Baghlayani Bible
1 इतिआस 13
पवित्र सन्दूको रा यरूशलेम शईरो दे ल्याया जाणा
एकी दिने दाऊदे आपणिया सेना रे सब बड़े अधिकारी ओर परदाना ते गल्ल बात कित्ती। तेबे दाऊदे इस्राएलो री सारी मण्डल़िया खे बोलेया, “जे ये तुसा खे ठीक लगो ओर म्हारे परमेशरो री बी एई इच्छा ओ, तो आओ आसे आपणे तिना सबी पाईया गे जो इस्राएलो रे सारे देशो दे रओए, चाए सेयो पुरोईत ओ या लेवी तिना सबी गे ये सन्देसा पेजूँए कि सेओ एते शईरो दे आसा गे कट्ठे ऊई जाओ, ओर आसे आपणे परमेशरो रे सन्दूको खे आपू गे ली आऊँए; कऊँकि शाऊलो रे दिना दे आसे तेतेरे नेड़े नि जाऊँ थे।” ओर सारी मण्डल़िए बोलेया, जेड़ा तूँ बोलेया आसा तेड़ा ई करना, कऊँकि ये गल्ल तिना सबी लोका खे ठीक लगी। तेबे दाऊदे मिस्रो री शीहोर नदिया ते लई की हमातो री काट्टिया तको रे सारे इस्राएली लोक इजी खे कट्ठे कित्ते, ताकि परमेशरो रे सन्दूको खे किर्यत्यारीम शईरो ते ल्याओ। तेबे दाऊद सारे इस्राएली लोका खे साथे लई की बाला शईरो खे गया, जेतेखे किर्यत्यारीम शईर बी बोलोए ओर से यहूदा गोत्रो रे इस्से दे था ताकि परमेशर यहोवे रा सन्दूक तेथा ते ल्याओ; से तो करूबा पाँदे विराजणे वाल़ा ए ओर तेसरा नाओं बी येई लया जाओआ।
तेबे तिने परमेशरो रा सन्दूक एक नई गडिया दे चढ़ाई की अबीनादाबो रे कअरो ते काडेया ओर उज्जा ओर अह्यो तेसा गडिया खे चलाणे लगे। दाऊद ओर सारे इस्राएली लोक परमेशरो रे सामणे तनो-मनो ते गीत गांदे ओर बीणा, सारंगी, डफ, खंजरी ओर तुरहिया बजाणे लगी रे थे।
जेबे सेयो किदोन किसानो रे खल्याणो तक आए, तेबे बल़दा रे पैरो दे ठोकर लगी। ये देखी की उज्जे आपणा आथ सन्दूक पकड़ने खे आगे कित्तेया ओर से पकड़ेया। तेबे यहोवे रा कोप उज्जे पाँदे पड़केया ओर तिने उज्जे पाँदे अमला कित्तेया ओर से थाले पड़ीगा, कऊँकि तिने आपणे आथो साथे से सन्दूक पकड़ेया था; ओर से तेथी परमेशरो सामणे मरी गा।
तेबे दाऊद दु:खी ऊईगा, इजी खे कि यहोवा उज्जे पाँदे पड़केया था; ओर तिने तेसा जगा रा नाओं पेरेसुज्जा राखेया, ये नाओं आजो तक बणेया रा ए। तेस दिने दाऊद परमेशरो ते डरी की बोलणे लगेया, “आऊँ परमेशरो रे सन्दूको खे आपू गे किंयाँ लई जाऊँ?” तेबे दाऊद सन्दूको खे आपू गे दाऊदो रे शईरो दे नि ल्याया, पर दाऊद तेस सन्दूको खे गत जगा दे रणे वाल़े ओबेदेदोम नाओं रे माणूंए रे कअरे लईगा। ओर परमेशरो रा सन्दूक ओबेदेदोमो गे तेसरे कराने दे तीन मीन्ने तक रया ओर यहोवे ओबेदेदोमो रे कराने पाँदे ओर जो कुछ तेसरा था तेते पाँदे बी आशीष दित्ती।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.