Baghlayani Bible
2 सेमुएल 22
दाऊदो री जीता रा पजन
जेस बखते यहोवे दाऊदो खे तेसरे सारे दुश्मणा ते ओर शाऊलो रे आथो ते बचाया था, तेस बखते तिने यहोवे खे ये गीत गाया: तिने बोलेया,
“यहोवा मेरी चट्टान ओर मेरा गढ़, मेरा छुड़ाणे वाल़ा,
मेरा परमेशर मेरी रक्षा करने वाल़ा ए, जेसरी शरणा दे आऊँ आई रा,
मेरी ढाल, मेरा बचाणे वाल़ा सींग, मेरा ऊच्चा कद ओर मेरी शरण लणे री जगा ए,
ओ मेरे उद्धारकर्ता, तूँ कष्टा ते माखे बचाएया।
मां यहोवे खे जो स्तुतिया जोगा ए मैं तेसखे आका पाईया ओर तिने आऊँ मेरे दुश्मणा ते बचाया ए।
मौता री तरंगे मेरे चऊँ कनारे केरा पाई राखेया,
विनाश करने वाल़ी तरंगे आऊँ डराई ता था;
अधलोको रिया रस्सिया मेरे चऊँ कनारे थिया,
मौता रे फन्दे मेरे सामणे थे।
आपणी मुसीबता रे बखते मैं यहोवे खे आका पाईया ओर आपणे परमेशरो रे सामणे रोंदे ऊए प्रार्थना कित्ती।
तिने मेरी प्रार्थना आपणे मन्दरो ते सुणी ली ओर मेरी दुहाई तेसरे कानो दे पऊँची।
तेबे तरती इल्ली गी ओर डोलणे लगी
ओर सर्गो रिया निऊँआ थरथराई की बऊत ई इल्ली गिया,
कऊँकि से बऊत गुस्से दे ऊईगा था।
तेसरी नासा ते तुआँ निकल़ेया
ओर तेसरे मुंए ते आग निकल़ी की स्वा करने लगी;
जेते कि कोईले सुलगी गे।
ओर से सर्गो खे खोली की थाले उतरी की आया
ओर तेसरे पैरो ते थाले न्हेरा ऊईगा था।
से करूबो पाँदे सवार ऊई की उडी गा
ओर अवा दे पंखो पाँदे चढ़ी की दिशणे लगेया।
तिने आपणे चऊँ कनारले न्हेरे खे,
बादल़ो रे चूण्डे ओर सर्गो रे काल़े बादल़े आपणा मण्डप बणाया।
तेसरे मुंए रे तेजो ते कोईले बी बल़ने लगे।
यहोवा सर्गो ते गरजेया
ओर परमपरदान परमेशरे आपणी बाणी सुणाई।
तिने तीर चलाई-चलाई की मेरे दुश्मण तित्तर-बित्तर करी ते
ओर बिजल़ी ऊबा ते सेटी-सेटी की सेयो अराईते।
तेबे समुद्रो री थाली दिखणे लगी ओर दुनिया री निऊँआ खुलणे लगिया,
ये तो यहोवे रे बकणे ते ओर तेसरे नासा ते साआ लणे ते ऊआ।
तिने पाँदा ते आथ बढ़ाई की आऊँ पकड़ी ता
ओर आऊँ गईरे पाणिए बीचा ते बारे काडेया।
तिने आऊँ मेरे तागतबर दुश्मणो ते ओर मेरे बैरिया ते,
जो मांते जादा तागतबर थे, आऊँ छुड़ाया।
तिने मेरी मुसीबता रे बखते मेरा सामणा तो कित्तेया;
पर यहोवा मेरा सआरा था।
तिने आऊँ निकयाल़ी की खुली जगा रे पऊँचाया;
तिने आऊँ छुड़ाया, कऊँकि से मांते खुश था।
यहोवे मां साथे मेरे तर्मो रे मुताबिक बर्ताओ कित्तेया;
मेरे कामो री शुद्धता रे मुताबिक तिने माखे बदला दित्तेया।
कऊँकि आऊँ यहोवे री बाटा रे चलदा रया
ओर आपणे परमेशरो ते मूँ मोड़ी की दुष्ट नि बणेया।
तिजी ते बाद नियम तो मां सामणे बणे रे रये
ओर आऊँ तेसरी बिधिया ते आटेया नि।
आऊँ तेस साथे खरा बणेया रा रया
ओर पापो ते आपू खे बचाई की राखेया,
जिदे मेरे फसणे रा डर था।
इजी री खातर यहोवे मेरे तर्मो रे मुताबिक माखे बदला दित्तेया,
मेरी तेसा शुद्धता रे मुताबिक जेतेखे से देखो था।
विश्वासो साथे तूँ आपू खे विश्वासो जोगा दखाएया;
खरे मर्दो साथे तूँ आपू खे खरा दखाएया;
शुद्धो साथे तूँ आपू खे शुद्ध दखाएया
ओर टेडे साथे तूँ कठोर बणेया।
ओर शरीफ लोका खे तूँ बचाएया,
पर कमण्डिया पाँदे नजर करी की तिना खे इठा दखाएया।
ओ यहोवा, तूँ ई मेरा दिऊआ ए
ओर यहोवा मेरे न्हेरे खे दूर करी की प्रयासा करी देयोआ।
तेरी मतादा ते आऊँ चूण्डो पाँदे अमला करूँआ,
आपणे परमेशरो री मतादा ते आऊँ दवाल खे लाँगी देऊँआ।
परमेशरो री गति खरी ए;
यहोवे रा वचन परखेया दा ए;
से आपणे सारे शरणा रे आऊणे वाल़ेया री रक्षा करोआ।
यहोवे खे छाडी की कोई परमेशर नि ए?
म्हारे परमेशरो खे छाडी की कोई चट्टान नि ए?
से सेई परमेशर ए, जो मेरा बऊत मजबूत कीला ए,
से खरे माणूंए खे आपणी बाटा रे चलाओआ।
से मेरे पैरा खे ईरणियां जेड़ा बणाई देयोआ
ओर माखे ऊच्ची जगा रे खड़ा करोआ।
से मेरे आथा खे युद्ध करना सिखाओआ,
एथो तक की मेरिया बांयी पीतल़ी रे धनुषो खे चलाई सकोईया।
तैं माखे आपणे उद्धारो री ढाल देई राखी
ओर तेरी नरमाई माखे बढ़ाओई।
तूँ मेरे पैरा खे जगा चौड़ी करेया
कि मेरे पैर नि खरीसड़ो।
मैं आपणे दुश्मणा रा पीछा करी की सेयो नाश करी ते
ओर जदुओ तक तिना रा अन्त नि कित्तेया तदुओ तक वापस नि ऊआ।
मैं तिना रा अन्त कित्तेया
ओर सेयो एड़े काईल कित्ते कि सेयो उठी नि सकदे;
बल्कि सेयो मेरे पैरा निठे पड़ी रे।
तैं युद्धो खे मेरा लक मजबूत कित्तेया
ओर मेरे बिरोदी मां सामणे अराईते।
ओर तैं मेरे दुश्मणा री पीठ माखे दखाई,
ताकि आऊँ आपणे बैरिया खे बाडी सकूँ।
तिने मताद तो न्याल़ी, पर कोई बचाणे वाल़ा नि मिलेया;
तिने यहोवे री आश तो कित्ती पर तिने तिना खे कोई ज्वाब नि दित्तेया।
तेबे मैं सेयो कूटी-कूटी की जमीना री तूड़ा जेड़े करी ते,
मैं सेयो सड़क ओर गल़िया रे चीकड़ो जेड़े पटकी-पटकी की चऊँ कनारे फैलाईते।”
तेबे तैं आऊँ प्रजा रे चगड़ेया ते छुड़ाई की दूजी जातिया रा परदान ऊणे खे मेरी रक्षा कित्ती;
जिना लोका खे आऊँ नि जाणूं था सेयो बी मेरे वशो दे ऊई जाणे।
परदेशिया मेरी चुगली करनी;
तिना मेरा नाओं सुणदे ई मेरे वशो रे ऊई जाणा।
परदेशी नराश ऊई जाणे
ओर आपणे कअरा ते डरदे ऊए निकल़ने।
यहोवा जिऊँदा ए; मेरी चट्टान तन्य ए
ओर परमेशर जो मेरे उद्धारो री चट्टान ए, तेसरी महिमा ओ।
तन्य ए मेरा बदला लणे वाल़ा परमेशर,
जो देशो-देशो रे लोका खे मेरे वशो रे करी देयोआ
ओर माखे मेरे दुश्मणा बीचा ते निकयाल़ोआ;
आ, तूँ माखे मेरे बिरोदिया ते ऊच्चा करेया
ओर अत्याचार करने वाल़ेया लोका ते माखे बचाएया।
इजी बजअ ते, ओ यहोवा, मां जातिया-जातिया रे सामणे तेरा तन्यवाद करना
ओर तेरे नाओं रा पजन गाणा
से आपणे ठराए रे राजे रा बड़ा उद्धार करोआ,
से आपणे अभिषिक्त दाऊद ओर तेसरे कुलो पाँदे युगो-युगो तक दया करदा रणा।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.