Baghlayani Bible
2 इतिआस 28
यहूदा दे आहाजो रा राज्य
जेबे आहाज राजा यहूदा पाँदे राज करने लगेया, तेबे से बीई साला रा था ओर सोल़ा साला तक यरूशलेम शईरो रे राज करदा रया। ओर आपणे मूलमर्द दाऊदो जेड़ा खरा काम नि कित्तेया, जो यहोवे री नजरा रे ठीक था, पर तिने इस्राएलो रे राजेया जेड़े बुरे काम कित्ते ओर बाल देवतेया रिया मूर्तिया कअड़ी की बणवाईया जिना ते यहोवा नफरत करो था, ओर हिन्नोमो रे पाऊए री काअटिया दे तूप बाल़ेया ओर तिना जातिया रे बुरे कामो रे मुताबिक, जो यहोवे इस्राएली लोका रे सामणे ते देशो ते बारे निकयाल़े थे, आपणे बच्चे आगी दे बलि करीते। ऊच्ची जगा पाँदे ओर पाह्ड़िया पाँदे ओर सबी अरे डाल़ा रे थाले से बलि चढ़ाओ था ओर तूप बाल़ेया करो था।
यहूदा पाँदे अमला
आहाजे पाप कित्तेया, इजी बजा ते तेसरे यहोवा परमेशरे से अरामिया रे राजेया रे आथो दे करी ता ओर सेयो तेसखे जीती की, तेसरे बऊत सारे लोका खे बन्दी बणाई की दमिश्को खे लईगे। ओर से इस्राएली लोका रे राजेया रे वशो रे करी ता, जिने से बड़ी बुरी तरअ ते काया। रमल्याह रे पाऊ पेकहे, यहूदा दे एक ई दिने 120,000 लोका खे जो सारे के सारे वीर थे, काये, कऊँकि तिने आपणे पितरा रा यहोवा परमेशर छाडीता था। जिक्री नाओं रे एक एप्रैमी वीरे मासेयाह नाओं रा एक राजकुमार ओर राजमईलो रा परदान अज्रीकाम ओर एलकाना खे, जो राजे रा मंत्री था, काईता।
नबी ओदेद
इस्राएली आपणे पाईया बीचा ते जवाणसा ओर माठे-बेटिया खे मिलाई की 200,000 लोका खे बन्दी बणाई की ओर तिना री बऊत सारी लूट लई की सामरिया रिया तरफा खे लईगे। पर तेती ओदेद नाओं रा यहोवे रा एक नबी था; से सामरिया शईरो खे आऊणे वाल़ी सेना साथे मिली की बोलणे लगेया, “सुणो, तुसा रे पितरा रे यहोवा परमेशरे यहूदिया ते गुस्से ऊई की सेयो तुसा रे वशो दे करी राखे ओर तुसे तिना खे एड़ा गुस्सा करी की सेयो एड़े कायल कित्ते कि जिना रा चींगणा स्वर्गो दे पऊँची गा। एबे तुसे ठाणी ला रा कि यहूदिया खे ओर यरूशलेम शईरो दे रणे वाल़ेया खे आपणा दास बणाई की तिना खे दबाई की राखो। क्या तुसे बी आपणे परमेशर यहोवे सामणे दोषी नि ए? इजी री खातर एबे मेरी सुणो ओर इना बन्दिया खे जिना खे तुसे आपणे पाईया बीचा ते बन्दी बणाई की ली आई रे, वापस करी देयो, नई तो यहोवा बऊत रोषे ऊणा ओर तेस तुसा खे सजा देणी।” तेबे एप्रैमिया रे कुछ खास मर्द, मतलब योहानानो रा पाऊ अजर्याह, मशिल्लेमोतो रा पाऊ बेरेक्याह, शल्लूमो रा पाऊ यहिजकिय्याह ओर हदलै रा पाऊ अमासा, लड़ाईया ते आऊणे वाल़ेया रा सामणा करी की तिना खे बोलणे लगे, “तुसे इना बन्दिया खे एती नि ल्याओ, कऊँकि तुसे ये गल्ल ठाणी राखी, जेते कि आसे यहोवे सामणे दोषी ऊई जाणे ओर जेते कि म्हारा पाप ओर दोष बढ़ी जाणा, म्हारा दोष तो बड़ा ए ओर इस्राएलो पाँदे बऊत बड़ा गुस्सा पड़की रा।” तेबे तिने सिपाईए बन्दी ओर लूट परदाना ओर सारी सभा सामणे छाडी ती। तेबे जिना मर्दा रे नाओं ऊबे लिखी राखे तिने उठी की बन्दी लई ले ओर लूटा बीचा ते सबी नांगे लोका खे टाल्ले ओर जोड़े पन्याए ओर रोटी खुल़ाई ओर पाणी पल़्याया ओर तेल मल़ेया ओर तेबे कमजोर लोक गह्देया पाँदे चढ़ाई की यरीहो खे, जेतेखे खजूरो रा शईर बोलोए, तिना रे पाईया गे पऊँचाई ते। तेबे सेयो सामरिया खे वापस आए।
राजा आहाजो रा अश्शूरो रे राजे ते मताद मांगणा
तेस बखते आहाज राजे अश्शूरो रे राजेया गे दूत पेजी की मताद मांगी। कऊँकि एदोमिये यहूदा दे आई की तेस पाँदे हमला कित्तेया ओर बन्दिया खे लईगे थे। तेबे पलिश्तिये थालले देश ओर यहूदा रे दक्खण देशो रे शईरा पाँदे चढ़ाई करी की, बेतशेमेश शईर, अय्यालोन ओर गदेरोत शईरो खे ओर आपणे-आपणे गाँवो समेत सोको, तिम्नाह ओर गिमजो खे लई ला ओर तिना रे रणे लगे। ईंयाँ यहोवे इस्राएलो रे राजा आहाजो रिया बजा ते यहूदा खे सजा दित्ती, कऊँकि तिने यहोवे री आज्ञा नि मानी। तेबे अश्शूरो रा राजा तिग्लत्पिलेसेर यहूदा दे आया, ओर तिने मताद करने रे बदले मोके रा फाईदा चकी की तेसखे कष्ट दित्तेया। आहाजे तो यहोवे रे मन्दर ओर राजमईल ओर परदाना रे कअरो ते तअन निकयाल़ी की अश्शूरो रे राजे खे दित्तेया, पर इजी ते तेसरी कोई मताद नि ऊई।
आहाजो रे पाप ओर तेसरी मौत
क्ल़ेशो रे बखते आहाज राजे यहोवे साथे ओर बी विश्वासघात कित्तेया। तिने दमिश्को रे देवतेया खे, जिने से काया था, बलि चढ़ाया, कऊँकि तिने ये सोचेया कि अरामी राजेया रे देवते तिना री मताद कित्ती, तो मां तिना खे बलि चढ़ाणे, ताकि सेयो मेरी मताद करो। पर सेयो बलि तेसरे ओर सारे इस्राएलो रे नाशो री बजा ऊए। तेबे आहाज राजे परमेशरो रे मन्दरो रे पांडे कट्ठे करी की तुड़वाए ओर यहोवे रे मन्दरो रे द्वार बन्द करीते ओर यरूशलेम शईरो रे सबी कूणेया रे बेदिया बणाईया। यहूदा रे एकी-एकी शईरो दे तिने पराये देवतेया खे तूप बाल़ने खे ऊच्चिया जगा बणाईया ओर आपणे पितरा रे परमेशर यहोवे खे रोष चढ़ाया। तेसरे ओर काम ओर शुरूओ ते लई की अन्तो तक तेसरा पूरे चाल-चलणो रे बारे रे यहूदा ओर इस्राएलो रे राजेया रे इतियासो री कताबा रे लिखी राखेया। अन्तो दे आहाज राजा मरीगा ओर से यरूशलेम शईरो दे दबाईता, पर से इस्राएलो रे राजेया रे कब्रिस्तानो दे नि दबाया। तेबे तेसरा पाऊ हिजकिय्याह तेसरी जगा पाँदे नवां राजा बणेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.