Baghlayani Bible
1 इतिआस 27
राजा दाऊदो रे मुख्य सेनापति
इस्राएली लोका री गिणती, मतलब पितरा रे करानेया रे मुख्य-मुख्य मर्द ओर जो ह्जारा पाँदे सेनापति थे ओर सौ पाँदे सेनापति थे ओर तिना रे सरदारा री गिणती जो पूरे साल मीन्ना-मीन्ना आजीर रणे ओर छुट्टी लणे वाल़े दला रे थे ओर सबी गल्ला रे बारे दे राजे री सेवा करो थे, हर एकी दलो दे 24,000 सिपाई थे। पईले मीन्ने दे पईले दलो रा अधिकारी जब्दीएलो रा पाऊ याशोबाम नियुक्त ऊआ ओर तेसरे दलो दे 24,000 सिपाई थे। से पेरेसो रे कुलो रा था ओर पईले मीन्ने रे सबी सेनापतिया रा अधिकारी था।
दूजे मीन्ने रे दलो रा अधिकारी दोदै नाओं रा एक अहोही था ओर दूजे दलो रा परदान मिक्लोत था ओर तेसरे दलो दे 24,000 सिपाई थे।
तीजे मीन्ने खे तीजा सेनापति यहोयाद पुरोईतो रा पाऊ बनायाह था ओर तेसरे दलो दे 24,000 सिपाई थे। ये से ई बनायाह ए, जो तीईया शूरवीरा बीचे वीर ओर तीईया बीचे श्रेष्ठ बी था ओर तेसरे दलो दे तेसरा पाऊ अम्मीजाबाद था।
चौथे मीन्ने खे चौथा सेनापति योआबो रा पाई असाहेल था ओर तेसते बाद तेसरा पाऊ जबद्याह था ओर तेसरे दलो दे 24,000 सिपाई थे।
पाँजुए मीन्ने खे पाँजुआ सेनापति यिज्राही शम्हूत था ओर तेसरे दलो दे 24,000 सिपाई थे।
छठे मीन्ने खे छठुआ सेनापति तकोई इक्केशो रा पाऊ ईरा था ओर तेसरे दलो रे 24,000 सिपाई थे।
सातुए मीन्ने खे सातुआ सेनापति एप्रैमो रे कुलो रा हेलेस पलोनी था ओर तेसरे दलो दे 24,000 सिपाई थे।
आठुए मीन्ने खे आठुआ सेनापति जेरहो रे कुलो बीचा ते हूशाई सिब्बकै था ओर तेसरे दलो दे 24,000 सिपाई थे।
नऊए मीन्ने खे नऊआ सेनापति बिन्यामीनी अबीएजेर था जो अनातोत शईरो दे रणे वाल़ा था ओर तेसरे दलो दे 24,000 सिपाई थे।
दसुए मीन्ने खे दसुआ सेनापति जेरही महरै था जो नतोपाह रा रणे वाल़ा था ओर तेसरे दलो दे 24,000 सिपाई थे।
ग्यारुए मीन्ने खे ग्यारुआ सेनापति एप्रैमो रे कुलो रा बनायाह पिरातोन जगा रा रणे वाल़ा था ओर तेसरे दलो दे 24,000 सिपाई थे।
बारूए मीन्ने खे बारूआ सेनापति ओत्नीएलो रे कुलो रा हेल्दै नतोपाह रा रणे वाल़ा था ओर तेसरे दलो दे 24,000 सिपाई थे।
इस्राएली गोत्रा रे मुखिया
इस्राएली गोत्रा रे यो अधिकारी थे: मतलब रूबेनिया रा परदान जिक्रीए रा पाऊ एलीएजेर; शिमोनिया ते माका रा पाऊ शपत्याह; लेविया ते कमूएलो रा पाऊ हशब्याह; हारूणो री ल्वादा रा सादोक; यहूदा रा एलीहू नाओं रा दाऊदो रा एक पाई, इस्साकारो ते मीकाएलो रा पाऊ ओम्री; जबूलूनो ते ओबद्याह रा पाऊ यिशमायाह, नप्तालीए ते अज्रीएलो रा पाऊ यरीमोत; एप्रैमो ते अज्जयाह रा पाऊ होशे, पच्छमा दे मनश्शे रे आदे गोत्रो रा पदायाह रा पाऊ योएल; पूर्बा दे गिलाद जगा रे मनश्शे रे आदे गोत्रो ते जकर्याह रा पाऊ इद्दो, बिन्यामीनो ते अब्नेरो रा पाऊ यासीएल; ओर दानो ते यरोहामो रा पाऊ अजरेल परदान ठईरेया। यो ई इस्राएलो रे गोत्रा रे परदान थे।
पर राजा दाऊदे तिना री गिणती जो बीइ साला ते निठे थे तिना री नि कित्ती, कऊँकि यहोवे इस्राएलो री गिणती सर्गो रे तारेया जेड़ी बढ़ाणे खे बोलेया था। सरूयाह रा पाऊ योआब गिणती लणे लगेया, पर निपटाई नि सकेया, कऊँकि परमेशरो रा रोष इस्राएलो पाँदे पड़केया ओर ये गिणती दाऊद राजे रे इतिआसो दे नि लिखी।
राज्य री तअन-सम्पतिया री देख-पाल करने वाल़े
तेबे अदीएलो रा पाऊ अज्मावेत राजपण्डारो रा अधिकारी था ओर डोरू ओर शईर ओर गाँवो ओर गढ़ो रे पण्डारो रा अधिकारी उजिय्याह रा पाऊ योनातान था।
जो जमीना दे जिम्मीदारा रा काम करो थे, तिना रा अधिकारी कलूबो रा पाऊ एज्री था।
ओर अंगूरा रे बगीचे रा अधिकारी रामाई शिमी ओर अंगूरा रे बगीचे री उपज जो शराबो रे पण्डारो दे राखणे खे थी, तेतेरा अधिकारी शापामी जब्दी था।
ओर थालले देशो दे जैतून ओर गूलरो रे डाल़ो रा अधिकारी गदेरी बाल्हानान था ओर तेलो रे पण्डारो रा अधिकारी योआश था।
ओर शारोन जगा दे चरने वाल़े गाय-बल़दा रा अधिकारी शारोनी शित्रै था ओर तराईया रे गाय-बल़दा रा अधिकारी अदलैए रा पाऊ शापात था।
ओर ऊँटा रा अधिकारी इश्माएली ओबील ओर गह्दिया रा अधिकारी मेरोनोत जगा दे रणे वाल़ा येहदयाह था।
ओर पेडा-बाकरिया रा अधिकारी हग्री याजीज था। यो ई सब राजा दाऊदो री तअन-सम्पत्तिया रे अधिकारी थे।
ओर दाऊदो रा चाचा योनातान एक समजदार परदान ओर शास्त्री था ओर एक हक्मोनीए रा पाऊ एहीएल राजकुमारा साथे रया करो था। अहीतोपेल राजे रा मंत्री था ओर एरेकी हूशै राजे रा दोस्त था। अहीतोपेलो ते बाद बनायाह रा पाऊ यहोयादा ओर एब्यातार मंत्री बणाए। ओर राजे रा परदान सेनापति योआब था।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.