Baghlayani Bible
2 इतिआस 26
यहूदा दे उज्जियाह रा राज्य
तेबे यहूदा प्रदेशो री सारी प्रजे उज्जियाह खे लई की जो सोल़ा साला रा था, तेसरे बाओ अमस्याह री जगा दे नवां राजा बणाया। जेबे राजा अमस्याह मरीगा, तेबे उज्जियाहे एलोत शईर दुबारा बणाई की यहूदा दे फेर मलाई ता। जेबे उज्जियाह राज करने लगेया, तेबे से सोल़ा साला रा था ओर यरूशलेम शईरो रे बूँजा साला तक राज करदा रया। तेसरी माया रा नाओं यकोल्याह था, जो यरूशलेम शईरो री थी। जेड़ा तेसरा बाओ अमस्याह करेया करो था तेड़ा ई तिने बी कित्तेया जो यहोवे री नजरा रे ठीक था। जकर्याह पुरोईतो रे दिना रे जो परमेशरो रे दर्शणो रे बारे रे समज राखो था; से परमेशरो री टोल़ा रे लगेया रा रओ था ओर जदुओ तक से यहोवे री टोल़ा रे लगेया रा रया, तदुओ तक परमेशरे तेसखे सफलता दित्ती।
उज्जियाहो रे काम
तेबे तिने जाई की पलिश्तिया साथे युद्ध कित्तेया ओर गत, यब्ने ओर अशदोदो री दवाला रूड़ाई तिया ओर अशदोदो रे नेड़े-तेड़े ओर पलिश्तिया बीचे शईर बसाए। परमेशरे पलिश्ती ओर गूर्बाला रे रणे वाल़े, अरबी ओर मूनिया रे खलाफ तेसरी मताद कित्ती। तेबे अम्मोनी उज्जियाह राजे खे पेंट देणे लगे, बल्कि तेसरी कीर्ति मिस्रो रे बन्ने तक बी फैली गी, कऊँकि से बऊत तागतबर ऊईगा था। फेर उज्जियाहे यरूशलेम शईरो रे कूणे रे बड़े द्वार ओर तराईया रे बड़े द्वार ओर दवाला रे मोड़ो पाँदे गुम्मट बणाई की मजबूत कित्ते। तेसगे बऊत डांगर थे इजी री खातर तिने उजाड़ जगा दे ओर थालली जगा ओर चौरस जगा रे गुम्मट बणवाए ओर बऊत सारे अऊद खणाए ओर पाह्ड़ो पाँदे ओर कर्मेलो रे पाह्ड़ो दे तेसरे जिम्मीदार ओर अंगूरा रे बगीचेया रे माली थे, कऊँकि तेसखे जिम्मीदारा पसंद था। तेबे उज्जियाह रे योद्धा री एक सेना थी जिना री गिणती यीएल मुंशी ओर मासेयाह सरदार, हनन्याह नाओं रे राजे रे एक परदानो री आज्ञा ते करो थे ओर तेसरे मुताबिक सेयो दल बानी की लड़ने खे जाओ थे। पितरा रे कराने रे खास-खास मर्द जो शूरवीर थे, तिना री पूरी गिणती 2,600 थी। तिना रे कब्जे दे 307,500 सिपाईया री एक बड़ी सेना थी, जो दुश्मणा रे खलाफ राजे री मताद करने खे बड़ी तागती साथे युद्ध करने वाल़े थे। इना खे, मतलब पूरी सेना खे उज्जियाहे ढाला, बड़छे, टोप, कवच, तीरक-बाण ओर गूलेला रे पात्थर त्यार कित्ते। तेबे तिने यरूशलेम शईरो रे गुम्मटो री चूँडिया पाँदे राखणे खे उशयार मर्दा रे निकयाल़े रे यन्त्र बी बणवाए जिना रे जरीये तीर ओर बड़े-बड़े पात्थर सेटे जाओ थे। तेसरा नाओं दूरो-दूरो तक फैलीगा, कऊँकि तेसखे अद्भुत मताद एथो तक मिली कि से तागतबर ऊईगा।
राजा उज्जियाहो रा कमण्ड ओर तेसरी सजा
पर जेबे से तागतबर ऊईगा, तेबे से बऊत कमण्डी ऊईगा ओर तिने बिगड़ी की आपणे परमेशर यहोवे साथे विश्वासघात कित्तेया, मतलब से तूपो री बेदिया पाँदे तूप बाल़ने खे परमेशरो रे मन्दरो रे कूसी गा। पर अजर्याह पुरोईत तेसते बाद पीतरे गया ओर तेस साथे यहोवे रे अस्सी पुरोईत बी जो वीर थे गये। तिने उज्जियाह राजे रा सामणा करी की तेसखे बोलेया, “ओ उजिय्याह, यहोवे खे तूप बाल़ना तेरा काम नि ए, हारूणो री ल्वाद, मतलब तिना पुरोईता रा ई काम ए, जो तूप बाल़ने खे पवित्र करी राखे। तूँ पवित्र जगा ते निकल़ी जा, तैं विश्वासघात करी राखेया, परमेशर यहोवे रिया तरफा ते ये तेरी महिमा री बजा नि ऊणी।” तेबे उज्जियाह तूप बाल़ने खे तूपदान आथो रे लई की रोषे ऊआ ओर से पुरोईता पाँदे रोषे ऊणे लगी रा था कि पुरोईता सामणे-सामणे यहोवे रे मन्दरो रे तूपो री बेदिया गेई तेसरे माथे पाँदे कोढ़ निकल़ेया। अजर्याह बड़े पुरोईते ओर सबी पुरोईते से देखेया, तेबे तिने क्या देखेया कि तेसरे माथे पाँदे कोढ़ निकल़ी रा। तेबे तिने से तेथा ते फटाफट निकयाल़ी ता, बल्कि ये जाणी की कि परमेशरे आऊँ कोढ़ी करी ता रा, तिने आपू बारे जाणे री जल्दबाजी कित्ती। उज्जियाह राजा मरने रे दिनो तक कोढ़ी रया ओर कोढ़ो रिया बजा ते एक लग कअरो रे रओ था, से तो यहोवे रे मन्दरो रे नि जाई सको था। ओर तेसरा पाऊ योताम राजकराने रे कामो पाँदे नियुक्त कित्तेया ओर से लोका रा न्याय बी करो था। शुरूओ ते लई की अन्तो तक उज्जियाह रे ओर कामा रा वर्णन तो आमोसो रे पाऊ यशायाह नबीए लिखी राखेया। अन्तो रे उज्जियाह मरी की आपणे बुजुर्गा साथे मिलीगा ओर तेसखे तेसरे बुजुर्गा रे नेड़े राजेया खे माट्टी देणे रे डोरूए रे माट्टी दित्ती, कऊँकि तिने बोलेया, “से कोढ़ी ए।” तेबे तेसरा पाऊ योताम तेसरी जगा पाँदे राज करने लगेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.