इब्रानियों 2

महान् उद्धार

1तेबेई आसा खे जो कुछ सिखाई राखेया था तिजी खे मानणे खे आसा खे ओर त्यान देणा चाईयो। केथी एड़ा नि ओ कि आसे सच्चाईया ते पटकी जाईए। 2जे स्वर्गदूता रे जरिए दित्तेया रा संदेश इतणा सच साबित ऊआ और हर एक लोक जिने आज्ञा नि मानी तिना खे ठीक-ठीक सजा मिली, 3तो आसे लोक एड़े महान् उद्धारो खे नजरअंदाज करी की किंयाँ बची सकूँए? एस महान् उद्धारो रा एलान सबी ते पईले प्रभु यीशुए आपू कित्तेया। जिने लोके प्रभुए खे सुणेया तिने लोके तिना रे संदेशो खे सच साबित कित्तेया। 4साथे ई परमेशर बी आपणी इच्छा रे मुताबिक चिह्न्, अचम्बे रे काम, कई प्रकारा रे सामर्था रे काम और पवित्र आत्मा रे बरदानो खे बांडणे रे जरिए इजी री गवाई देओआ।

म्हारा उद्धार करने वाल़ा

5परमेशरे तेसा आऊणे वाल़िया दुनिया खे, जेतेरी चर्चा आसे करने लगी रे, स्वर्गदूता रे वशो रे नि कित्तेया, पर आपणे पाऊए रे वशो रे कित्तेया। 6पवित्र शास्त्रो रे केसी जगा रे कोई ये गवाई देओआ,

“मांणू क्या ए कि तूँ तेसखे याद करो?

माणूंआ रे बच्चे क्या ए कि तूँ तिना री फिकर करेया?

7तैं से स्वर्गदूतो ते कुछ ई कम कित्तेया;

तैं तिना पाँदे महिमा और आदरो रा मुकुट राखेया।

8तैं सब कुछ तिना लोका रे वशो रे करी ता।”

तेबे जबकि तिने सब कुछ तिना रे वशो रे करी ता, तो तिने कुछ पनि राखेया, जो तिना रे वशो रे नि ओ। सच्ची आसे एबे ये नि देखदे कि सब कुछ तिना रे वशो रे ए। 9पर आसा खे प्रभु यीशु, जेसखे स्वर्गदूता ते थोड़े बखतो खे कुछ ई कम कित्तेया था, मौता रा दु:ख उठाणे री बजअ ते, महिमा और आदरो रा मुकुट पईने रा देखूँए, ताकि परमेशरो री कृपा ते से हर एक मांणूए री खातर मरो।

10सब कुछ परमेशरो राए और सब कुछ तिना री ई सामर्था रे जरिए बणाई राखेया, तेसखे येई खरा लगेया कि जेबे से बऊत पाऊआ खे महिमा रे पऊँछाओ, तो तिना रे उद्धारकर्ता खे दु:ख उठाणे रे जरिए सिद्ध करो। 11कऊँकि पवित्र करने वाल़ा यीशु और जो पवित्र कित्ते जाओए, सबी रा एक ई पिता ए, मतलब परमेशर, इजी बजअ ते यीशु तिना खे पाई और बईण बोलणे ते नि शर्मांदा। 12मसीह परमेशरो ते बोलोआ,

“मां तेरा नाओं आपणे पाईया गे सुनाणा,

सभा बीचे मां तेरी तारीफ करनी।”

13फेर से ये बोलोआ,

“मां तेस पाँदे परोसा राखणा”

और फेर से ये बी बोलोआ,

“आँऊ एती तिना लोका साथे ए जिना खे परमेशरे माखे देई राखेया; सेयो बच्चेया जेड़े ए।”

14तेबेई जेबे परमेशरो रे बच्चे मांस और खूनो रे इस्सेदार ए, तो यीशु आपू बी तिना जेड़ा बणीगा, ताकि मौता रे जरिए तेसखे, जेसखे मौता पाँदे शक्ति मिली थी, मतलब शैतानो खे नकम्मा करी ता 15और ईंयां यीशुए जितणे मौता रे डरो रे मारे पूरी जिन्दगी गुलामिया रे फसी रे थे, तिना खे छुड़ाई लो।

16कऊँकि यीशु तो स्वर्गदूता खे नि, बल्कि अब्राहमो रे वंशो खे सम्बाल़ोआ। 17तेबेई तो तेसखे चाईयो था कि सारिया गल्ला रे आपणे पाईया जेड़ा बणो, ताकि से तिना गल्ला रे जो परमेशरो साथे रिश्ता राखोईया, एक दया करने वाल़ा और विश्वासो जोगा प्रदान पुरोईत बणो, ताकि लोका रे पापो खे प्राश्चित करो। 18कऊँकि जेबे यीशुए परीक्षा री दशा रे दुःख उठाया, तो से तिना री बी मताद करी सकोआ, जिना री परीक्षा ओई।