Baghlayani Bible
स्याणेया रा ज्ञान 4:9
Verse 9 is marked below, with the whole chapter around it. Read from the start
तेबे मैं से सारा अन्देर देखेया, जो एते तरतिया पाँदे ओआ। तेबे मैं क्या देखेया कि अन्देर सयीणे वाल़ेया रे आसू छूटणे लगी रे ओर तिना खे कोई शान्ति देणे वाल़ा नि ए। अन्देर करने वाल़े तागतबर थे, पर अन्देर सईणे वाल़ेया खे कोई मताद करने वाल़ा नि था। तेबे मैं आपणे आपू ते बोलेया कि जो मरे दे ए, सेयो जिऊँदे लोका ते तन्य ए। बल्कि तिना दुँईं ते जादा भाग्यशाली सेईए, जो एबुए तक पैदा ई नि ऊआ, ओर ना ई तिने यो बुरे काम देखे जो संसारो रे ओए।
स्वार्थी मईणता रा बेकार ऊणा
तेबे मैं एड़ा देखेया कि लोक पड़ोसिया रिया जल़नी ते बऊत मईणत करोए आपू खे सफल बनाणे रिया तँईं! ये गल्ल बी माखे बेकार ई लगी; जिंयाँ अवा पकड़ने खे मईणत करना बेकार ओआ।
मूर्ख माणूं काम करने खे ना करोए सेयो छातिया पाँदे आपणे आथ मोड़ी की खाली बैठे दे रओए ईंयाँ सेयो आपणा ई नाश करोए।
इजी री खातर मैं बोलेया, “जादा पैसा ना ऊणे ते बी संतुष्ट रणा खरा ए, इजी रे बदले की जादा पैसा पाणे रिया तँईं मईणत करना, जो की अवा खे पकड़ने जेड़ा ए।”
तेबे मैं तरतिया पाँदे ये बी बेकार गल्ल देखी।
कई लोक दुनिया दे कल्ले ओए; तिना रे ना बालबच्चे ओए, ना पाई-बईण! तेबे बी सेयो बऊत जादा काम करदे रओए, सेयो कदी बी पैसेया ते किंयाँ बी रजदे नि! सेयो एड़ा पनि सोचदे,? आसे केसरिया तँईं पैसा कट्ठा करने लगी रे? एड़ा करना बी बेकार ए ओर बिना मतलबो रा दु:खी जीवन ए।
दोस्तो री कीमत
कले रणे ते दो माणूं साथे रणे अच्छे ए, कऊँकि सेयो एकी दूजे री मताद करी सकोए सफल ऊणे रिया तँईं। कऊँकि जे तिना बीचा ते कोई एक जणा रूड़ो, तो दूजे से चकणा, पर हाय तेस पाँदे, जो कल्ला ऊई की रूड़ो ओर तेसखे कोई चकणे वाल़ा नि ओ। जेबे दो जणे कट्ठे सऊणे, तो सेयो गर्म रणे, पर कल्ला माणूं किंयाँ आपू खे गर्म राखी सकोआ? जे कोई कल्ले पाँदे अमला करो तो करो, पर दो जणे तेसरा सामणा करी सकोए। जो डोरी तीऊँ तागेया साथे बाटी री ओ से चट नि टूटदी।
लोका बीचे तालमेलो रा कम ऊणा
अक्लमंद जवान पाऊ गरीब ऊँदे ऊए बी एड़े स्याणे ओर मूर्ख राजे ते जादा अच्छा ए, जो सलाई खे नि मानदा। ये सम्भव ए कि चाए से बिना दौलता ते ओ या तेसरे माए-बाओ गरीब थे या से जेला दे कुछ बखतो तक कैद रया ओ एक दिन राजा बणी जाओ। पर फेर कोई ओर जवान माणूं राजा बणीगा ओर सब लोक तेसते खुश थे। सेयो सारे लोक अणगिणत थे जिना पाँदे से परदान था, तेबे बी बादो ते ऊणे वाल़े लोक तेसरी बजा ते खुश नि ऊणे। पक्का ये बी बेकार ओर अवा खे पकड़ने जेड़ा ए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.