Baghlayani Bible
1 इतिआस 15
पवित्र सन्दूको रा यरूशलेम शईरो दे वापस आऊणा
तेबे दाऊदे दाऊदपुरो दे मईल बणवाए ओर परमेशरो रे सन्दूको खे एक जगा त्यार करी की एक तम्बू खड़ा कित्तेया। तेबे दाऊदे बोलेया, “लेविया खे छाडी की ओर केसी खे परमेशरो रा सन्दूक नि चकणा चाईयो, कऊँकि यहोवे सेयो इजी खेई चूणी राखे, ताकि सेयो परमेशरो रा सन्दूक चको ओर तेसरी सेवा-टईल़ सदा करेया करो।” तेबे दाऊदे सारे इस्राएली यरूशलेम शईरो दे इजी खे कट्ठे कित्ते, ताकि यहोवे रा सन्दूक तेते जगा दे पऊँचाओ, जो तिने तेते सन्दूको खे राखणे खे त्यार कित्ती थी।
इजी री खातर दाऊदे हारूणो री ल्वादा ओर लेवी लोक कट्ठे कित्ते। मतलब कहातिया रे कुलो ते 120 लोक थे। तिना रा मुखिया ऊरीएल नाओं रा माणूं था।
मरारिया रे कुलो ते 220 लोक थे। तिना रा मुखिया असायाह नाओं रा माणूं था।
गेर्शोमिया रे कुलो ते 130 लोक थे। तिना रा मुखिया योएल नाओं रा माणूं था।
एलीसापानिया रे कुलो ते 200 लोक थे। तिना रा मुखिया शमायाह नाओं रा माणूं था।
हेब्रोनिया रे कुलो ते 80 लोक थे। तिना रा मुखिया एलीएल नाओं रा माणूं था।
उज्जीएलिया रे कुलो ते 112 लोक थे। तिना रा मुखिया अम्मीनादाब नाओं रा माणूं था।
तेबे दाऊदे सादोक ओर एब्यातार नाओं रे पुरोईतो खे ओर ऊरीएल, असायाह, योएल, शमायाह, एलीएल ओर अम्मीनादाब नाओं रे लेविया खे बुलाई की तिना खे बोलेया, “तुसे तो लेविया रे पितरा रे कराने रे खास मर्द ए; इजी री खातर आपणे पाईया समेत आपू-आपू खे पवित्र करो, ताकि तुसे इस्राएलो रे परमेशर यहोवे रा सन्दूक तेसा जगा दे पऊँचाई सको जो मैं तेसरिया तँईं त्यार करी राखी। कऊँकि तुसे पिछली बार से नि चकेया था इजी बजा ते म्हारे यहोवा परमेशरे आसा खे सजा दित्ती, कऊँकि आसे से बिधि-बिधानो ते नि ल्याया था।”
तेबे पुरोईते ओर लेविये आपणे आपू खे पवित्र कित्तेया, ताकि इस्राएलो रे परमेशर यहोवे रा सन्दूक लई जाई सको। तेबे तेसा आज्ञा रे मुताबिक जो मूसे परमेशरो रा वचन सुणी की दित्ती थी, लेविये सन्दूक डण्डेया रे पारे आपणी कान्दा पाँदे चकी ता। तेबे दाऊदे लेविया रे मुखिया खे आज्ञा दित्ती कि आपणे गाणे वाल़े पाईया खे बाजे, मतलब सारंगी, बीणा ओर खंजरी देई की बजाणे ओर खुशिया साथे ऊच्ची आवाजा दे गाणे खे नियुक्त करो। तेबे लेविये योएलो रा पाऊ हेमान ओर तेसरे पाईया बीचा ते बेरेक्याह रा पाऊ आसाप, ओर आपणे पाई मरारिया रे कुलो ते कूशायाह रा पाऊ एतान ठराया। तिना साथे तिने दूजे पदो रे आपणे पाईया खे, मतलब जकर्याह, बेन, याजीएल, शमीरामोत, यहीएल, उन्नी, एलीआब, बनायाह, मासेयाह, मत्तित्याह, एलीपलेह, मिकनेयाह ओर ओबेदेदोम ओर यीएलो खे, जो द्वारपाल थे ठराए। ईंयाँ हेमान, आसाप ओर एतान नाओं रे गाणे वाल़े तो पीतल़ी री खंजरी बजाई-बजाई की राग चलाणे लगे; ओर जकर्याह, अजीएल, शमीरामोत, यहीएल, उन्नी, एलीआब, मासेयाह ओर बनायाह, अलामोत नाओं रे रागो रे सारंगी बजाणे खे ओर मत्तित्याह, एलीपलेह, मिकनेयाह ओबेदेदोम, यीएल ओर अज्जयाह बीणा खर्ज छेड़ने खे ठराए। ओर राग चकणे रा अधिकारी कनन्याह नाओं रा लेविया रा परदान था, से राग चकणे रे बारे दे शिक्षा देयो था, कऊँकि से जाणकार था। ओर बेरेक्याह ओर एलकाना सन्दूको रे द्वारपाल थे। ओर शबन्याह, योशापात, नतनेल, अमासै, जकर्याह, बनायाह ओर एलीएजेर नाओं रे पुरोईत परमेशरो रे सन्दूको ते आगे-आगे तुरहिया बजांदे ऊए चले ओर ओबेदेदोम ओर यहिय्याह तेसरे द्वारपाल थे; तेबे दाऊद ओर इस्राएली लोका रे बुजुर्ग ओर सारे सेनापति मिली की यहोवे री वाचा रा सन्दूक ओबेदेदोमो रे कअरो ते बऊत खुशिया साथे ल्याऊणे खे गये। जेबे परमेशरे लेविया री मताद कित्ती जो यहोवे री वाचा रा सन्दूक चकणे वाल़े थे, तेबे तिने सात बल़द ओर सात खाडू बलि कित्ते।
दाऊद ओर यहोवे री वाचा रा सन्दूक चकणे वाल़े सब लेविये ओर गाणे वाल़े ओर गाणेवाल़ेया साथे राग चकणे वाल़ेया रा परदान कनन्याह था, इने सबी रेशमो रे चोगे पईनी राखे थे ओर दाऊदे रेशमो रे टाल्ले रा चोगा पईनी राखेया था। ईंयाँ सारे इस्राएली यहोवे री वाचा रा सन्दूक जयजयकार करदे ओर रड़सिंगे, तुरहिया ओर खंजरी बजांदे ओर सारंगिया ओर बीणा बजांदे ऊए लई चले। जेबे यहोवे री वाचा रा सन्दूक राजा दाऊदो रे शईरो दे पऊँचेया, तेबे शाऊलो री बेटी मीकले द्वारिया बीचा ते चाँकी की दाऊदो खे उटकदे ओर नाचदे ऊए देखेया ओर तेसे से मनो ई मनो दे बेकार जाणेया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.