Baghlayani Bible
1 इतिआस 5
रूबेनो रे खानदान
इस्राएलो रा जेठा पाऊ रूबेन था, पर तिने आपणे बाओ री लाड़िया साथे गन्दा काम कित्तेया ओर अशुद्ध ऊईगा, इजी बजा ते जेठे रा अक्क इस्राएलो रे पाऊ यूसुफो रे पाऊआ खे दित्तेया। जेतेरिया बजा ते रूबेनो रा नाओं कुलो दे जमणे रे मुताबिक नि ऊँदा। यहूदा आपणे पाईया बीचे सबी ते तागतबर ऊईगा ओर तेसरे ई परिवारो ते परदान आए, पर यूसुफो रे परिवारो खे से अक्क मिलेया जो जेठे पाऊए खे मिलो था। इस्राएलो रे जेठे पाऊ रूबेनो रे पाऊ यो ऊए: मतलब हनोक, पल्लू, हेस्रोन ओर कर्मी थे। योएलो रा पाऊ शमायाह, शमायाहो रा पाऊ गोग, गोगो रा पाऊ शिमी, शिमिये रा पाऊ मीका। मीके रा पाऊ रायाह, रायाह रा पाऊ बाल, ओर बालो रा पाऊ बएराह, एसखे अश्शूरो रा राजा तिग्लत्पिलेसेर बानी की लईगा ओर से रूबेनिया रा परदान था। ओर तेसरे पाईया री वंशावलिया रे लिखदे बखदे सेयो आपणे-आपणे कुलो रे मुताबिक यो ठईरे, मतलब बड़ा तो यीएल, तेबे जकर्याह, ओर अजाजो रा पाऊ बेला, जो शेमो रा पोता ओर योएलो रा पड़पोता था, से अरोएर शईरो दे ओर नबो शईर ओर बालमोन शईरो तक रओ था। से पूर्व दिशा दे उजाड़ जगा रे बन्ने तक फरात नदिया रे एते कनारे तक बी रया था, कऊँकि तिना रे डांगर गिलाद इलाके दे बऊत जादा बढ़ीगे थे। ओर शाऊलो रे दिना रे तिने हग्रिया साथे युद्ध कित्तेया ओर हग्री तिना रे आथो साथे मरी गे; तेबे सेयो गिलाद इलाके रे सारे पूर्वी इस्से दे आपणे डेरेया दे रणे लगे।
गादो रा खानदान
गाद कुलो रे लोक रूबेनिया रे नेड़े बाशान इलाके दे रओ थे। सेयो सल्का शईरो तक बसे दे थे। मतलब बड़ा तो योएल ओर दूजा शापाम तेबे यानै ओर शापात, ये सब बाशानो दे रओ थे। ओर तिना रे पाई आपणे-आपणे पितरा रे कराने रे मुताबिक मीकाएल, मशुल्लाम, शेबा, योरै, याकान, जीअ ओर एबेर, सात थे। यो अबीहैलो रे पाऊ थे, जो हूरीए रा पाऊ था, ये योराह रा पाऊ, ये गिलादो रा पाऊ, ये मिकाएलो रा पाऊ, ये यशीशै रा पाऊ, ये यहदो रा पाऊ, ये बूजो रा पाऊ था। इना रे पितरा रे कराने रा मूलमर्द अब्दीएलो रा पाऊ ओर गूनीए रा पोता अही था। यो लोक, बाशानो रे, गिलाद ओर तेथो रे गाँवो रे ओर शारोनो री सबी काईणी रे पोरलिया तरफा तक रओ थे। इना सबी री वंशावली यहूदा रे राजा योतामो रे दिना दे ओर इस्राएलो रे राजा यारोबामो रे दिना दे लिखी थी। रूबेनी, गादी ओर मनश्शे रे आदे गोत्रो रे योद्धा जो ढाल बनाणे, तलवार चलाणे ओर धनुषो ते तीर छाडणे जोगे ओर युद्ध करना सीखे रे थे, सेयो 44,760 थे, जो लड़ाईया दे जाणे जोगे थे। इने हग्री ओर यतूर नापीश ओर नोदाबो साथे युद्ध कित्तेया था। तिना रे खलाफ इना खे मताद मिली ओर हग्री तिना सबी समेत जो तिना साथे थे, तिना रे कब्जे दे करीते, कऊँकि इने युद्धो दे परमेशरो री दुहाई दित्ती थी ओर तिने तिना री बिनती इजी बजा ते सुणी, कऊँकि इने तेस पाँदे परोसा राखेया था। ओर इने तिना रे डांगर लई ले, मतलब ऊँट तो 50,000, पेडा-बाकरिया, 250,000, गह्दे 2,000 ओर माणूं 100,000 बन्दी बणाई की लईगे। एते लड़ाईया दे बऊत जादा खून खराबा ऊआ; कऊँकि से लड़ाई परमेशरो रिया तरफा ते ऊई थी। इजी ते बाद रूबेनो रे कुलो रे, गादो रे कुलो रे ओर मनश्शे रे गोत्रो रे आदे लोक तिना रिया जगा पाँदे निकाल़ने रे बखतो तक तिना रिया रणे रिया जगा पाँदे रंदे रये।
मनश्शे रे खानदान (पूर्वो दे रणे वाल़े)
मनश्शे रे गोत्रो रे आदे लोक यरदन नदिया रे पूर्बा रिया तरफा खे बसी रे थे। तिना री संख्या बऊत थी। सेयो बाशानो ते लई की बालहेर्मोन, ओर सनीर ओर हेर्मोन पाह्ड़ो तक बसी रे थे। ओर तिना रे पितरा रे कराने रे मुखिया मर्द यो थे, मतलब एपेर, यिशी, एलीएल, अज्रीएल, यिर्मयाह, होदव्याह ओर यहदीएल, यो बड़े वीर ओर नामी ओर आपणे पितरा रे कराने रे मुखिया मर्द थे। पर तिने आपणे पितरा रे परमेशरो साथे विश्वासघात कित्तेया ओर तेस देशो रे लोक, जो परमेशरे तिना रे सामणे ते नाश कित्ते थे, तिना रे देवतेया पीछे व्याभिचारणिया जेड़े ऊईगे। इजी री खातर इस्राएलो रे परमेशरे अश्शूरो रे राजा पूल ओर अश्शूरो रे राजा तिग्लत्पिलेसेरो रा मन उभारेया ओर सेयो रूबेन, गाद ओर मनश्शे रे आदे गोत्रो रे लोका खे बन्दुआ करी लईगे। सेयो तिना खे हलह, हाबोर ओर हारा शईरा दे ओर गोजान नदिया रे कनारे लईगे, जेती सेयो आजो तक रया करोए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.