Baghlayani Bible
स्याणेया रा ज्ञान 10
ज्ञानो री ओर मूर्खता री तागत
जिंयाँ मरी रिया माक्खिया रिया बजा ते गन्धो रा तेल सड़ने लगोआ ओर तिदे बास आऊणे लगोई, तियाँ ई थोड़ी जी मूर्खता बुद्धि ओर प्रतिष्ठा खे खराब करी देओई।
अक्लमंदो रा मन खरी गल्ला रिया तरफा खे लगेया रा रओआ, पर मूर्खो रा मन तिजी ते उल्टा चलोआ।
मूर्ख आपणे जिऊँणे रे तरीके रे जरिये आपणी मूर्खता दखाओआ, ओर सानिया ते पता चली जाओआ कि तिना दे कोई समज नि ए।
जेबे परदानो रा गुस्सा तां पाँदे पड़को, तेबे तैं आपणा काम नि छाडणा, कऊँकि जे तूँ सब्र राखेगा तो तेरे बड़े-बड़े पाप बी माफ ऊई सकोए।
एक बुराई ए जो मैं तरतिया पाँदे देखी, एते बुराईया रा जिम्मेबार से परदान ई ए।
मूर्खो खे बड़ी ओर ऊच्ची जगा मिलोई ओर अमीर लोका खे थाले ई बैठणा पढ़ोआ।
मैं दासा खे कोड़ेया पाँदे चढ़े दे ओर परदाना खे दासो जेड़े जमीना दे पैदल चलदे ऊए देखेया।
जो कोई गड्डा खणो आ से तिदे ई रूड़ना ओर जो बाड़ तोड़ो से सापो कटणा।
जो माणूं पात्थर तोड़ो से तिना ते ई कायल ऊणा, ओर जो लकड़ू बाडोगा, तेसखे तिजी ते ई काओ ऊणा।
जे क्वाड़ी खूँडी ओ ओर माणूं तिजी खे पैना नि करो, तो जादा तागत लगाणी पड़नी, पर सफल ऊणे खे अक्लमंद ऊणा जरूरी ए।
जे मंत्रो ते पईले साप डसो, तो मंत्र पढ़ने वाल़े खे कोई फायदा नि ए।
अक्लमंद माणूंए रिया गल्ला रिया बजा ते दया ओई, पर मूर्ख माणूं आपणे ई मुंए ते निकल़ी रिया गल्ला ते नाश ओआ।
मूर्खो रिया गल्ला री शुरूआत मूर्खता ते ओर अन्त दु:ख देणे वाल़ा पागलपन ओआ।
मूर्ख माणूं बऊत गल्ला बढ़ाई की बोलोआ, तेबे बी आसा बिचा ते कोई नि जाणदा कि मरने ते बाद क्या ऊणा?
मूर्ख काम करदा ऊआ इतणा थकी जाओआ कि से नि जाणदा कि आपणे शईरो खे किंयाँ जाओ।
ओ देशो रे लोको, तुसा पाँदे हाय, जेबे तुसा रा राजा बाल़क ई ए ओर तुसा रे परदान प्यागा ते ई रोटी खाणे लगी जाओए!
ओ देश, तूँ तन्य ए, जेबे तेरा राजा कुलीन ए ओर तेरे परदान बखतो पाँदे रोटी खाओए ओर से बी मतवाल़े ऊणे खे नि, पर तागत बढ़ाणे खे!
कुछ लोक इतणे आल़सी ओए ओर सेयो आपणे करो री मरम्मत नि करदे, ओर पाणी लगणे ते तिजी रिया कड़िया कमजोर ऊई जाओईया इजी बजा ते छत कमजोर ऊई की टल़ी जाओई।
पाट्टिया खुशिया दे कित्तिया जाओईया ओर अंगूरा रे रसो ते जिन्दगिया खे मजे मिलोए ओर पैसेया ते सब कुछ मिलोआ।
राजे खे मनो दे बी स्राप नि देणा, ना अमीरो खे आपणे सऊणे रे कमरे दे स्राप देणा, कऊँकि सर्गो रे केसी पंछिये तेरी बाणी लई जाणी ओर केसी उडने वाल़े जन्तुए तेरी से गल्ल बताई देणी।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.