Baghlayani Bible
दानिय्येल 6
दानिय्येलो रे खलाफ साजिश
कईया साला ते बाद जेबे दारा राजा था तिने आपणे राज्य पाँदे 120 एड़े परदान ठराणे रा फैंसला लया, जो पूरे राज्य पाँदे अक्क राखो। तिना पाँदे तिने तीन अध्यक्ष, जिना बीचा ते दानिय्येल एक था, इजी खे ठराए कि सेयो तिना परदाना ते लेखा लया करो ओर ईंयाँ राजे रा कोई नुकशाण नि ओ। दानिय्येल एक अक्लमंद ओर खरा अध्यक्ष था, तेबे से तेसखे तिना अध्यक्ष ओर परदाना रे जादा प्रतिष्ठा मिली, बल्कि राजा ये बी सोचो था कि तेसखे सारे देशो पाँदे राजा बणाऊँ। तेबे दूजे अधिकारी ओर राज्यपाल राज्य रे कामो दे दानिय्येलो रे खलाफ दोष टोल़ने लगे, पर से विश्वासो जोगा था ओर तेसरे कामो रे कोई पूल या दोष नि निकल़ेया ओर तिना खे कोई दोष या पाप नि मिलेया। तेबे सेयो अधिकारी ओर राज्यपाल आपू बीचे एकी दूजे ते बोलणे लगे, “आसे तेस दानिय्येलो रे तेसरे परमेशरो री बिधान खे छाडी की ओर किजी चीजा रे बारे तेसरे खलाफ कोई दोष नि लगाई सकदे।” तेबे सेयो अधिकारी ओर राज्यपाल राजे गे बड़ी जल्दबाजिया दे आए ओर राजे खे बोलणे लगे, “ओ राजा दारा, तूँ युगो-युगो तक जिऊँदे रओ। राज्य रे सारे अधिकारी, परदान, सलाहकार, सेनापति ओर राज्यपाल ताखे एक सला देणा चाओए। आसे सहमत ए कि तूँ एक आज्ञा दे। ओर ताखे ये पक्का करना चाईयो कि सब एतेखे मानो। ओ राजा, ये आज्ञा ए जेतेखे सब लोक आगले तिया दिना तक मानदे रओ। ओर कोई बी ताखे छाडी की केसी माणूं या देवते ते प्रार्थना नि करो, जे कोई एड़ा करो तो से शेरा री गुफा दे सेटी देणा। इजी री खातर एबे ओ राजा, एड़ी आज्ञा दे ओर एते चिट्ठिया पाँदे दस्तखत कर, जेते कि ये गल्ल मादिया ओर फारसिया रे अटल़ बिधानो रे मुताबिक जेते खे कोई बदली नि सको।” तेबे दारा राजे तेसा आज्ञा री चिट्ठिया पाँदे दस्तखत करीते।
शेरो री गुफा रे दानिय्येल
जेबे दानिय्येलो खे पता लगेया कि तेते चिट्ठिया पाँदे दस्तखत ऊई चूकी रे, तेबे से आपणे कअरो खे चली गा। तेसरे कअरो रिया पाँदली मञ्जला रे कमरे दे यरूशलेमो रिया तरफा खे खुलणे वाल़िया द्वारिया थिया। तेती, जेड़ा से सदा करदा रओ था, से खुली द्वारिया रे सामणे जानूआ रे पारे बैठो था ओर दिनो दे तीन बार परमेशरो ते प्रार्थना करो था। तेबे दानिय्येलो ते नफरत करने वाल़े सेयो राज्य रे अधिकारी ये देखणे खे गये कि तेस क्या करना। तिने देखेया कि दानिय्येल आपणे परमेशरो ते प्रार्थना करने लगी रा ओर से परमेशरो ते मताद मांगणे लगी रा था। इजी री खातर सेयो राजे गे गये ओर तेसते पूछेया, “ओ राजा, क्या ताखे याद ए कि तैं एक नियम लिखेया था जिदे लिखेया था कि आगले तिया दिना तक जो कोई ताखे छाडी की केसी माणूं या देवते ते प्रार्थना करोगा, से शेरो री गुफा दे सेटी देणा?” राजे ज्वाब दित्तेया, “आ, ये ई से नियम ए जो मैं लिखेया था। ये मादी ओर फारसिया रे नियम अटल़ ओए।” सेयो ना तो बदले जाई सकोए ओर ना ई मटयाई जाई सकोए। तेबे तिने राजे खे बोलेया, “यहूदी गुलामा बीचा ते जो दानिय्येल ए, से तेरा या तेरे नियमा री कोई इज्जत नि करदा, से दिनो दे तीऊँ बार आपणे परमेशरो ते प्रार्थना करेया करोआ।” ये सुणी की राजा बऊत उदास ऊईगा ओर दानिय्येलो खे बचाणे रे उपाय सोचणे लगेया ओर सूरज डूबणे तक तेसखे बचाणे री कोशिश करदा रया। तेबे दानिय्येलो रे दुश्मण राजे गे आई की फटाफट बोलणे लगे, “ओ राजा, ये जाणी लो कि मादी ओर फारसिया रे ये बिधान ए कि जेतेखे राजा ना करो या जो आज्ञा राजा ठराओ, से बदली नि सकदी।” तेबे राजे आज्ञा दित्ती ओर राजे रे कर्मचारी दानिय्येलो खे ल्याये ओर से शेरो री गुफा दे सेटी ता। तेस बखते राजे दानिय्येलो खे बोलेया, “तेरा परमेशर जेसरी तूँ सदा आराधना करेया, सेई ताखे बचाओ”! गुफा रे मुरे पाँदे एक पात्थर राखेया, ओर राजे तेते पाँदे आपणी छापा री ओर परदाना री छापा री मुहर लगाईती, ताकि कोई बी दानिय्येलो खे बचाई नि सको।
दानिय्येलो रा शेरो ते बचाया जाणा
तेबे राजा आपणे मईलो दे वापस चली गा ओर तेसा राती बिना रोटी खाए सयी गा ओर तेसगे सुख बिलासो री कोई चीज नि पऊँछायी ओर तेसखे नींज पनि आई। दूजे दिने प्यागा तड़के ई राजा उठेया ओर शेरो री गुफा री तरफा खे फटाफट चली गा। जेबे राजा गुफा रे नेड़े गया, तेबे दु:खी आवाजा रे चींगणे लगेया ओर दानिय्येलो खे बोलेया, “ओ दानिय्येल, ओ जिऊँदे परमेशरो रे दास, क्या तेरा परमेशर जेसरी तूँ सदा आराधना करेया, ताखे शेरा ते बचायी सकेया”? तेबे दानिय्येले राजे खे बोलेया, “ओ राजा, तूँ युग-युग जिऊँदा रये! मेरे परमेशरे आपणे दूत पेजी की शेरो रे मूँ एड़े बन्द करीते कि तिने मेरा कुछ नुकशाण नि कित्तेया, इजी री बजा ए कि आऊँ तेस सामणे निर्दोष ठईरेया ओर ओ राजा, मैं तां सामणे बी कोई पूल नि कित्ती।”1 तेबे राजे बऊत खुश ऊई की दानिय्येलो खे गुफा ते काडणे री आज्ञा दित्ती। तेबे से गुफा ते काडेया ओर तेसरे शरीरो रे नुकशाणो रा कोई नशाण नि था, कऊँकि से आपणे परमेशरो पाँदे परोसा राखो था।
दारा रे जरीये परमेशरो रा सम्मान
फेर राजे आपणे सेवका खे आज्ञा दित्ती। जाई कि तिना लोका खे लई की आओ जिने दानिय्येलो रे खलाफ गल़त बोलेया था। तिने सेयो ल्याई की सेयो ओर तिना रे बालबच्चे ओर जवाणसा शेरो री गुफा दे सेटी ते। एते ते पईले की सेयो गुफा दे थाले पऊँचदे तेते ते पईले ई शेर तिना पाँदे चाफ बाई की तिना री आड्डिया रे टुकड़े-टुकड़े करीते। तेबे दारा राजे सारी तरतिया रे रणे वाल़े देश-देश, जाति-जाति ओर लग-लग पाषा बोलणे वाल़ेया गे ये लिखेया, “तुसे सयी-सलामत रओ! मैं आपणे देशो रे हर इस्से खे एक बिधान बणाई राखेया ए। सबी लोका खे तेस परमेशरो री सेवा करनी चाईयो जेसरी सेवा दानिय्येल करोआ। तिना खे डरो साथे तेसरी सेवा करनी चाईयो। से सदा खे रणे वाल़ा परमेशर ए, कोई बी तेसरे राजो खे नाश नि करी सकदा। तेस सदा राज करना।2 से लोका खे बचाणे ओर छुड़ाणे वाल़ा ए। से स्वर्गो दे ओर तरतिया पाँदे नशाण ओर चमत्कार दखाणे वाल़ा ए। तिने ई दानिय्येल शेरा ते बचाया।” तेबे दानिय्येल, दारा ओर कुस्रू फारसी, दुँईं रे राजो रे दिना दे आगे बढ़दा गया।
Source notes (2)
- Footnote यशा. 63:9, पज. 34:7
- Cross-reference दानि. 7:27; पज. 99:1-3
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.