लूका 14

फरीसिये रे कअरे यीशु

1तेबे यीशु आरामो रे दिने फरीसिया रे अधिकारिया बीचा ते केसी एकी रे कअरे रोटी खाणे गये और सेयो तिना रे कोई गल़ती टोल़ने री ताका रे थे, ताकि तिना पाँदे कोई दोष लगाई सको। 2तेती एक मांणू था जेसरे आथो रे और पैरा रे सोजा था 3तेबे यीशुए धर्मशास्त्री खे और फरीसिया खे बोलेया, “क्या आरामो रे दिने अच्छा करना बिधानो रे मुताबिक ठीक ए कि गल़त?” 4पर सेयो चुप-चाप रये। तेबे यीशुए से आथ लगाई की ठीक कित्तेया और जाणे दित्तेया 5और तिना खे बोलेया, “तुसा बीचा ते एड़ा कूणे कि जेसरा पाऊ या बल़द कुँएं रे पड़ी जाओ और तेस आरामो रे दिने ई तेसखे बारे नि निकयाल़ो?” 6सेयो इना गल्ला रा कोई बी जवाब नि देई सके।

नम्रता और मईमाना रा स्वागत

7जेबे यीशुए देखेया कि निऊँदे वाल़े लोक खास-खास जगा चूणी लओए, तेबे तिने एक उदारण सुणाई की तिना खे बोलेया, 8“जेबे कोई ताखे ब्याओ खे बुलाओ, तो खास जगा रे नि बैठणा, केथी एड़ा नि ओ कि तिने तांते बी केसी बड़े खे निऊँदा देई राखेया ओ। 9और जिने ताखे और तेसखे, दूँईं खे निऊँदा देई राखेया, आयी की ताखे बोलो कि एसखे जगा छाड और तेबे ताखे सबी ते शर्मिंदा ऊई की सबी ते थालली जगा रे बैठणा पड़ो। 10पर जेबे ताखे बुलाओ, तेबे सबी ते थालली जगा रे जाई की बैठ, ताकि तेबे जिने तूँ बुलाई राखेया, से आओ और ताखे बोलो कि ओ दोस्त! आगे जे बैठ। तेबे तां साथे बैठणे वाल़ेया सामणे तेरी तारीफ ऊणी 11कऊँकि जो कोई आपू खे बड़ा बणाओगा, से छोटा कित्तेया जाणा और जो आपू खे छोटा बणाओगा, से बड़ा कित्तेया जाणा।”

12तेबे यीशुए आपणे निऊँदा देणे वाल़ेया खे बोलेया, “जेबे तूँ दिनो री या साँजा री रोटी खाए तो तेबे तैं, आपणे दोस्त, पाई, टब्बरो वाल़े और अमीर दोस्त नि बुलाणे, केथी एड़ा नि ओ कि सेयो ताखे बी निऊँदा देओ और तेरा बदला चुकाई देओ। 13पर जेबे तूँ रोटी खाए, तेबे कंगाल़ा खे, टुण्डेया खे, लंगड़ेया खे और अन्देया खे बुला। 14तेबे तूँ धन्य ऊणा, कऊँकि तिना गे ताखे बदला देणे खे कुछ निए, पर ताखे तर्मिया लोका रे मुड़देया बीचा ते जिऊँदे ऊणे पाँदे इजी रा ईनाम मिलणा।”

बड़ी पाट्टिया रा उदारण

(मत्ती 22:1-10)

15तिना साथे रोटी खाणे वाल़ेया बीचा ते एकी जणे इना गल्ला खे सुणी की बोलेया, “धन्य ए सेयो, जिना परमेशरो रे राज्य रे रोटी खाणी।” 16यीशुए तेसखे बोलेया, “एकी मांणूए बऊत बडिया पाट्टिया कित्तिया और बऊत जणे बुलाए। 17जेबे रोटी त्यार ऊईगी, तेबे तिने आपणे दासो रे जरिए निऊँदा दित्ते रे लोका खे बोलेया, ‘आयी जाओ और रोटी त्यार ए।’ 18पर सेयो सब जणे माफी मांगणे लगे, एकी जणे बोलेया, ‘मैं तो डोरू मोले लयी राखे और माखे सेयो देखणे जरूरी ए, आऊँ तांते बिनती करूँआ कि माखे माफ करी दे।’ 19दूजे बोलेया, ‘मैं पाँज जोड़े बल़दा रे खरीदी राखे और आऊँ तिना खे परखणे खे चली रा, मेरी तांते बिनती ए कि माखे माफ करी दे।’ 20एकी ओरी बोलेया, ‘मैं ब्या करी राखेया आऊँ नि आयी सकदा।’ 21तिने दासे सारी गल्ल मालको गे सुणाई, तेबे तिने रोषो रे आयी की आपणे दासो खे बोलेया, ‘नगरो दे, बजारो और गल़िया रे जाई की कंगाल़, लंगड़े, टूण्डे और अन्देया खे एती ली आओ।’ 22दासे फेर बोलेया, ‘जिंयाँ तुसे बोलेया था, तिंयाँ ई कित्तेया, पर फेर बी जगा ए।’ 23स्वामिए दासो खे बोलेया, ‘सड़का ते और बाटा ते लोका खे जबरदस्ती ली आओ, ताकि मेरा कअर फरी जाओ। 24कऊँकि आऊँ तुसा खे बोलूँआ कि तिना, जिना खे निऊँदा देई राखेया था, तिना निऊँदा दित्ते रे लोका बीचा ते एकी जणे पनि मेरे कअरे पाट्टी चाखणी।’ ”

चेला बणने रा मोल

(मत्ती 10:37,38)

25तेबे यीशुए पीछे एक बड़ी पारी पीड़ जाणे लगी री थी, तेबे तिने तिना खे पीछे मुड़ी की बोलेया, 26“जे कोई मांगे आओ और आपणे माए-बाओ, लाड़ी, बाल-बच्चे, पाई, बईण, बल्कि आपणे प्राणो ते बी बड़ी की मांते प्यार नि करो, तो से मेरा चेला नि ऊई सकदा। 27जे तुसे मेरे चेले बणना चाओए, पर मेरिया तंईं मरने खे त्यार निए और मां पीछे नि आओ, तो तुसे मेरे चेले नि ऊई सकदे। 28तुसा बीचा ते कूणे, जो गढ़ बनाणा चाओआ और पईले बैठी की खर्च नि जोड़ो कि पूरा बनाणे लायक आए कि नई। 29केथी एड़ा नि ओ कि जेबे निऊँ पाई की त्यार नि करी सको और सब देखणे वाल़े ये बोली की तेसरा मजाक ऊड़ाणे लगो 30कि ये मांणू बनाणे तो लगेया, पर त्यार नि करी सकेया। 31या कुण एड़ा राजा ए, जो दूजे राजे साथे लड़ने जाओआ और पईले बैठी की बिचार नि करी लो कि जो बीई ह्जार लई की मां पाँदे चढ़ाई करने आऊणे लगी रा क्या आऊँ दस ह्जार लई की तेसरा सामणा करी सकोआ कि नई। 32नई तो तेसते दूर रई की तेस आपणा दूत पेजी की मिलाप करना चाणा। 33ईंयां ई तुसा बीचा ते जो कोई आपणा सब कुछ नि छाडी देओगा, से मेरा चेला नि ऊई सकदा।

बिना स्वादो रा लूण

(मत्ती 5:13; मरकुस 9:50)

34“लूण तो अच्छा ए, पर जे लूणो रा स्वाद बिगड़ी जाओ, तो से किजी चीजा साथे स्वाद कित्तेया जाणा? 35से ना तो जमीना खे और ना खादा खे कामे आओआ, तेसखे तो लोक बारे सेटी देओए। जो समजी सकोआ से तिजी खे त्यानो साथे सुणो और मानी बी लओ।”