Baghlayani Bible
1 इतिआस 20
रब्बा शईरो पाँदे जीत
तेबे नये सालो रे शुरूओ दे जेबे राजा लोक युद्ध करने खे निकल़ेया करोए, तेबे योआबे इस्राएली लोका री बड़ी सेना आपू साथे लई जाई की अम्मोनिया रा देश नाश करिता ओर आई की रब्बा शईरो पाँदे अमला कित्तेया। योआबे रब्बा शईर आपणे कब्जे दे लई की से नाश करिता। पर दाऊद आपू यरूशलेम शईरो देई रईगा। तेबे दाऊदे अम्मोनिया रे राजे रा मुकुट तेसरे सिरो ते उतारी की देखेया कि तेतेरा बजन लगभग 34 किलो1 था, जो सूईने रा था ओर तिदे मणि बी जड़ी राखे थे। तिने से मुकुट दाऊदो रे सिरो पाँदे राखेया। तेबे योआब ओर इस्राएली सेना खे तेस शईरो ते बऊत सारा समान लूटा दे मिलेया। तिने तेथो रे रणे वाल़े निकयाल़ी की आरेया ओर लोए रे हेंगे ओर क्वाड़िया साथे बडवाए ओर अम्मोनिया रे सारे शईरा साथे बी दाऊदे तेड़ा ई कित्तेया। तेबे दाऊद सबी लोका समेत यरूशलेम शईरो खे वापस ऊईगा।
पलिश्ती दानवा रा विनाश
इजी ते बाद इस्राएली गेजेर शईरो दे पलिश्तिया साथे लड़े; तेस बखते हूशाई जगा दे रणे वाल़े सिब्बकै सिप्पै काईता, जो रपाई दानवा री ल्वाद था। ओर सेयो पलिश्ती लोक दाऊदो रे कब्जे दे ऊईगे। तेबे पलिश्तिया साथे फेर युद्ध ऊआ; तिदे याईरो रे पाऊ एल्हानाने गत शईरो रे गोलियतो रा पाई लहमी काई ता, जेसरे बड़छे रा थरा, टाल्ले बुणने री खड्डिया रे डण्डे बराबर मोटा था। तेबे गत शईरो दे बी युद्ध ऊआ ओर तेती एक बड़ा तगड़ा मर्द था, जो रापा री ल्वाद था ओर तेसरे एकी-एकी आथो ओर पैरा दे छे-छे गूठिया, मतलब सब मलाई की चौबी गूठिया थिया। जेबे तिने इस्राएली ललकारे, तेबे दाऊदो रे पाई शिमा रे पाऊ योनाताने से काया। यो ई गत शईरो दे रणे वाल़े रापा नाओं रे माणूंए ते पैदा ऊए थे ओर सेयो दाऊद ओर तेसरे सेवका रे आथो साथे मरे।
Source notes (1)
- Footnote 34 किलो एक किक्कार
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.