Baghlayani Bible
एस्तेर 5
एस्तेरा रा पाट्टी त्यार करना
इजी ते बाद तीजे दिने एस्तेर आपणे राजकीय टाल्ले पईनी की राजमईलो रे पीतरले आँगणो दे जाई की राजमईलो रे सामणे खड़ी ऊई गी। राजा तो राजमईलो दे राजगद्दिया पाँदे मईलो रे द्वारो सामणे बैठी रा था; ओर जेबे राजे एस्तेर राणी आँगणो दे खड़ी दी देखी, तेबे तेसा ते खुश ऊई की सूईने रा राजदण्ड जो तेसरे आथो दे था, तेसा रिया तरफा खे आगे कित्तेया। तेबे एस्तेरे नेड़े जाई की राजदण्डो रा मूरा छूँआ। तेबे राजे तेसा ते पूछेया, “ओ एस्तेर राणी, ताखे क्या चाईयो? ओर तू क्या माँगेई? माँग ओर ताखे आदा राज्य तक देया जाणा।”
एस्तेरे बोलेया, “अगर राजे खे ठीक लगो, तो आज हामानो खे साथे लई की तेसा पाट्टिया रे आओ, जो मैं राजे खे त्यार करी राखी।” तेबे राजे आज्ञा दित्ती, “हामानो खे फटाफट ली आओ, ताकि एस्तेर जो चाओई तिजी खे पूरा करिए।” तेबे राजा ओर हामान एस्तेरा री बणाई दी पाट्टिया दे आए। खाणे रे बखते जेबे सेयो शराब पीणे लगी रे थे, तेबे राजे एस्तेरा खे बोलेया, “तेरी क्या प्रार्थना ए? से पूरी कित्ती जाणी। ओर तूँ क्या माँगेई? माँग ओर आदा राज्य तक ताखे देया जाणा।”1 एस्तेरे ज्वाब दित्तेया, “मेरी प्रार्थना ओर जो आऊँ माँगुंई से ये ए, कि जे राजा मांते खुश ए ओर मेरी प्रार्थना सुणना ओर जो वरदान आऊँ मांगू सेई राजे खे देणा ठीक ओ, तेबे राजा ओर हामान काल तेसा पाट्टिया दे आओ, जो मां तिना खे करनी ओर काल मां राजे रे एस वचनो रे मुताबिक करना।”
हामानो रा मोर्दकैए खे काणे री योजना बनाणा
पाट्टिया ते बाद तेस ई दिने हामान मनो रे बऊत खुश ऊई की बारे गया। पर जेबे तिने मोर्दकै राजमईलो रे बड़े द्वारो रे देखेया कि से तेस सामणे ना तो खड़ा ऊआ ओर ना सामणे ते आटेया, तेबे से मोर्दकैए रे खलाफ गुस्से ते परी गा। तेबे बी हामान आपू खे रोकी की आपणे कअरे गया; ओर आपणे सारे दोस्त ओर आपणी जवाणस जेरेशा खे बुलावा पेजेया। तेबे हामाने तिना ते आपणे तअनो रा वैभव ओर आपणे बाल-बच्चेया री बढ़ोतरी ओर राजे से किंयाँ-किंयाँ बढ़ाया ओर सारे परदान ओर आपणे सारे कर्मचारिया बीचे ऊच्चा पद दित्तेया था, से सब कुछ बताया। हामाने ये बी बोलेया कि एस्तेर राणिये बी माखे छाडी की ओर केसी खे राजे साथे आपणी कित्ती री पाट्टिया रे आऊणे नि दित्तेया ओर काल बी तेसे राजे साथे आऊँ ई बुलाई राखेया। पर तेबे बी जेबे-जेबे माखे से यहूदी मोर्दकै राजमईलो रे बड़े द्वारो रे बैठेया रा दिशोआ, तेबे-तेबे ये सब कुछ माखे बेकार लगोआ। तेसरी लाड़ी जेरेशे ओर तेसरे सारे दोस्ते तेसखे बोलेया, “पंजा आथ ऊच्चा एक फाँसिया रा खम्बा बनाणा ओर प्यागा राजे खे बोलणा कि तेते पाँदे मोर्दकै लटकाया जाओ; तेबे राजे साथे मजे रे पाट्टिया खे जाया।” एते गल्ला ते खुश ऊई की हामाने तेड़ा ई फाँसिया रा एक खम्बा बणवाया।
Source notes (1)
- Footnote मर. 6:23
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.