2 सेमुएल 17

1तेबे अहीतोपेले अबशालोमो खे बोलेया, “माखे 12,000 मर्द छाँटणे दे ओर मां उठी की आज ई राती दाऊदो रा पीछा करना। 2ओर जेबे से थकेया रा ओर कमजोर ऊणा, तेबे मां से पकड़ी लणा ओर डराणा ओर जितणे लोक तेस साथे ऊणे सेयो सारे नठी जाणे ओर मां राजा ई काणा, 3मां सारे लोक तांगे वापस ली आऊणे; जेस माणूंए खे तूँ टोल़ने लगी रा तेसरे मिलणे ते सारी प्रजा साथे मिलणा ऊई जाणा ओर सारी प्रजा रामो दे रणी।” 4ये गल्ल अबशालोम ओर सारे इस्राएली बुजुर्गा खे ठीक लगी।

हूशै री सलाह

5तेबे अबशालोमे बोलेया, “एरेकी हूशै खे बी बुलाई की ल्याओ ओर जो से बोलोगा आसा से बी सुणना।” 6जेबे हूशै अबशालोमो गे आया, तेबे अबशालोमे तेसखे बोलेया, “अहीतोपेले तो एड़ी गल्ल बोली राखी; क्या आसे तेसरी गल्ल मानिए कि नई? जे नई, तो तूँ बोली दे आसा खे क्या करना चाईयो?” 7हूशै अबशालोमो खे बोलेया, “जो सला अहीतोपेले एस बार देई राखी से ठीक नि ए।” 8तेबे हूशै बोलेया, “तूँ तो आपणे बाओ ओर तेसरे माणूंआ खे जाणेआ कि सेयो शूरवीर ए ओर सेयो तेसा रीछणिया जेड़े गुस्से वाल़े ए जेसा रा बच्चा छीनी लोए। तेरा बाओ योद्धा ए ओर दूजे लोका साथे रात नि बितांदा। 9एस बखते तो से केसी गड्डे, या केसी दूजी जगा दे लूकेया रा ऊणा। जेबे इना बीचा ते पईले ई कोई-कोई काये जाओ, तेबे एतेखे सारे सुणने वाल़ेया बोलणे लगणा, ‘अबशालोमो रे लोक तो आरी गे।’ 10तेबे वीरो रा दिल, जो शेरो जेड़ा ओआ, तेसरा बी औंसला टूटी जाणा, सारा इस्राएल तो जाणोआ कि तेरा बाओ तो वीर माणूं ए ओर तेस साथले बड़े योद्धा ए। 11इजी री खातर मेरी सला ये कि उतर दिशा दे दानो रे इलाके ते लई की दक्खणा दे बेर्शेबा शईरो तक रणे वाल़े सारे इस्राएली तांगे समुद्रो कनारले बालूआ रिया कणियां जेड़े कट्टे करे जाओ ओर तूँ आपू ई युद्धो खे जा। 12ओर जेबे आसा तेसखे केसी ना केसी जगा दे जेती से मिलो जाई की पकड़ी लऊँगे, तेबे जिंयाँ पाल़ा जमीना दे पड़ोआ तिंयाँ ई आसा तेस पाँदे अमला करना, तेबे ना तो से बचणा ओर ना ई तेसरे साथिया बीचा ते कोई बचणा। 13जे से केसी शईरो दे कूसी रा ऊगा, तेबे सारे इस्राएली लोका तेस शईरो गे रस्सिया ली आऊणियां ओर आसा से शईर नाल़े दे खींजणा, एथो तक कि तेसरा कोई छोटा जा पात्थर पनि रणा।” 14तेबे अबशालोम ओर जो तेस साथे इस्राएली मर्द थे तिने बोलेया, “एरेकी हूशै री सला अहीतोपेलो री सला ते ठीक ए।” यहोवे तो अहीपोतेलो री अच्छी सला खे निष्फल करने री ठाणी राखी थी, ताकि से अबशालोमो पाँदे ई मुसीबत पाओ।

हूशै री दाऊदो खे बची की निकल़ने री चतौणी

15तेबे हूशै सादोक ओर एब्यातार पुरोईता खे बोलेया, “अहीतोपेले तो अबशालोम ओर इस्राएली बुजुर्गा खे एड़ी-एड़ी सला दित्ती ओर मैं एड़ी-एड़ी सला देई राखी। 16इजी री खातर एबे फुर्ती करी की दाऊदो गे सन्देशा पेजो कि आज राती जंगल़ो रिया काअटिया रे नि रूकणा, जरूर पार ई ऊई जाया; एड़ा नि ओ कि राजा ओर जितणे लोक तेस साथे ए, सारे नाश ऊई जाओ।” 17योनातान ओर अहीमास एनरोगेलो गे रूके रे रये ओर एक दासी तिना खे जाई की सन्देश देई आओ थी ओर सेयो जाई की राजा दाऊदो खे सन्देश देयो थे, कऊँकि सेयो केसी सामणे शईरो दे नि जाओ थे। 18एकी पाऊए सेयो देखे ओर तिने जाई की अबशालोमो गे बोलेया, पर सेयो दोनो फटाफट चली गे ओर एक बहूरीमो रे रणे वाल़े माणूंए रे कअरे पऊँची की जेसरे आँगणो दे कुआँ था तिदे उतरी गे। 19तेबे तेसरी जवाणसे कपड़ा लई की कुएँ रे मुरे पाँदे बछाया ओर तेते पाँदे दल़ेय्या दा नज्ज फैलाई ता; तेबे केसी खे कुछ पता नि लगेया। 20तेबे अबशालोमो रे सेवक तेस कअरो रे तेसा जवाणसा गे जाई की बोलणे लगे, “अहीमास ओर योनातान केई ए?” तेबे जवाणसे तिना खे बोलेया, “सेयो दोनो तो तेसा छोटिया नदिया ते पार गये।” तेबे तिने सेवके सेयो टोल़े ओर जेबे सेयो मिले नि तेबे यरूशलेम शईरो खे वापस ऊईगे। 21जेबे सेयो चली गे, तेबे पुरोईता रे दोनो पाऊ कुएँ ते निकल़े ओर जाई की दाऊद राजे खे सन्देश दित्तेया; ओर दाऊदो खे बोलेया, “तुसे लोक चलो, छोड़-छोड़ करी की नदिया ते पार ऊई जाओ; कऊँकि अहीतोपेले तुसा रे नुकशाणो री एड़ी-एड़ी सला देई राखी।” 22तेबे दाऊद आपणे सारे साथिया समेत उठी की यरदन नदिया ते पार चली गा ओर प्याग ऊणे तक सेयो सारे के सारे यरदन नदिया ते पार चली गे। 23जेबे अहीतोपेले देखेया कि मेरिया सलाई रे मुताबिक काम नि ऊआ, तेबे तिने आपणे गह्देया पाँदे काठी बानी ओर आपणे शईरो दे जाई की आपणे कअरे गया ओर आपणे परिवारो खे जो-जो आज्ञा देणी थी से देई की आपू खे फाँसी लगाईती ओर से मरी गा ओर से तेसरे बाओ रे कब्रिस्तानो दे दबाईता। 24तेबे दाऊद तो महनैमो रे पऊँची गा। तेबे अबशालोम सारे इस्राएली मर्दा समेत यरदन नदिया ते पार गया। 25तेबे अबशालोमे अमासा खे योआबो रिया जगा पाँदे परदान सेनापति ठराया। ये अमास एक इस्राएली मर्दो रा पाऊ था जेसरा नाओं यित्रो था ओर से योआबो री माये, सरूयाह री बईण, अबीगैल नाओं री नाहाशो री बेटिया रा पाऊ था। 26ओर इस्राएलिये ओर अबशालोमे गिलाद देशो दे डेरे लगाए। 27जेबे दाऊद ओर तेसरे सिपाई महनैम देशो दे आए, तेबे अम्मोनिया रे रब्बा दे रणे वाल़ा नाहाशो रा पाऊ शोबी ओर लोदबार शईरो दे रणे वाल़ा अम्मीएलो रा पाऊ माकीर ओर रोगलीम शईरो दे रणे वाल़ा गिलाद जगा रा बर्जिल्लै था, 28से माँजे, तसले, माट्टिया रे पांडे, कणक, जौ, मैदा, लोबिया, मस्सर, पूजे रे छोले, 29सईत, नऊणीं, पेडा-बाकरिया ओर गायी रे दईंए रा पनीर, दाऊद ओर तेसरे साथिया खे खाणे खे ये सोची की ल्याए, “जंगल़ो दे सेयो लोक पूखे त्याये ओर थके दे ऊणे।”