मरकुस 15

पिलातुसो सामणे यीशु

(मत्ती 27:1-2,11-14; लूका 23:1-5; यूहन्ना 18:28-38)

1प्यागा ऊँदे ई फटाफट बड़े पुरोईत, बुजुर्ग, शास्त्री और सारी बड़ी सभा सलाह् कित्ती कि एस साथे क्या करिए। तेबे यीशु बानी ते और तिना खे लईगे और पिलातुस हाकिमो रे आथो रे देई ते। 2तेबे पिलातुसे तिना ते पूछेया, “क्या तूँ यहूदिया रा राजा ए?” यीशुए तेसखे बोलेया, “तूँ आपू ई लगी रा बोलणे।” 3बड़े पुरोईत तिना पाँदे बऊत दोष लगाणे लगी रे थे। 4पिलातुसे तिना ते फेर पूछेया, “क्या तांगे कोई जवाब ए देणे खे? देख, यो तां पाँदे कितणे दोष लगी रे लगाणे।” 5यीशुए फेर बी कुछ जवाब नि दित्तेया। ये देखी की पिलातुस हैरान ऊईगा।

मौता री सजा री आज्ञा

(मत्ती 27:15-26; लूका 23:13-25; यूहन्ना 18:39; यूहन्ना 19:16)

6पिलातुस हर साल फसह रे त्योआरो रे एकी कैदियो खे, जेसखे सेयो बोलो थे, तिना खे छाडी देओ था। 7तेस बखते बरअब्बा नाओं रा एक मांणू तिना हुड़दंग करने वाल़ेया साथे जेला रे था, जिने दंगेया रे अत्या कित्ती थी। 8तेबे पीड़ ऊबे जाई की तेसते बिनती करने लगी, “जेड़ा तुसे आसा खे करदे आए, तेड़ा ई करो।” 9पिलातुसे तिना खे बोलेया, “क्या तुसे ये चाओए कि आऊँ तुसा खे यहूदिये रे राजे खे छाडी देऊँ?” 10पिलातुस जाणो था कि बड़े पुरोईते यीशुए ते जल़न राखोए, तेबेई तिने से पकड़वाया। 11पर बड़े पुरोईते लोक ऊकसाए, “बरअब्बे खे आसा खे छाडी देओ।” 12ये सुणी की पिलातुसे तिना ते फेर पूछेया, “जेसखे तुसे यहूदिया रा राजा बोलोए, तेस साथे क्या करुँ?” 13सेयो ओर बी चिंगणे लगे, “एसखे क्रूसो पाँदे चढ़ाओ।” 14पिलातुसे तिना खे बोलेया, “कऊँ?, इने क्या बुरा करी राखेया?” पर सेयो और बी चिंगणे लगे, “एसखे क्रूसो पाँदे चढ़ाओ।” 15तेबे पिलातुसे पीड़ा खे खुश करने री ईच्छा ते बरअब्बा तिना खे छाडीता, और यीशुए खे कोड़े लगवाई की तिना गे सम्बाल़ी ता कि क्रूसो पाँदे चढ़ाया जाओ।

रोमी सिपाईया रे जरिए यीशुए री बेज्जती

(मत्ती 27:27-31; यूहन्ना 19:2,3)

16तेबे रोमी सिपाई यीशुए खे पीतरे आँगणो दे लईगे, जेतेखे प्रीटोरियुम राज्यपालो रा मुख्यालय बी बोलोए, और सारी सिपाईया री पल़टण बुलाई। 17तेबे तिने यीशुए खे बैंगणी टाले पणयाए और कांडेया रा मुकट बूणी की तिना रे सिरो पाँदे राखी ता। 18और तिना खे ये बोली की तिना रा मजाक उड़ाणे लगे, “हे यहूदिया रे राजा, नमस्कार।” 19सेयो तिना रे सिरो पाँदे नगल़ो रे डण्डे की बाओ थे, तिना पाँदे थूको थे और कूटणे टेकी की माथा टेको थे। 20जेबे सेयो तिना रा मजाक उड़ाई चूके, तेबे तिना पाँदो ते बैंगणी टाले खुलाई ते और तिना रेई टाले पणयाईते और यीशुए खे क्रूसो पाँदे चढ़ाणे खे बारे ली आए।

यीशु खे क्रूसो पाँदे चढ़ाणा

(मत्ती 27:32-44; लूका 23:26-43; यूहन्ना 19:17-27)

21जेबे सेयो यीशुए खे क्रूसो पाँदे चढ़ाणे खे लयी चली रे थे। तेबे सिकन्दर और रूफुसो रा पिता, शमौन नाओं रा एक कुरेनी मांणू, जो दूजे गांव ते आऊणे लगी रा था, तेसी बखते से तिसिये निकल़ेया। तेबे सिपाईए से ईंयां ई पकड़ी ता कि यीशु रा क्रूस चकी की लई चल। 22तेबे सेयो यीशुए खे गुलगुता नाओं री जगा रे पकड़ी की लईगे, जेतेखे खोपड़िया री जगा बी बोलोए। 23तेबे सेयो तिना खे मुर्र नाओं री जड़ी बूटी मलाई की अँगूरा रा रस पीणे खे देणे लगे, पर तिने नि पिया। 24तेबे तिने यीशु क्रूसो पाँदे चढ़ाए और तेबे तिना रे टाले रिया चिट्ठिया पाईया कि केसी खे क्या मिलणा, और सेयो बांडी ते। 25तेबे प्यागा रे नौ बजे रा बखत था, जेबे तिने सेयो क्रूसो पाँदे चढ़ाई ते। 26और तिना रा दोष-पत्र लिखी की क्रूसो पाँदे तिना पाँदे लगाई ता कि “यहूदिया रा राजा।”

27तेबे तिने दो डाकू, एक तिना रे दाँणे कनारे और एक खूँजे कनारे, क्रूसो पाँदे चढ़ाए। 28तेबे धर्मशास्त्रो रा से वचन कि, “से अपराधिया साथे गिणेया जाणा” पूरा ऊआ। 29बाटा रे जाणे वाल़े सिर इलाई-इलाई की ये बोली की तिना री निन्दा करो थे, “वाह! मन्दरो खे टाल़ने वाल़े और तीन दिना रे बनाणे वाल़े, 30क्रूसो पाँदा ते उतरी की आपणे आपू खे बचा।” 31ईंयां ई बड़े पुरोईत बी, शास्त्रिया साथे, आपू बीचे मजाक करो थे, “इने ओर तो बचाए, पर आपू खे नि बचाई सकेया। 32इस्राएलो रा राजा मसीह, एबे क्रूसो ते ऊतरी की तो आओ, ताकि आसे बी देखी की विश्वास करिए।” जो तिना साथे क्रूसो पाँदे चढ़ाए राखे थे, सेयो बी तिना री निन्दा करो थे।

यीशुए रे प्राण छाडणे

(मत्ती 27:45-56; लूका 23:44-49; यूहन्ना 19:28-30)

33और जेबे त्याड़ी ऊई, तेबे सारे देशो रे न्हेरा ऊईगा और तीजे पईरो तक रया। 34तीजे पइरो रे यीशुए जोरे की बोलेया, “इलोई, इलोई लमा शबक्तनी?” जेतेरा मतलब ए, “ओ मेरे परमेशर, ओ मेरे परमेशर! तुसे आऊँ कऊँ छाडीता?” 35जो नेड़े थे खड़े रे, तिना बीचा ते कुछ जणेया ये सुणी की बोलेया, “देखो, ये एलिय्याहो खे आक्का पाणे लगी रा।” 36तेबे एकी जणे दौड़ी की स्पंज सिरके रे डबोया और नगल़ो रे डण्डे पाँदे राखेया और तिना खे चुसाया, और बोलेया, “चलो थोड़ा रूकी कि देखूँए कि एलिय्याह एसखे उतारने आओआ कि नि।” 37तेबे यीशुए जोरे की चींगी की प्राण छाडी ते।

38तेबे मन्दरो रा पड़दा पाँदो ते लई की थालो तक फटीगा और तिजी रे दो टुकड़े ऊईगे। ए ये दखाओ कि एबे कोई बी मांणू परमेशरो री हजुरिया रे जाई सकोआ।1 39जो सूबेदार तेती था खड़े रा, जेबे तिने यीशु ईंयां चींगी की प्राण छाडदे ऊए देखे, तो तेबे तिने बोलेया, “सच्ची ये तो परमेशरो रा पुत्र था।”

40कुछ जवाणसा दूरो ते देखणे लगी री थिया, तिना बीचा ते मरियम मगदलिनी और छोटे याकूब और योसेसो री आम्मा मरियम और सलोमी थिया। 41जेबे यीशु गलील प्रदेशो रे थे, तेबे सेयो तिना पीछे-पीछे जाओ थिया और तिना री सेवा करो थिया, ओर बी कई जवाणसा थिया, जो तिना साथे यरूशलेम नगरो रे आईया थिया।

यीशुए खे दबाणा

(मत्ती 27:57-61; लूका 23:50-56; यूहन्ना 19:38-42)

42जेबे साँज ऊई, तेबे, कऊँकि से त्यारिया रा दिन था, जो आरामो रे एक दिन पईले ओआ, 43तेबे अरिमतियाह रा रणे वाल़ा यूसुफ आया, जो बड़ी सभा रा खास जाणेया-मानेया रा सदस्य था और आपू बी परमेशरो रे राज्य री बाट न्याल़ो था। से याओ करी की पिलातुसो गे गया और यीशुए री लोथ मांगी। 44पिलातुस हैरान ऊईगा कि से ईतणे चट मरी गा; तेबे तिने सूबेदार बुलाया और तेसते पूछेया, “क्या यीशु सच्ची मरी गा?” 45जेबे तिने सूबेदारो ते सारा आल जाणी ला, तेबे पिलातुसे लोथ यूसुफो खे दलाई ती। 46तेबे तिने एक मलमलो री चादर खरीदी और लोथ ऊतारी की चादरी रे लपेटी और कब्रा रे राखी, जो चट्टानी रे थी खणी री। तेबे कब्रा रे द्वारो पाँदे एक पात्थर खसकेईता। 47तेबे मरियम मगदलिनी और योसेसो री आम्मा मरियम देखणे लगी री थिया कि तिने यीशुए री लोथ केयी राखी रिये।