यूहन्ना 9

जन्मो रे अन्दे खे देखणे रा दान

1यीशु और तिना रे चेलेया तीसिए जांदे ऊए एक एड़ा मांणू देखेया, जो जन्मो तेई अन्दा था। 2तेबे तिना रे चेलेया तिना ते पूछेया, “ओ गुरू! किने पाप कित्तेया था, इने मांणूए, जो अन्दा जम्मेया या एसरे माए-बाओ?” 3यीशुए जवाब दित्तेया, “ना तो इने पाप करी राखेया और ना एसरे माए-बाओ कि ये अन्दा जम्मेया, पर ये तेबे ऊआ, ताकि परमेशरो रे सामर्था रे काम एस पाँदे प्रगट ओ। 4जिने आऊँ पेजी राखेया, आसा खे जरूरी ये कि आसे तेसरे काम दिनो-दिने ई नपटयाणा जरूरी ए, कऊँकि से रात आऊणे वाल़ी ए, जिदे कोई काम नि करी सकदा। 5जदुओ तक आऊँ दुनिया रे ए, तदुओ तक, दुनिया री जोति ए।” 6ये बोली की तिने जमीना पाँदे थूकेया और तेस थूको साथे माट्टी सीन्नी कित्ती और से माट्टी तेस अन्दे रिया आखी रे मल़ी की 7तेसखे बोलेया, “जा, और शीलोहो रे कुण्डो रे आपणी आखी तोई लो” (जेतेरा मतलब पेजे राए) तेबे तिने जायी की आखी तोईया और देखदा ऊआ आया। 8तेबे तेस मांणूए रे पड़ोसिये और जिने से पईले पीख मांगदा ऊआ देखेया था, एकी दूजे ते बोलणे लगे, “क्या ये सेई निए, जो बैठेया रा पीख माँगो था?” 9कईए बोलेया, “ये सेईए,” ओरी बोलेया, “ना, ये तो तेसरा हमशक्ल ए।” तिने बोलेया, “आऊँ सेईए।” 10तेबे सेयो तेसते पूछणे लगे, “तेरिया आखी किंयाँ ठीक ऊईगिया?” 11तेबे तिने बोलेया, “यीशु नाओं रे एक मांणूए माट्टी सेड़ी और मेरी आखी रे मल़ी और माखे बोलेया, ‘जा और शीलोहो रे कुन्डो रे आपणी आखी तोई लो।’ तेबे आऊँ कुण्डो रे गया और आखी तोई की देखणे लगी गा।” 12तिने तेसते पूछेया, “से मांणू केयी ए?” तिने बोलेया, “आऊँ नि जाणदा।”

फरीसिया रे जरिए ठीक ऊणे री जांच-पड़ताल़

13तेबे लोक तेसखे, जो पईले अन्दा था, फरीसिये गे लयी गे। 14जेस दिने यीशुए माट्टी सेड़ी की तेसरी आखी ठीक कित्तिया थिया, से आरामो रा दिन था। 15तेबे फरीसिये बी तेसते पूछेया, “तेरिया आखी किंयाँ ठीक ऊईगिया?” तिने बोलेया, “तिने मेरी आखी रे माट्टी लगाई, तेबे मैं तोईया और एबे देखणे लगेया।” 16तेबे कई फरीसी बोलणे लगे, “ये मांणू परमेशरो री तरफा ते निए, कऊँकि से आरामो रा दिन नि मानदा।” ओरी बोलेया, “पापी मांणू किंयाँ एड़े चिह्न् दखाई सकोआ?” तेबे तिना बीचे फूट पड़ी गी। 17तिने तेस अन्दे खे फेर बोलेया, “जिने तेरी आखी कित्तिया ठीक कि तूँ तेसरे बारे रे क्या बोलेया?” तिने बोलेया, “से भविष्यबक्ता ए।”

18पर यहूदिया खे विश्वास नि ऊआ कि ये अन्दा था और एबे देखोआ, जदुओ तक तिने तेसरे माए-बाओ बुलाई की 19सेयो नि पूछी ले, “क्या ये तुसा रा पाऊ ए, जेसखे तुसे बोलोए कि अन्दा जम्मी रा? तेबे एबे किंयाँ देखोआ?” 20तेसरे माए-बाओ बोलेया, “आसे ये तो जाणूंए कि ये आसा रा पाऊ ए और जन्मो ते अन्दा था। 21पर ये नि जाणदे कि किंयाँ देखणे लगी गा और ना ई ये जाणदे कि किने एसरिया आखी ठीक कित्तिया। से छोटा जा बच्चा निए, तेसते ई पूछी लो, तेस आपणे बारे रे आपू ई बताई देणा।” 22यो गल्ला तिने तेबे बोलिया कऊँकि, सेयो यहूदी अगुओ ते डरो थे, कऊँकि यहूदी अगुवे एक मत ऊई चुके थे कि जे कोई ये विश्वास करोगा कि से मसीह ए, तो से प्रार्थना रे कअरो ते निकयाल़ी देणा। 23इजी री बजअ ते तेसरे माए-बाओ बोलेया, “से छोटा जा बच्चा निए, एसते ई पूछी लो।”

24तेबे यहूदी अगुवे तेस मांणूए ते, जो अन्दा था, दूजी बार बुलाई की तेसखे बोलेया, “परमेशरो खे गवा मानी की सच बोल, आसे तो जाणूंए कि से मांणू पापी ए।” 25तिने बोलेया, “आऊँ नि जाणदा कि से पापी ए कि नई, आऊँ एक गल्ल जाणूंआ कि आऊँ पईले अन्दा था और एबे देखी सकूँआ।” 26तिने तेसखे फेर बोलेया, “तिने तां साथे क्या कित्तेया और तेरी आखी किंयाँ ठीक कित्तिया?” 27तिने तिना खे बोलेया, “आऊँ तो तुसा खे बोली चुकेया रा और तुसेई नि सुणेया, एबे दूजी बार कऊँ सुणना चाओए? क्या तुसे बी तेसरे चेले बणना चाओए?” 28तेबे सेयो तेसखे खरा-बुरा बोलणे लगे, “तूँ ई तेसरा चेला ए, आसे तो मूसे रे चेले ए। 29आसे जाणूंए कि परमेशरे मूसे साथे गल्ला कित्तिया, पर एस मांणूए खे नि जाणदे कि केथो राए?” 30तिने तिना खे बोलेया, “ये तो हैरानिया री गल्ल ए कि तुसे नि जाणदे कि से केथो राए, तेबे बी तिने मेरिया आखी ठीक कित्तिया। 31आसे जाणूंए कि परमेशर पापिया री नि सुणदा, पर जे कोई परमेशरो रा भक्त ओ और तेसरी इच्छा पाँदे चलोआ, तो से तेसरी सुणोआ। 32दुनिया री शुरूआता ते ये कदी बी सुणने बीचे नि आया कि किने बी जन्मो रे अन्दे रिया आखी ठीक कित्तिया ओ। 33जे ये मांणू परमेशरो री तरफा ते नि ऊँदा, तो कुछ पनि करी सको था।” 34तिने तेसखे जवाब दित्तेया, “तूँ तो बिल्कुल पापो ते जम्मी रा, तूँ आसा खे क्या सिखाएया?” और तिने से बारे निकयाल़ी ता।

आत्मिक अन्दापण

35जेबे यीशुए सुणेया कि तिने से बारे निकयाल़ी ता, तेबे सेयो तेसखे मिले और बोलेया, “क्या तूँ माणूं रे पुत्रो पाँदे विश्वास करेया?” 36तिने जवाब दित्तेया, “ओ प्रभु! से कुणे कि आऊँ तेस पाँदे विश्वास करूँ?” 37यीशुए तेसखे बोलेया, “तैं से देखी बी राखेया और जो तां साथे जपणे लगी रा से येईए।” 38तिने बोलेया, “ओ प्रभु! आँऊ विश्वास करूँआ।” और तिने तिना गे माथा टेकेया। 39तेबे यीशुए बोलेया, “आँऊ एसा दुनिया पाँदे न्याय करने आयी रा ताकि जो देखदे नि,सेयो देखो और जो देखोए, सेयो अन्दे ऊई जाओ।” 40जो फरीसी तिना साथे थे तिने यो गल्ला सुणी की तिना खे बोलेया, “क्या आसे बी अन्दे ए?” 41यीशुए तिना खे बोलेया, “जे तुसे अन्दे ऊँदे तो पापी नि ऊँदे, पर एबे बोलोए कि आसे देखूँए, तेबेई तो तुसा रा पाप बणेया रा रओआ।”