गलातियों 2

दूजे चेलेया रे जरिए पौलुसो खे मान्यता

1चौदा साल बाद आऊँ बरनबासो साथे यरूशलेम नगरो खे फेर गया और तीतुसो खे बी आपू साथे लयी गा। 2आँऊ तेती गया कऊँकि परमेशरे माखे ये प्रकट कित्तेया कि आँऊ तेती जाऊँ। मैं तेती जो मण्डल़िया रे जाणे-माणे रे अगुवे थे लग जे मिली की तिना खे बताई ता कि आऊँ दुजिया जातिया बीचे सुसमाचार प्रचार करूँआ। ताकि एड़ा नि ओ कि मेरे एस बखतो री या आगली दौड़-तूप बेकार ओ। 3तीतुस जो मां साथे आया था से यूनानी था और बिना खतने रा था। पर यरूशलेम नगरो री मण्डल़िया रे तिने अगुओ से अपनाया और खतना कराणे खे मजबूर नि कित्तेया। 4तीतुसो रा बिना खतने ते ऊणा एक मसला बणीगा। ये तिना चूठे पाईया री बजअ ते ऊआ, जो चोरिए कूसी की आए थे, ताकि तेसा आजादिया रा जो मसीह यीशुए रे आसा खे मिली री, पेत लयी की आसा खे दास बणाओ। 5पर आसे तिना लोका री गल्ला ते एक कअड़िया खे बी सईमत नि ऊए, ताकि सुसमाचारो री सच्चाई तुसा रे बणी री रओ।

6जो लोक जाणे-माणे रे अगुवे थे सेयो चाए केड़े बी थे, इजी ते मेरे बचारा रे कोई फर्क नि पड़दा। कऊँकि परमेशर मूँ देखेया न्याय नि करदा। तिना लोका ते माखे कुछ बी नवां उपदेश नि मिलेया। 7इजी ते लग तिने लोके समजेया कि जेड़ा यहूदी लोका खे सुसमाचार सुनाणे रा काम पतरसो गे देई राखेया, तेड़ा ई दूजिया जातिया रे लोका खे सुसमाचार सुनाणे रा काम परमेशरे माखे देई राखेया। 8कऊँकि जिने परमेशरे पतरसो खे यहूदिया रा प्रेरित बणाई की तिना रे जरिए सेवा रा काम कित्तेया, तिने ई परमेशरे माखे बी दुजिया जातिया रा प्रेरित बणाई की मेरे जरिए सेवा रा काम कित्तेया। 9जो लोक मण्डल़िया रे खम्बे समजे जाओ थे मतलब याकूब, कैफा और यूहन्ना तिने कृपा रा से वरदान पछयाणेया जो माखे मिलेया। तिने माखे और बरनबासो खे आपणे साथी समजी की आसा खे सहभागिता रा दाँणा आथ दित्तेया। सेयो एते गल्ला खे सईमत ऊए कि आसे दुजिया जातिया गे सुसमाचार सुनाणे खे जाऊँ और सेयो यहूदिया गे जाओ। 10तिने बस आसा ते येई बिनती कित्ती कि आसे यरूशलेम नगरो रे गरीब विश्वासिया री मताद करिए और एस ई कामो खे करने री आऊँ आपू बी कोशिश करने लगी रा था।

पौलुसो रे जरिए पतरसो रा बिरोद

11पतरसो रा अन्ताकिया नगरो रे आऊणे ते बाद एक दिन मैं तेसरा लोका रे सामणे बरोद कित्तेया, कऊँकि जो से करने लगी रा था से गल़त था। 12से पईले दुजिया जातिया साथे रोटी खाया करो था, पर जेबे याकूबो री तरफा ते कुछ यहूदी लोक आये, तो खतना कित्ते रे यहूदी लोका रे डरो रे मारे से तिना ते पीछे आटीगा और कनारा करने लगेया। 13और तेस साथे बाकि यहूदी विश्वासिये बी कपट कित्तेया, एथो तक कि बरनबास बी तिना रे कपटो रे पड़ी गा।

14पर जेबे मैं देखेया कि सेयो सुसमाचारो री सच्चाईया पाँदे सीदी चाल नि चलदे, तो मैं सबी सामणे पतरसो खे बोलेया, “जेबे तूँ यहूदी ऊई की दुजिया जातिया जेड़े चलेया और यहूदिया जेड़ा निए, तो तूँ दुजिया जातिया खे यहूदिया जेड़े चलणे खे कऊँ बोलेया?

विश्वासो रे जरिए तर्मी ठईरना

15“आसे जो जन्मो रे यहूदी ए और ‘पापी दूजी जाति’ निए, जेड़ा कि आसे यहूदी तिना खे दुजिया जातिया रे बोलोए। 16तेबे बी आसे ये जाणूंए कि मांणू मूसे रा बिधानो रे कामो ते तर्मी नि ठईरदा। पर बस यीशु मसीह पाँदे विश्वास करने ते तर्मी ठईरोआ। आसे आपू बी यीशु मसीह पाँदे विश्वास कित्तेया, कि आसे बिधानो रे कामो ते नि पर मसीह पाँदे विश्वास करने ते तर्मी ठईरूँ। कऊँकि बिधानो रे कामो ते कोई मांणू तर्मी नि ठईरना।

17“कुछ यहूदी सोचोए कि बस यीशु मसीह पाँदे विश्वास करी की आसे पाप कित्तेया। कऊँकि आसे तर्मी बणने खे बिधानो खे मानणे री बजाये बस मसीह पाँदे विश्वास करूँए। तो क्या मसीह पापो रा पालण-पोषण करने वाल़े ए? कदी पनि! 18पर जे आँऊ फेर सेई बिधानो खे मानणे रा काम करूँ जो मैं छाडीता था, तो आपणे आपू खे अपराधी ठराऊँआ।

19“कऊँकि आऊँ तो बिधानो रे जरिए बिधानो खे मरी गा, ताकि आँऊ परमेशरो री खातर जिऊँ। 20आऊँ मसीह साथे क्रूसो पाँदे चढ़ाया। आऊँ एबे जिऊँदा नि रया, पर मसीह मांदे जिऊँदा ए। आऊँ शरीरो रे जो एबु जिऊँदा ए, तो बस तेस विश्वासो ते जिऊँदा ए, जो परमेशरो रे पुत्रो पाँदे ए, जिने माखे प्यार कित्तेया और मेरी खातर आपू खे देईता। 21आऊँ परमेशरो री कृपा बेकार नि ठराई सकदा। जे बिधानो रे जरिए धार्मिकता ऊँदी, तो मसीह रा मरना बेकार ऊँदा।”