मत्ती 27

पिलातुसो सामणे यीशु

(मरकुस 15:1; लूका 23:12; यूहन्ना 18:28-32)

1जेबे प्याग ऊई तेबे सबी बड़े पुरोईत और लोका रे बुजुर्गे यीशुए खे काणे री योजना बणाई। 2तेबे सेयो यीशुए खे बानी की लईगे और पिलातुस हाकिमो रे आथो रे देई ते।

यहूदे री आत्मात्या

(प्रेरितों 1:18-19)

3जेबे यीशुए खे तोखे ते पकड़वाणे वाल़े यहूदे देखेया कि सेयो दोषी ठराई ते, तेबे से बऊत पछताया और तिना चाँदिए रे तीई सिक्केया लयी की बड़े पुरोईता गे और बुजुर्गा गे फेर ली आया 4और बोलणे लगेया, “मैं बेकसुर मांणूए री मौत करवाणे खे पकड़वाई की पाप करी राखेया।” तेबे तिने बोलेया, “आसा खे क्या ए? तूँ ई जाण।” 5तेबे यहूदा तिना सिक्केया खे मन्दरो रे सेटी की चली गा और जाई की आपू खे गल़फा लगाईता।

6तेबे बड़े पुरोईते तिना सिक्केया खे लयी की बोलेया, “इना खे पण्डारो रे राखणा ठीक निए, कऊँकि ये खून कराणे खे दित्ती री कीमत ए।” 7तेबे तिने योजना बणाई की तिना सिक्केया ते परदेशिया खे दबाणे रिया तंईं कुम्हारो रा डोरू मोले लयी ला। 8तेबेई तो आजो तक तेस डोरूआ खे खूनो रा डोरू बोलोए। 9तेबे जो वचन यिर्मयाह भविष्यबक्ते बोलेया था, से पूरा ऊआ, “तिने सेयो तीई सिक्के, मतलब जो मोल था राखेया रा (जो इस्राएलो री ल्वादा बीचा ते कितणेया जणे ठराया था) लयी ला 10और जिंयाँ माखे प्रभुए आज्ञा दित्ती थी, तिंयाँ ई से कुम्हारा रे डोरूआ रे मोलो रे देईता।”

पिलातुसो रा सवाल

(मरकुस 15:2-5; लूका 23:3-5; यूहन्ना 18:33-38)

11जेबे यीशु हाकिमो सामणे खड़े थे, तेबे हाकिमे पूछेया, “क्या तूँ यहूदिये रा राजा ए?” यीशुए तेसखे बोलेया, “तूँ आपू ई लगी रा बोलणे।” 12जेबे बड़े पुरोईत और बुजुर्ग तिना पाँदे दोष लगी रे थे लगाणे, तेबे तिने कोई जवाब नि दित्तेया। 13तेबे पिलातुसे तिना खे बोलेया, “क्या तूँ सुणने नि लगी रा कि यो तेरे खलाफ कितणिया गवाईया लगी रे देणे।” 14पर यीशुए तेसरी एक बी गल्ला रा जवाब नि दित्तेया, ये देखी की हाकिमो खे बऊत हैरानी ऊई।

मौता री सजा रा उक्म

(मरकुस 15:6-15; लूका 23:13-25; यूहन्ना 18:39; यूहन्ना 19:16)

15हाकिमो रा ये रवाज था कि तेस त्योआरो खे लोका री तंईं जेसखे सेयो चाओ थे, एकी बन्दुओ खे छाडी देयो था। 16तेस बखते तिना गे बरअब्बा नाओं रा एक मानेया रा बन्दुआ था। 17तेबे, जेबे सेयो कट्ठे ऊए, तेबे पिलातुसे तिना खे बोलेया, “तुसे केसखे चाओए कि आऊँ तुसा री तंईं छाडी देऊँ? बरअब्बे खे या यीशुए खे, जेसखे मसीह बी बोलोए?” 18कऊँकि पिलातुस जाणो था कि तिने से जल़नी रे पकड़वाया। 19जेबे से न्याय आसणो री गद्दिया पाँदे था बैठे रा, तेबे तेसरी लाड़िए तेसखे सन्देशा पेजेया कि, “तूँ तेस तर्मी मांणूए रे बारे रे दखलंदाजी नि कर; कऊँकि आज माखे सुपने रे तेसरी बजअ ते बऊत दु:ख ऊआ।”

20बड़े पुरोईत और बुजुर्गे लोक ऊकसाए कि तुसे बरअब्बे खे माँगो और यीशुए खे नाश कराओ। 21हाकिमे तिना ते पूछेया, “तुसे इना दूँईं बीचा ते केसखे चाओए कि आऊँ तुसा खे छाडी देऊँ?” तिने बोलेया, “बरअब्बे खे।” 22पिलातुसे तिना ते पूछेया, “तेबे यीशुए खे, जेसखे मसीह बोलोए, तेस साथे क्या करुँ?” सबी तेसखे बोलेया, “एसखे क्रूसो पाँदे चढ़ाओ।” 23हाकिमे पूछेया, “कऊँ, तिने क्या बुरा करी राखेया?” पर सेयो ओर बी चींगी-चींगी की बोलणे लगे, “एसखे क्रूसो पाँदे चढ़ाओ।” 24जेबे पिलातुसे देखेया कि कोई बात नि लगी री बणने, बल्कि बिगड़ने ई लगी री, तेबे तिने पाणी लई की पीड़ा सामणे आपणे आथ तोए और बोलेया, “आऊँ एस तर्मिंयों रे खूनो ते निर्दोष ए; तुसेई जाणो।” 25सबी जवाब दित्तेया, “एसरे खूनो री अत्या आसा खे और आसा री ल्वादा खे लगो!” 26तेबे तिने बरअब्बा तिना खे छाडीता और यीशु कोड़े लगवाई की तिना खे देई ते कि क्रूसो पाँदे चढ़ाई देयो।

सिपाईया रे जरिए यीशुए री बेज्जती

(मरकुस 15:16-20; यूहन्ना 19:2,3)

27तेबे हाकिमो रे सिपाई यीशुए खे किले दे लईगे और सारी पल़टण तिना रे चऊँ कनारे कट्ठी करी ती, 28और तिना रे टाले खोली की तिना खे लाल रंगो रा चौगा पणयाई ता 29और कांडेया रा मुकट बूणी की तिना रे सिरो पाँदे राखेया और तिना रे दाँणे आथो रे एक नगल़ो रा डण्डा देईता और तिना रे आगे कुटणे टेकी की तिना रा मजाक ऊड़ाणे लगे और बोलणे लगे, “ओ यहूदिया रे राजा नमस्कार!” 30और तिना पाँदे थूकेया और सेई नगल़ो रा डण्डा लयी की तिना रे सिरो पाँदे बाणे लगे। 31जेबे सेयो तिना रा मजाक ऊड़ाई चुके, तेबे तिने तिना पाँदो ते से चौगा उतारेया और तिना खे तिना रेई टाल्ले पणयाईते और क्रूसो पाँदे चढ़ाणे खे लयी चले।

यीशुए खे क्रूसो पाँदे चढ़ाणा

(मरकुस 15:21-32; लूका 23:26-43; यूहन्ना 19:17-27)

32बारे जाई की तिना खे शमौन नाओं रा एक कुरेनी मांणू, जो दूजे गांव ते आऊणे लगी रा था, तेसी बखते से तिसिये निकल़ेया। तेबे सिपाईए से ईंयां ई पकड़ी ता कि यीशु रा क्रूस चकी की लई चल। 33तेसा जगा रे जो गुलगुता, मतलब-जेथो खे खोपड़िया री जगा बी बोलोए, तेती पऊँछी की 34तिने यीशुए खे पित्त मलाए रा अँगूरा रा रस पीणे खे दित्तेया, पर तिने चाखी की पीणा नि चाया। 35तेबे तिने यीशु क्रूसो पाँदे चढ़ाई ते और चिट्ठिया पाई की तिना रे टाले बांडी ते 36और तेती बैठी की तिना रा पईरा देणे लगे। 37तेबे तिना रा दोष पत्र तिना रे सिरो पाँदे लगाया,

“ये यहूदिया रा राजा यीशु ए।”

38तेबे तिना साथे दो डाकू, एक दाँणे कनारे और दूजा खूँजे कनारे क्रूसो पाँदे चढ़ाए। 39आऊणे जाणे वाल़े सिर इलाई-इलाई की तिना री निन्दा करदे रओ थे 40और ये बोलदे रओ थे, “ओ मन्दरो खे टाल़ने वाल़े और तीन दिना रे बनाणे वाल़े, आपू खे तो बचा! जे तूँ परमेशरो रा पुत्र ए, तो क्रूसो पाँदो ते उतरी की थाले आओ।” 41तिंयाँ ई बड़े पुरोईत, शास्त्री और बुजुर्ग मजाक ऊड़ाई की बोलो थे, 42“इने ओर बचाए, पर आपू खे नि बचाई सकदा। ये तो ‘इस्राएलो रा राजा’ ए जे एबे क्रूसो ते ऊतरी की आओ, तो आसे विश्वास करिए। 43इने तो परमेशरो पाँदे विश्वास राखी राखेया, जे से एसखे चाओआ, तो एबे एसखे छुड़ाई लो, कऊँकि इने बोलेया था, कि आऊँ परमेशरो रा पुत्र ए” 44तिंयाँ ई सेयो डाकू बी, जो यीशुए साथे क्रूसो पाँदे चढ़ाई राखे थे, निन्दा करदे रओ थे।

यीशुए रा प्राण छाडणा

(मरकुस 15:33-41; लूका 23:44-49; यूहन्ना 19:28-30)

45त्याड़िया ते लयी की तीजे पईरो तक सारे देशो रे न्हेरा ई रया। 46तीजे पईरो रे नेड़े यीशुए जोरे की आक्का पाई की बोलेया, “एली, एली, लमा शबक्तनी?” मतलब “ओ मेरे परमेशर, ओ मेरे परमेशर! तैं आऊँ कऊँ छाडीता?” 47जो तेती थे खड़े रे, तिना बीचा ते बऊत जणेया ये सुणी की बोलेया, “ये एलिय्याह खे लगी रा आक्का पाणे।” 48तिना बीचा ते एक फटाफट दौड़ेया और स्पंज लयी की सिरके बीचे डबोया और नगल़ो रे डण्डे रे राखी की तिना खे चुसाया। 49तेबे ओरी बोलेया, “देखी लऊँए कि एलिय्याह एसखे बचाणे आओआ कि नई।” 50तेबे यीशु फेर जोरे की चींगे और प्राण छाडी ते। 51तेबे मन्दरो रा पड़दा पाँदो ते लई की थालो तक फटीगा और तिजी रे दो टुकड़े ऊईगे। ये ए दखाओआ कि एबे कोई बी मांणू परमेशरो री हजुरिया रे जाई सकोआ। तरती ईलणे लगी और जानी तिड़की गिया 52और कब्रा खुली गिया और मरे रे पवित्र लोका रिया बऊत लोथा उठी गिया। 53और तिना रे जिऊँदे ऊणे ते बाद सेयो कब्रा ते निकल़ी की पवित्र नगरो खे गए और बऊत लोका खे दिखे। 54तेबे सूबेदार और जो तेस साथे पईरा देणे लगी रे थे, ईल्लण और जो कुछ तेती ऊआ, देखी की बऊत डरी गे और बोलणे लगे, “सच्ची, ये तो परमेशरो रा ई पुत्र था।” 55तेती बऊत जवाणसा, जो गलील प्रदेशो ते यीशुए साथे तिना री सेवा करदिया ऊईया आईया थिया, ये दूरो ते लगी री थिया देखणे। 56तिना बीचे मरियम मगदलिनी और याकूब और योसेसो री आम्मा मरियम और जब्दिए रे पाऊए री आम्मा थी।

यीशुए खे दबाणा

(मरकुस 15:42-47; लूका 23:50-56; यूहन्ना 19:38-42)

57जेबे साँज ऊई तेबे यूसुफ नाओं रा अरिमतियाह रा एक अमीर मांणू, जो आपू बी यीशुए रा चेला था, आया। 58तिने पिलातुसो गे जाई की यीशुए री लोथ मांगी। तेबे पिलातुसे देणे री आज्ञा देईती। 59यूसुफे लोथ लई और सफेद चादरी रे लपेटी ती 60और से आपणी नईया कब्रा रे राखी, जो तिने चट्टानी रे थी खणवाई री और कब्रा रे द्वारो पाँदे एक बड़ा पात्थर खसकेयी की चली गा। 61मरियम मगदलिनी और दूजी मरियम तेती कब्रा सामणे बैठी रिया थिया।

कब्रा पाँदे पईरा

62दूजे दिने, जो आरामो रा दिन था, बड़े पुरोईत और फरीसिये कट्ठे ऊई की पिलातुसो खे बोलेया, 63“ओ महाराज! आसा खे याद ए कि तिने भरमाणे वाल़े, जेबे से जिऊँदा था तिने बोलेया था कि, मां मरने ते बाद तीजे दिने जिऊँदा ऊई जाणा। 64तो आज्ञा दे कि तीन दिना तक कब्रा री रखवाल़ी ओ, एड़ा नि ओ कि तेसरे चेले आयी की तेसखे चोरी की लयी जाओ और लोका खे बोलो कि, से मरे रे बीचा ते जिऊँदा ऊईगा; तेबे पिछला तोखा, पईले ते बी बुरा ऊणा।” 65पिलातुसे तिना खे बोलेया, “तुसा गे पईरेदार आए। तिना खे लयी जाओ और आपणी समजा रे मुताबिक रखवाल़ी करो।” 66तेबे सेयो पईरेदारा खे साथे लयी गे और पात्थरो पाँदे मोहर लगाई की कब्रा री रखवाल़ी करने लगे।