Baghlayani Bible
2 इतिआस 8
सुलैमानो रे ओर काम
सुलैमानो खे यहोवे रा मन्दर ओर आपणा मईल बनाणे खे बीई साल लगे। तेबे जो शईर सुलैमानो खे हीराम राजे दित्ते थे, सेयो सुलैमाने मजबूत करी की तिना दे इस्राएली लोक बसाए। तेबे सुलैमाने सोबा शईरो रे हमात जगा पाँदे अमला करी की, से जीतेया। तिने तदमोर शईर जो उजाड़ जगा दे ए ओर हमात इलाके रे सारे पण्डारा रे शईर मजबूत कित्ते। तेबे तिने पाँदले बेथोरोन ओर थालले बेथोरोन शईरो दे दवाला ओर दरवाजे लगाई की से मजबूत कित्ते। तिने बालात शईर ओर सुलैमानो रे जितणे पण्डारा रे शईर थे ओर तेसरे रथ ओर सवारा रे जितणे शईर थे ओर जो कुछ सुलैमाने यरूशलेम, लबानोन ओर आपणे राज्य रे सारे देशो दे बनाणा चाया, से सारे बणाये।
हित्ती, एमोरी, परिज्जी, हिब्बी ओर यबूसिया रे बचे रे लोक जो इस्राएलो दे रओ थे, पर सेयो इस्राएली नि थे, तिना रे कुल जो तिना ते बाद देशो दे रई गे ओर जिना रा इस्राएलिये नाश नि कित्तेया था, तिना बीचा ते कई जणे सुलैमाने आपणे देशो देई कामो पाँदे राखे ओर आजो तक तिना री सेई दशा ए। पर इस्राएली लोका बीचा ते सुलैमाने आपणे कामो खे कोई बी दास नि बणाया, सेयो तो योद्धा ओर तेसरे परदान, तेसरे सरदार ओर तेसरे रथ ओर सवारा रे परदान बणे। सुलैमानो रे सरदारा रे परदान जो प्रजा रे लोका पाँदे राज करने वाल़े थे, सेयो 250 परदान थे।
तेबे सुलैमान फिरौनो री बेटिया खे दाऊदो रे शईरो ते तेते मईलो दे ली आया जो तिने तेसा खे बणवाया था, कऊँकि तिने बोलेया, “जेते-जेते जगा दे यहोवे रा सन्दूक आई रा, से पवित्र ए, इजी री खातर मेरी राणी इस्राएलो रे राजा दाऊदो रे मईलो दे नि रणी।” तेबे सुलैमानो रे काम करने वाल़ेया यहोवे री तेसा बेदिया पाँदे जो तिने बरांडे ते आगे बणाई थी, यहोवे खे होमबलि चढ़ाई। से मूसे री आज्ञा ओर हर रोजके नियमो रे मुताबिक, मतलब राम ओर नवां चाँद ओर हर साल तीन बार ठराए रे त्यार, मतलब बिना सजेड़े री रोटिया रे त्यार, अफ्तेया रे त्यार ओर चूँगड़िया रे त्योआरो दे बलि चढ़ाया करो था। तिने आपणे बाओ रे नियमो रे मुताबिक पुरोईता री सेवकाईया खे तिना रे दल ठराए ओर लेवी तिना रे कामो खे ठराए, ताकि हर एकी दिनो रे कामो रे मुताबिक सेयो यहोवे री स्तुति ओर पुरोईता सामणे सेवा-टईल करेया करो ओर एक-एक बड़े द्वारो गे द्वारपाल दल-दल करी की ठराईते; कऊँकि परमेशरो रे भग्त दाऊदे एड़ी आज्ञा दित्ती थी। राजे रे पण्डार या केसी ओर गल्ला रे बारे रे पुरोईता ओर लेविया खे जो-जो आज्ञा दित्ती थी, तिने से नि टाल़ी।
सुलैमानो रा सारा काम जो तिने यहोवे रे मन्दरो री निऊँआ बनाणे ते लई की तिजी खे पूरा करने तक कित्तेया से ठीक ऊआ। ईंयाँ यहोवे रे मन्दरो खे बनाणे रा काम पूरा ऊआ। तेबे सुलैमान एस्योनगेबेर ओर एलोत शईरो खे गया, जो एदोम देशो रे समुद्रो रे कनारे ए। हीरामे तेसगे आपणे जाह्जिया रे जरीये जाह्ज ओर समुद्रो रे जाणकार मल्लाह पेजी ते ओर तिने सुलैमानो रे जाह्जिया साथे ओपीर जगा दे जाई की तेथा ते लगभग 15,000 किलो सूईना सुलैमान राजे खे दित्तेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.