Baghlayani Bible
1 सेमुएल 5
पलिश्ती ओर वादे रा सन्दूक
पलिश्ती सिपाईए यहोवे रे वादे रा सन्दूक छीनी की एबेनेजेर जगा ते अशदोद जगा दे लईगे। तेबे पलिश्ती लोक यहोवे रे वादे रा सन्दूक चकी की दागोन देवते रे मन्दरो दे पऊँचाई की दागोनो रिया मूर्तिया रे नेड़े राखी ता। दूजे दिने अशदोदो रे लोके प्यागा उठी की देखेया कि दागोन देवते री मूर्ति यहोवे रे वादे रे सन्दूको सामणे मुंए रे पाअरे पड़ी री। तेबे तिने दागोन देवते री मूर्ति चकी की तेसरिया ई जगा दे फेर खड़ी करिती। फेर आगले दिने जेबे सेयो प्यागा उठे, तेबे क्या देखेया कि दागोन देवते री मूर्ति यहोवे रे वादे रे सन्दूको सामणे मुंए रे पाअरे पड़ी री ओर दागोन देवते रा सिर ओर दोनो आथ देऊल़ी पाँदे बाडे दे पड़ी रे, ईंयाँ दागोन देवते रा बस तड़ ई रयी गा था। इजी बजा ते आजके दिनो तक बी पुजारी ओर जितणे लोक दागोन देवते रे मन्दरो दे जाओए, सेयो अशदोदो दे दागोन देवते रिया देऊल़ी पाँदे पैर नि राखदे।
तेबे यहोवे अशदोद ओर तिना रे नेड़े रणे वाल़ेया लोका खे बऊत पारी सजा दित्ती ओर तिने तिना लोका रे गिलटिया निकयाल़ी तिया। एड़ा आल देखी की अशदोदो रे लोके बोलेया, “इस्राएलो रे देवते रा सन्दूक आसा बीचे नि रयी सकदा, कऊँकि तेसरा गुस्सा आसा पाँदे ओर म्हारे देवता दागोनो पाँदे बुरिया तरआ ते पड़की रा।” तेबे तिने पलिश्तिया रे सारे सरदार बुलवाए ओर तिना ते पूछेया, “आसे इस्राएलो रे देवते रे सन्दूको साथे क्या करिए?” तिने बोलेया, “इस्राएलो रे देवते रा सन्दूक कुमायी की गत शईरो दे पऊँचाई देयो।” तेबे सेयो इस्राएलो रे देवते रा सन्दूक गत शईरो खे लई चले। जेबे सेयो इस्राएलो रे देवते रे सन्दूको खे लई की गत शईरो दे पऊँचे, तेबे एड़ा ऊआ कि यहोवे तेस शईरो रे लोका रे खलाफ मुसीबत पेजी। तेबे सेयो लोक बऊत डरीगे ओर यहोवे तेस शईरो रे सबी लोका खे दु:ख दित्तेया ओर जवाना ते लई की स्याणेया तक सबी रे शरीरो दे गिलटिया निकल़ने लगिया। तेबे तिने यहोवे रा सन्दूक एक्रोन शईरो दे पेजेया ओर जिंयाँ ई यहोवे रा सन्दूक एक्रोन शईरो दे पऊँचेया तिंयाँ ई एक्रोन शईरो रे लोक ये बोली की चींगणे लगे, “इस्राएलो रे देवते रा सन्दूक इजी खे आसा गे पऊँचाया, ताकि आसा खे ओर म्हारे लोका खे मरवाओ!” तेबे तिने पलिश्तिया रे सारे सरदार कट्ठे कित्ते ओर तिना खे बोलेया, “इस्राएलो रे देवते रा सन्दूक एथा ते बारे लई जाओ, ताकि से आपणिया जगा दे वापस ऊई जाओ, ताकि आसे ओर म्हारे लोक मरने ते बची जाओ।” कऊँकि तेस शईरो दे यहोवे रिया तरफा ते पारी मुसीबत पड़ने लगी री थी। जो माणूं नि मरे सेयो बी गिलटिया रिया बजा ते बमार पड़ी रे थे ओर एक्रोन शईरो रे लोक आपणे देवतेया ते मतादा रिया तँईं चींगणे लगे।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.