2 इतिआस 20

दुश्मणा साथे युद्ध

1इजी ते बाद मोआबिये ओर अम्मोनिये ओर तिना साथे एदोमो रे मुनि जगा रे कुछ सिपाई युद्ध करने खे राजा यहोशापातो पाँदे अमला करने खे आए। 2तेबे कुछ लोके आई की यहोशापातो गे दशेया, “समुद्रो ते पार एदोम देशो री एक बड़ी सेना तुसा पाँदे अमला करने खे आऊणे वाल़ी ए। ओर देखो, से हसासोन्तामार शईरो तक जेते खे एनगदी बी बोलोए आईगी दी ए।” 3तेबे यहोशापात डरीगा ओर यहोवे री टोल़ा रे लगी गा ओर पूरे यहूदा दे बअरतो रा प्रचार करवाया। 4तेबे यहूदी यहोवे ते मताद माँगणे खे कट्ठे ऊए, बल्कि सेयो यहूदा रे सबी शईरो ते यहोवे साथे मिलणे खे आए।

यहोशापातो री प्रार्थना

5तेबे यहोशापात यहोवा रे मन्दरो रे नये आँगणो सामणे यहूदी ओर यरूशलेम शईरो रे लोका सामणे खड़े ऊई की 6ये बोलणे लगेया, “ओ म्हारे पितरा रे यहोवा परमेशर! क्या तूँ स्वर्गो दे परमेशर नि ए? क्या तूँ जातिया-जातिया रे सबी राज्या पाँदे राज नि करदा? ओर क्या तेरे आथो रे एड़ी तागत ओर पराक्रम नि ए कि तेरा सामणा कोई नि करी सकदा?” 7ओ म्हारे परमेशर! क्या तैं एस देशो रे रणे वाल़ेया खे आपणी प्रजा इस्राएलो रे सामणे ते निकयाल़ी की यो आपणे दोस्त अब्राहमो रे कुलो खे सदा खे नि देई ते? 8सेयो इदे बसी गे ओर इदे तेरे नाओं री एक पवित्र जगा बणाई कि बोलेया, 9“जे तलवार या मरी या अकाल़ या कोई मुसीबत आसा पाँदे पड़ो, तेबे बी आसे एस मन्दरो सामणे ओर तां सामणे (तेरा नाओं तो एते मन्दरो रे बसी रा) खड़े ऊई की, आपणे क्ल़ेशो रिया बजा ते तेरी दुहाई देऊँगे ओर तां सुणी की आसे बचाणे। 10ओर एबे अम्मोनी ओर मोआबी ओर सेईरो1 रे पाह्ड़ी देशो रे लोक जिना पाँदे तैं इस्राएलो खे मिस्र देशो ते आऊँदे बखते अमला करने नि दित्तेया था ओर सेयो तिना री तरफा ते मुड़ी गे ओर सेयो नाश नि कित्ते, 11देख, सेयो ई लोक तेरे दित्ते रे अक्को रे एस देशो बीचा ते जेतेरा अक्क तैं आसा खे देई राखेया, आसा खे निकयाल़ी की केड़ा बदला देणे लगी रे। 12ओ म्हारे परमेशर, क्या तां तिना रा न्याय नि करना? ये जो बड़ी पीड़ आसा पाँदे अमला करने खे आऊणे लगी री, तेसा सामणे म्हारा जोर नि चलदा ओर आसा खे कुछ समजा दे नि आऊँदा कि क्या करना चाईयो? पर म्हारिया आखी तेरिया तरफा खे लगी रिया।”

परमेशरो रा ज्वाब

13तेबे सब यहूदी आपणे-आपणे बाल-बच्चे, जवाणसा ओर पाऊआ समेत यहोवे रे सामणे खड़े रये। 14तेबे आसापो रे कुलो बीचा ते यहजीएल नाओं रा एक लेवी जो जकर्याह रा पाऊ ओर बनायाह रा पोता ओर मत्तन्याह रे पाऊ यीएलो रा पड़पोता था, तेसदे मण्डल़िया बीचे यहोवे रा आत्मा समाया। 15तेबे से बोलणे लगेया, “ओ सब यहूदियो, ओ यरूशलेम शईरो रे रणे वाल़ेयो, ओ राजा यहोशापात, तुसे सब त्यान देयो, यहोवा तुसा खे ईंयाँ बोलोआ कि तुसे ना तो एसा बड़ी पीड़ा ते डरो ओर ना कबराओ, कऊँकि युद्ध तुसा रा नि, परमेशरो राए। 16काल तिना रा सामणा करने खे जाणा, देखो सेयो सीसो रिया क्वाल़िया तक आईगे दे ए ओर यरूएल नाओं रे रेगिस्तानो रे नाल़े रे कनारे तुसा खे मिलणे। 17एसा लड़ाईया दे तुसा खे लड़ना नि पड़ना, ओ यहूदा ओर ओ यरूशलेम, रूके दे रणा ओर खड़े ऊई की यहोवे रिया तरफा ते आपणा छुटकारा देखणा, डरो नि ओर तुसा रा मन कच्चा नि ओ, काल तेसरा सामणा करने खे चलणा ओर यहोवा तुसा साथे रणा।” 18तेबे यहोशापात जमीना री तरफा खे मूँ करी की चुकेया ओर सबी यहूदिये ओर यरूशलेम शईरो रे रणे वाल़ेया लोके यहोवे रे सामणे थाले पड़ी की माथा टेकेया। 19कहाती ओर कोरहिया बीचा ते कुछ लेवी माणूं खड़े ऊई की इस्राएलो रे परमेशर यहोवे री स्तुति बऊत जोरे की करने लगे।

जीत ओर लूट

20तेबे सेयो प्यागा उठी की तकोआ री उजाड़ जगा रिया तरफा खे निकल़ी गे ओर चलदे बखते यहोशापाते खड़े ऊई की बोलेया, “ओ यहूदियो, ओ यरूशलेम शईरो रे रणे वाल़ेयो, मेरी सुणो, आपणे परमेशर यहोवे पाँदे परोसा राखो, तेबे तुसे टिके रे रणे, तेसरे नबिया पाँदे परोसा करो, तेबे तुसे सफल ऊई जाणे।”

21तेबे तिने प्रजा साथे सलाह् करी की कई जणे ठराए, जो कि पवित्रता साथे सिपाईया ते आगे-आगे चलदे ऊए यहोवे रे गीत गाओ ओर ये बोलदे ऊए तेसरी स्तुति करो, “यहोवे रा तन्यवाद करो, कऊँकि तेसरी दया सदा री ए।” 22जेस बखते सेयो गायी की स्तुति करने लगे, तेस ई बखते यहोवे अम्मोनी, मोआबी ओर सेईरो रे पाह्ड़ी देशो रे लोका पाँदे जो यहूदा रे खलाफ आऊणे लगी रे थे, काणे वाल़े बठयाल़ी ते ओर सेयो काई ते। 23कऊँकि अम्मोनिये ओर मोआबिये सेईरो रे पाह्ड़ी देशो रे रणे वाल़ेया खे डराणे ओर नाश करने खे तिना पाँदे अमला कित्तेया ओर जेबे सेयो तिना रा अन्त करी चुके, तेबे सेयो आपू बीचे सब एकी-दूजे खे नाश करने लगे। 24जेबे यहूदा रे सिपाई उजाड़ जगा री चौकिया पाँदे पऊँची की तेसा पीड़ा खे देखेया, तेबे क्या देखेया कि सेयो जमीना दे मरे दे पड़ी रे ओर कोई नि बचेया।

25तेबे यहोशापात ओर तेसरी प्रजा लूट लणे खे गये ओर लाशा बीचे बऊत सारी सम्पत्ति ओर अच्छे गईणे मिले, तिने इतणे गईणे उतारी ले कि तिना खे नि लई जाई सके, बल्कि लूट इतणी मिली कि कट्ठे करदे-करदे तीन दिन लगी गे। 26चौथे दिने सेयो बराका नाओं री तराईया दे कट्ठे ऊए ओर तेती यहोवे रा तन्यवाद कित्तेया, इजी बजा ते तेसा जगा रा नाओं बराका री तराई पड़ेया, जो आजो तक ए। 27तेबे सेयो, मतलब यहूदा ओर यरूशलेम शईरो रे सारे लोक ओर तिना ते आगे-आगे यहोशापात, खुशिया साथे यरूशलेम शईरो खे वापस ऊए, कऊँकि यहोवे सेयो दुश्मणा पाँदे खुश कित्ते थे। 28तेबे सेयो सारंगिया, बीणा ओर तुरहिया बजांदे ऊए यरूशलेम शईरो दे यहोवे रे मन्दरो दे आए। 29ओर जेबे देशो-देशो रे सबी राज्य रे लोके सुणेया कि इस्राएलो रे दुश्मणा साथे परमेशर लड़ेया, तेबे तिना रे मनो रे परमेशरो रा डर समाई गा। 30ईंयाँ यहोशापातो रे राज्य खे चैन मिलेया, कऊँकि तेसरे परमेशरे तेसखे चऊँ कनारा ते राम दित्तेया।

यहोशापातो रे राजो रा खत्म ऊणा ओर तेसरा मरना

31ईंयाँ यहोशापाते यहूदा पाँदे राज कित्तेया। जेबे से राज करने लगेया तेबे से पैंती साला रा था ओर पच्ची साला तक यरूशलेम शईरो रे राज करदा रया। ओर तेसरी माया रा नाओं अजूबा था, जो शिल्ही री बेटी थी। 32से आपणे बाओ आसा री चाला पाँदे चलेया ओर तिजी ते नि मुड़ेया, मतलब जो यहोवे री नजरा रे ठीक था, से सेई करदा रया। 33तेबे बी ऊच्ची जगा टाल़िया नि, बल्कि एबुए तक प्रजा रे लोके आपणा मन परमेशरो री तरफा खे नि लगाया था। 34शुरूओ ते लई की अन्तो तक यहोशापातो रे ओर काम, हनानीए रे पाऊ येहू भविष्यवक्ता रे बारे दे तेसा इतिआसो री कताबा दे लिखी राखे, जो इस्राएलो रे राजेया रे इतिआसो दे मिलोआ।

35इजी ते बाद यहूदा रे राजे यहोशापाते इस्राएलो रे राजा अहज्याह साथे जो तेसते बड़ी जल़न करो था, मेल कित्तेया। 36मतलब तिने तेस साथे इजी खे मेल कित्तेया कि तर्शीश जाणे खे जाह्ज बणवाओ ओर तिने एड़े जाह्ज एस्योनगेबेरो दे बणवाए। 37तेबे दोदावाह रे पाऊ मारेश शईरो दे रणे वाल़े एलीआजारे यहोशापातो रे खलाफ ये भविष्यबाणी कित्ती, “तैं जो अहज्याह साथे मेल कित्तेया, इजी बजा ते यहोवे तेरी बणाई रिया चीजा तोड़ी देणियां।” तेबे जाह्ज टूटी गे ओर तर्शीशो खे नि जाई सके।