Baghlayani Bible
2 सेमुएल 6
पवित्र सन्दूको रा यरूशलेम शईरो दे ल्याऊणा
तेबे दाऊदे एक बार ओर इस्राएलो रे गोत्रा बीचा ते सब बड़े लड़ने वाल़े सिपाई जो 30,000 थे कट्ठे कित्ते।
तेबे दाऊद ओर जितणे लोक तेस साथे थे, सेयो सारे उठी की यहूदा रे बाले नाओं री जगा ते चले, ताकि परमेशरो रे तेस पवित्र सन्दूको खे यरूशलेम शईरो खे ली आओ, जेतेखे करूबो पाँदे बैठणे वाल़े सेना रे यहोवे रा बोलोए। तेबे तिने परमेशरो रा सन्दूक एक नई बल़दा री गडिया दे चढ़ाई की टीले पाँदे रणे वाल़े अबीनादाबो रे कअरो ते काडेया ओर अबीनादाबो रे उज्जा ओर अह्यो नाओं रे दो पाऊ तेसा गडिया खे खेदणे लगे। ओर तिने से परमेशरो रे सन्दूको समेत टीले पाँदे रणे वाल़े अबीनादाबो रे कअरो ते बारे काडेया ओर अह्यो सन्दूको ते आगे-आगे चलणे लगेया। दाऊद ओर इस्राएलो रे सारे लोक यहोवे ते आगे केली री लकड़िया साथे बणे रे सब प्रकारा रे बाजे ओर बीणा, सारंगिया, डफ, डऊंरू, झाँझ बजांदे रये।
जेबे सेयो नाकोन1 किसानो रे खल्याणो तक आए, तेती बल़दा रे पैरो दे ठोकर लगी। ये देखी की उज्जे आपणा आथ परमेशरो रा सन्दूक पकड़ने खे आगे कित्तेया ओर से पकड़ेया ताकि से थाले नि पड़ी जाओ। इजी बजा ते यहोवे रा कोप उज्जे पाँदे पड़केया ओर तिने उज्जे पाँदे अमला कित्तेया, कऊँकि तिने आपणे आथो ते से सन्दूक पकड़ेया था; ओर से तेथी परमेशरो सामणे मरी गा।
तेबे दाऊद गुस्से ऊईगा, कऊँकि यहोवे उज्जा काया, ओर तिने तेसा जगा रा नाओं पेरेसुज्जा राखेया, ये नाओं आजके दिनो तक ए। ओर तेस दिने दाऊद यहोवे ते डरी की बोलणे लगेया, “यहोवे रा सन्दूक मांगे कऊँ आओ?” इजी री खातर दाऊदे यहोवे रा सन्दूक आपणे कअरे दाऊदो रे शईरो दे नि ल्याऊणा चाया; पर गत शईरो दे रणे वाल़े ओबेदेदोमो रे कअरे पऊँचाई ता। यहोवे रा सन्दूक गतो रे रणे वाल़े ओबेदेदोमो रे कअरे तीन मीन्ने तक रया ओर तेस बखते यहोवे ओबेदेदोम ओर तेसरे सारे कराने खे आशीष दित्ती। तेबे किने दाऊद राजे गे जाई की ये दशेया कि यहोवे ओबेदेदोमो रे कराने पाँदे ओर जो कुछ तेसरा ए, तिजी पाँदे बी पवित्र सन्दूको रिया बजअ ते आशीष देई राखी। तेबे दाऊदे जाई की परमेशरो रा सन्दूक ओबेदेदोमो रे कअरो ते दाऊदो रे शईरो दे खुशिया साथे ल्याया। तेस बखते यहोवे रा सन्दूक चकणे वाल़े लेवी गोत्रो रे लोक सन्दूक चकी की छे कदम चली चुके, तेबे दाऊदे एक बल़द ओर एक पाल़ेया-पोषेया रा बाच्छू बलि कराया। ओर दाऊद रेशमो रा एपोद लको दे गूड़ी की यहोवे रे सामणे तनो-मनो ते नाचदा रया। ईंयाँ दाऊद ओर इस्राएलो रा सारा कराना यहोवे रे सन्दूको खे जयजयकार करदे ओर नरसिंगा बजांदे ऊए यरूशलेम शईरो खे लई चले।
मीकला रा दाऊदो खे बेकार जाणना
जेबे यहोवे रा सन्दूक दाऊदो रे शईरो दे आऊणे लगी रा था, तेबे शाऊलो री बेटी दाऊदो री लाड़ी मीकले द्वारिया ते लमखी की दाऊद राजे खे यहोवे रे सन्दूको सामणे नाचदा ऊआ देखेया ओर तेसे से मन ई मन तुच्छ जाणेया। तेबे लोक यहोवे रा सन्दूक पीतरे ली आए ओर तेसरी जगा रे, मतलब तेस तम्बूए दे राखेया, जो दाऊदे तेसखे बणाया था; ओर दाऊदे यहोवे रे सामणे होमबलि ओर मेलबलि चढ़ाए। जेबे दाऊद होमबलि ओर मेलबलि चढ़ाई चुकेया, तेबे तिने सेना रे यहोवे रे नाओं ते प्रजा खे आशीर्वाद दित्तेया।
तेबे तिने सारी प्रजा खे, मतलब, क्या जवाणस, क्या मर्द, सारे इस्राएली लोका खे एक-एक रोटी, ओर एक-एक टुकड़ा मास ओर किशमिशा री एक-एक टिक्की बंडाई ती। तेबे प्रजा रे सारे लोक आपणे-आपणे कअरो खे चली गे। तेबे दाऊद आपणे कराने खे यहोवे ते आशीर्वाद मांगणे खे वापस ऊआ ओर शाऊलो री बेटी मीकल दाऊदो साथे मिलणे खे निकल़ी ओर बोलणे लगी, “आज इस्राएलो रे राजे जेबे आपणा शरीर आपणे कर्मचारिया री नौकराणिया सामणे एड़ा क्वाड़ी राखेया था, जेड़ा कोई नबाग आपणा शरीर क्वाड़ोआ, तेबे कितणा महान दिखणे लगी रा था!” दाऊदे मीकला खे बोलेया, “यहोवा, जिने तेरे बाओ ओर तेसरे सारे कराने रे बदले आऊँ चूणी की आपणी प्रजा इस्राएलो रा परदान ऊणे खे ठराईता रा, तेस सामणे आऊँ एड़ा नाचेया ओर मां यहोवे सामणे ईंयाँ ई नाचेया करना। ओर मां इजी ते बी जादा नबाग बणना ओर आपणी नजरा दे नीच ठईरना ओर जिना नौकराणिया री तैं चर्चा करी राखी तिना बी मेरा आदरमान करना।” इजी बजा ते शाऊलो री बेटी मीकला रे मरने रे दिना तक तेसा रे कोई ल्वाद नि ऊई।
Source notes (1)
- Footnote नाकोन 1 इति. 13:9 दे एसरा नाओं किदोन बी आ
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.