Baghlayani Bible
1 सेमुएल 3
यहोवे रा सेमुएलो साथे गल्ला करना
बाल़क सेमुएल एली पुरोईतो साथे मिली की यहोवे री सेवा करेया करो था। तिना दिना दे यहोवे री बाणी मुश्किला ते सुणो थी ओर दर्शण बी कम ई मिलो था। एकी राती एली पुरोईत, जो लगभग अन्दा ई ऊईगा दा था जाईकी आपणे बिस्तरे पाँदे लेटेया, ओर यहोवे री पवित्र जगा रा दिऊआ एबुए तक जल़ेया रा ई था ओर सेमुएल यहोवा रे मन्दरो दे जेती यहोवे रा सन्दूक था लेटी रा था, तेबे यहोवे सेमुएलो खे आक पाई, ओ सेमुएल! ओर सेमुएले ज्वाब दित्तेया, “हाँजी, क्या बोलोए?” तेबे से उठेया ओर एली पुरोईतो गे दौड़ी की गया ओर बोलेया, “आऊँ एती आ? क्या तुसे आऊँ बुलाई राखेया?” तिने ज्वाब दित्तेया, “मैं नि बुलाया जा ओर लेटी जा।” तेबे से जाई की लेटीगा। तेबे यहोवे फेर आक पाई की बोलेया, “ओ सेमुएल”! सेमुएल उठी की एलीए गे गया ओर बोलेया, “आऊँ एती आ, क्या तुसे आऊँ बुलाया?” एलीए बोलेया, “ओ मेरे पाऊ, मैं नि बुलाई राखेया। जा ओर लेटी जा।” सेमुएल एबुए तँईं खे यहोवे खे नि पछयाणो था कऊँकि इजी ते पईले यहोवे कदी बी तेसते गल्ला नि कित्तिया थिया। तेबे तीजी बार फेर यहोवे सेमुएलो खे आक पाई ओर से उठी की एलीए गे गया ओर बोलेया, “आऊँ एती आ, क्या तुसे आऊँ बुलाई राखेया?” तेबे एली समजी गा कि एस बाल़को खे यहोवा बुलाणे लगी रा। इजी री खातर एलीए सेमुएलो खे बोलेया, “जा लेटी जा ओर जे ताखे से फेर आका पाओ तो तैं बोलणा कि ओ यहोवा, बोलो, कऊँकि तुसा रा दास सुणने लगी रा।” तेबे सेमुएल जाई की आपणी जगा दे लेटीगा। तेबे यहोवा आई की खड़ा ऊआ ओर पईलके जेड़ी आक पाई, “सेमुएल! सेमुएल!” सेमुएले बोलेया, “हाँजी बोलो, तेरा दास सुणने लगी रा।” यहोवे सेमुएलो खे बोलेया, “सुण, आऊँ इस्राएलो रे लोका रे खलाफ एक एड़ा काम करने वाल़ा ए, जेतेरे बारे दे सब सुणने वाल़े डरो रे मारे सून ऊई जाणे। तेस दिने मां से सब पूरा करना जो चतौणी मैं एलीए रे कराने रे खलाफ देई राखी ओर से पक्का पूरा ऊणा। कऊँकि आऊँ एलीए खे ये बोली की चतौणी देई चूकी रा कि मां तेस पापो रा दण्ड देई की जेतेखे से जाणोआ सदा खे तेसरे कअरो रा न्याय करना, कऊँकि एलीए रे पाऊए मेरे खलाफ पाप करी राखेया पर तिने सेयो नि रोके। इजी बजा ते मैं एलीए रे कराने रे बारे दे ये कसम खाई कि एलीए रे कराने रे पापो रा प्राश्चित ना तो मेलबलिया ते कदी ऊणा ओर ना नज्जो री बलिया ते।” तेबे सेमुएल प्यागा तक लेटेया दा रया ओर प्यागा उठी की यहोवे रे कअरो रे दरवाजे खोले ओर सेमुएल एलीए खे तेस दर्शणो रिया गल्ला बताणे ते डरेया। तेबे एलीए सेमुएलो खे आक पाई की बोलेया, “ओ मेरे पाऊ, सेमुएल!” तिने ज्वाब दित्तेया, “आऊँ एती आ।” तेबे एलीए पूछेया, “यहोवे तांगे क्या बोलेया? मांगे बी बता। पर जो कुछ तिने तांगे बोलेया, जे तेते बीचा ते तूँ कुछ बी मांते लकोए, तो यहोवा ताखे सख्त सजा देओ।” तेबे सेमुएले तेसखे सब गल्ला सुणाईया ओर कुछ नि लकोया। तेबे एलीए ज्वाब दित्तेया, “से तो यहोवा ए, जो कुछ तेसखे ठीक लगो से सेई करो।”
जेबे सेमुएल बड़ा ऊँआ तो यहोवा तेस साथे रया ओर जो बी सेमुएल बोलो था से सब पूरा ओ था। तेबे सब इस्राएली लोक जो उतर दिशा दे दानो रे इलाके ते लई की दक्खणा दे बेर्शेबा शईरो तक रओ थे तिने सबी जाणी ला कि सेमुएल यहोवे रा नबी ऊणे खे बुलाई राखेया। तेबे यहोवा शीलो शईरो दे दर्शण देंदा रया, कऊँकि यहोवा आपणे वचनो रिया बजा ते शीलो शईरो दे सेमुएलो पाँदे प्रगट ऊँदा रया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.