Baghlayani Bible
2 सेमुएल 4
ईशबोशेतो री अत्या
जेबे शाऊलो रे पाऊए सुणेया, कि अब्नेर हेब्रोन शईरो दे काई ता, तेबे ईशबोशेत ओर तेसरे सब इस्राएली लोक बऊत जादा डरीगे। शाऊलो रे पाऊए रे दो माणूं थे जो दलो रे परदान थे; एकी रा नाओं बानाह ओर दूजे रा नाओं रेकाब था, यो दोनो बेरोत शईरो रे बिन्यामीन गोत्रो रे रिम्मोनो रे पाऊ थे, कऊँकि बेरोत बी बिन्यामीनो रे इस्से दे गिणेया जाओआ; ओर बेरोती लोक गित्तैम शईरो दे नठीगे ओर आजो तक तेथी परदेशी ऊई की रओए।
शाऊलो रे पाऊ योनातानो रे एक लंगड़ा पाऊ था। जेबे यिज्रेलो ते शाऊल ओर योनातानो रे मरने रा सन्देश आया तेबे से पाँजा साला रा था; तेस बखते तेसरी दाई तेसखे लई की नठी गी ओर तेसा रे छोड़-छोड़ नठणे रिया बजअ ते से रूड़ी की लंगड़ा ऊईगा। तेसरा नाओं मपीबोशेत था। एक दिन बेरोती रिम्मोनो रे पाऊ रेकाब ओर बानाह तेज तूपा रे बखते ईशबोशेतो रे कअरे जेबे से त्याड़िया राम करने लगी रा था, आए। ओर सेयो कणक निणे रे बाह्ने दे पीतरे कूसी गे ओर तेसरे पेटो दे तलवारी की बाई; ओर से काईता। तेबे रेकाब ओर तेसरा पाई बानाह नठी की निकल़ी गे। जेबे सेयो कअरो दे कूसे ओर से आपणे कअरे माँजे पाँदे सऊणे लगी रा था, तेबे तिने से आपणियां तलवारी की काई ता ओर तेसरा सिर बाडीता ओर तेसरा सिर लई की सेयो यरदन काट्टिया ते ऊँदे ऊए सारी रात अराबा रिया बाटा रिये चलदे रये। सेयो ईशबोशेतो रा सिर हेब्रोनो दे दाऊदो गे लई जाई की बोलणे लगे, “देख, शाऊल जो तेरा दुश्मण ओर तेरे प्राणो पीछे पड़ी रा था, तेसरे पाऊ ईशबोशेतो रा ये सिर ए; तो आजके दिने यहोवे शाऊल ओर तेसरे कुलो ते मेरे प्रभु राजे रा बदला लई राखेया।”
दाऊदे बेरोती रिम्मोनो रे पाऊ रेकाब ओर तेसरे पाई बानाहो खे ज्वाब देई की तिना खे बोलेया यहोवा जो मेरे प्राणो खे सारी मुसीबता ते छुड़ांदा आई रा, तेसरी जिन्दगिया री कसम, जेबे किने ये जाणी की कि आऊँ शुभ सन्देश देणे लगी रा, सिकलग शईरो दे माखे शाऊलो रे मरने रा सन्देश दित्तेया, तेबे मैं से पकड़ी की काई ता; मतलब तेसखे सन्देशो रा येई बदला मिलेया। इजी री खातर जेबे दुष्ट माणूंए एक निर्दोष माणूं तेसरे ई कअरे, बल्कि तेसरे ई माँजे पाँदे काई ता, तो मां एबे जरूर तेसरे खूनो रा बदला तुसा ते लणा ओर तुसे तरतिया पाँदा ते नाश करी देणे। तेबे दाऊदे जवाना खे आज्ञा दित्ती ओर तिने सेयो काई की तिना रे आथ-पैर बाडे ओर तिना रिया लाशा पोखरे गे टाँगी तिया। तेबे ईशबोशेतो रा सिर चकी की हेब्रोनो दे अब्नेरो री कब्रा दे दबाईता।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.