ओर खुशिया रा दिन ठराया। इजी बजा ते गाँवो रे यहूदी जो बिना दवाला री बस्तिया दे रओ थे, सेयो अदार मीन्ने रे चौदुए दिने खुशी ओर पाट्टी ओर आपू बीचे खाणे पीणे रिया चीजा पेजणे रा दिन नियुक्त करी की मनांदे रये।
यहूदिया रा पूरीम त्यार मनाणा
इना गल्ला रे बारे दे लिखी की, मोर्दकै राजा क्षयर्षो रे सबी राज्य दे, क्या नेड़े, क्या दूर रणे वाल़े सारे यहूदिया खे पर्चिया पेजिया, ओर ये आज्ञा दित्ती कि अदार मीन्ने रा चौदुआ ओर पन्द्रुआ दिन हर साल मनाया करो। जिना बीचे यहूदिया खे आपणे दुश्मणा ते राम मिलेया ओर ये मीन्ना जिदे शोग आनंदो दे ओर दु:ख खुशिया दे बदली गा; मानेया करो ओर तिना खे पाट्टी ओर खुशी ओर एकी-दूजे गे खाणे पीणे रिया चीजा पेजणे ओर कंगाल़ा खे दान देणे रे दिन मानो। तेबे यहूदिये जेड़ा शुरू कित्तेया था ओर जेड़ा मोर्दकै तिना खे लिखेया, हर साल तेड़ा ई करने रा निश्चा करी ला। कऊँकि हम्मदाता अगागीए रा पाऊ हामान जो सबी यहूदिया रा बिरोदी था, तिने यहूदिया खे नाश करने री साजिश कित्ती ओर तिना खे मिटाणे ओर नाश करने री पर्चिया पाईया थिया। पर जेबे राजे खे ये पता लगी गा, तेबे तिने आज्ञा दित्ती ओर चिट्ठिया दे लिखवाया कि जो दुष्ट साजिश हामाने यहूदिया रे खलाफ कित्ती थी, से तेसरे ई सिरो पाँदे वापस आओ, तेबे से ओर तेसरे पाऊ फाँसिया रे खम्बेया पाँदे लटकाए। इजी बजा ते तिना दिना रा नाओं पूर शब्दो ते पूरीम राखेया, एसा पर्चिया रिया सबी गल्ला रिया बजा ते ओर जो कुछ तिने इजी रे बारे दे देखेया ओर जो कुछ तिना पाँदे बीतेया था, तिजी री बजा ते बी, यहूदिये आपू-आपू खे ओर आपणी-आपणी ल्वादा खे ओर तिना सबी खे बी जो तिना साथे मिली गे थे ये अटल़ आज्ञा कित्ती कि तेस लेखो रे मुताबिक हर साल तेसरे ठराए रे बखतो दे सेयो इना दो दिना खे मानो।
तेबे हर पीढ़ी, हर कुल, हर राज्य, हर शईरो दे ये दिन याद करने ओर माने जाणे ओर पूरीम नाओं रे दिन यहूदिया दे कदी नि मिटणे ओर तिना री याद तिना रे कुलो ते नि जाणी। तेबे अबीहैलो री बेटी एस्तेर राणी ओर मोर्दकै यहूदिये, पूरीमो रे बारे दे दूजी पर्ची बड़े अक्को साथे लिखी। इजी चिट्ठिया री नकला मोर्दकै क्षयर्ष राजे रे, 127 राज्य रे सबी यहूदिया गे शान्ति देणे वाल़े ओर सच्ची गल्ला साथे ये लिखी की पेजिया, कि पूरीमो रे तिना दिना रे खास ठराए रे बखतो दे मोर्दकै यहूदी ओर एस्तेर राणिया री आज्ञा रे मुताबिक ओर जो यहूदिये आपणे ओर आपणी ल्वादा खे ठाणी ला था, तिजी रे मुताबिक बी बअरत ओर दु:ख करेया करो। पूरीमो रा ये नियम एस्तेर राणिया री आज्ञा ते बी स्थिर कित्तेया ओर तिना रे बारे दे कानूनो री कताबा दे लिखेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.