प्रेरितों 28

माल्टा टापूए रे पौलुस

1जेबे आसे सब यात्री कनारे पाँदे ठीक-ठाक पऊँछी गे, तेबे आसा खे पता लगेया कि एस टापूओ खे माल्टा बोलोए। 2तेथो रे रणे वाल़े लोके आसा पाँदे नऊखा प्यार दखाया, कऊँकि बादल़ बरसणे री बजअ ते ठण्ड थी, तेबे तिने आग सुल़गाई की आसे सब ठराए। 3जेबे पौलुसे लकड़ुआ रा पारा (गट्ठा) कट्ठा करी की आगी पाँदे राखेया, तेबे एक साप आगी रे सेको रे निकल़ेया और तेसरे आथो रे लिपटी गा। 4जेबे तेथो रे रणे वाल़ेया साप तेसरे आथो रे लटकेया रा देखेया, तेबे आपू बीचे बोलेया, “सच्ची ये मांणू अत्यारा ए, हालाँकि समुद्रो ते बची गा, पर तेबे बी न्यायी देविए जिऊँदा नि रणे दित्तेया।” 5पौलुसे साप आगी रे चड़ाकी ता और तेसखे कोई नुकशाण नि ऊआ। 6पर सेयो लोक न्याल़दे रये कि तेसरे सोजा आयी जाणा या एकदम रूड़ी की मरी जाणा, पर जेबे सेयो बऊत देर तक देखदे रये कि एसरा कुछ नि बिगड़ेया, तेबे तिने ओर ई बिचार कित्तेया और बोलेया, “ये तो कोई देवता ए।”

7तेसा जगा रे नेड़े-तेड़े तेस टापूओ रे प्रदान पुबलियुसो री जमीन थी। तिने आसे आपणे कअरे दोस्ता जेड़े निए और तीन दिन तक प्यारो साथे पराऊणचारी कित्ती। 8पुबलियुसो रा पिता बुखार और खूनो री आंवा रा रोगी था, तेबे पौलुसे तेसरे कमरे रे जाई की तेसखे प्रार्थना कित्ती और तेस पाँदे आथ राखी की से ठीक कित्तेया। 9जेबे एड़ा ऊआ, तेबे तेस टापूओ रे बाकी बमार बी पौलुसो गे आईगे और तिने सेयो ठीक कित्ते। 10तिने आसा री बऊत आओ-बैठ कित्ती और जेबे आसे तेथा ते तीन मीन्ने बाद चलणे लगे, तेबे जो कुछ आसा खे जरूरी था, से जाह्जो पाँदे राखी ता।

माल्टा टापूए ते रोमो री तरफा खे

11तीन मीन्ने ते बाद आसे सिकन्दरिया रे एक जाह्जो पाँदे चली पड़े, जो तेस टापूओ पाँदे ठण्ड पड़ने री बजअ ते रूकेया रा था। तेते जाह्जो रे आगले इस्से पाँदे एक जोड़ी देवतेया री मूरत दियुसकूरी गढ़ी री थी। 12सुरकूसा नगरो रे लंगर पाई की आसे तेती तीन दिन तक रये। 13तेथा ते आसे कूमी की रेगियुम नगरो रे आए और एक दिन बाद दक्खणो ते अवा चली, तेबे आसे दूजे दिने पुतियुले नगरो रे आए। 14तेती आसा खे विश्वासी पाई मिले और तिना रे बोलणे पाँदे आसे तिना रे कअरे सात दिन तक रये और तेबे रोमो खे चली गे। 15रोमो ते कुछ विश्वासी पाई आसा रा समाचार सुणी की कि आसे तेती आऊणे लगी रे सेयो अप्पियुसो रे चौको रे और तीन सराँए तक आसा खे मिलणे खे आए, जिना खे देखी की पौलुसे परमेशरो रा धन्यवाद कित्तेया और इम्मत बानी। 16जेबे आसे रोम नगरो रे पऊँछे, तेबे पौलुसो खे एक सिपाईए साथे, जो तेसरी रखवाल़ी करो था, कल्ले रणे री आज्ञा मिली।

रोमो रे पौलुस

17तीन दिना ते बाद तिने यहूदिया रे खास लोक बुलाए और जेबे सेयो कट्ठे ऊए तो तिना खे बोलेया, “ओ पाईयो, मैं आपणे लोका रे या आपणे बाप-दादेया रे व्यवहारो रे बिरोदो रे कुछ नि बोलेया, तेबे बी कैदी बणाई की यरूशलेमो ते रोमी सरकारा रे आथो रे सम्बाल़ी ता। 18तिने आऊँ परखी की छाडणा चाया, कऊँकि मांदे मृत्यु-दण्डो जोगा कोई दोष नि था। 19पर जेबे यहूदी अगुवे इजी रे बिरोदो रे बोलणे लगे, तेबे माखे कैसरो ते विनती करनी पड़ी, ये सोची की नि कि मां आपणे लोका पाँदे कोई दोष लगाणा था। 20इजी री खातर मैं तुसे बुलाई राखे ताकि तुसा साथे मिलूँ और बातचीत करुँ, कऊँकि इस्राएलो री उम्मीदा खे आऊँ इना जंजीरा रे जकड़ी रा।” 21तिने तेसखे बोलेया, “ना आसा खे तेरे बारे रे यहूदिया प्रदेशो ते चिट्ठिया मिलिया और ना ई विश्वासी पाईया बीचा ते आयी की किने तेरे बारे रे कुछ बताया और ना ई बुरा बोलेया। 22पर तेरा बिचार क्या ए? सेई आसा तांते सुणना चाऊँए, कऊँकि आसे जाणूंए कि हर जगा रे एस मतो रे बिरोदो रे लोक गल्ला करोए।”

23तेबे तिने पौलुसो खे एक दिन ठराया और बऊत लोक तेसरे गे कट्ठे ऊए और से परमेशरो रे राज्य री गवाई देंदा ऊआ और मूसे रा बिधान और भविष्यबक्तेया री कताबा ते प्रभु यीशुए रे बारे रे समजयाई-समजयाई की प्यागा ते साँजा तक बोलदा रया। 24तेबे कुछ जणेया सेयो गल्ला मानी लईया और कुछ जणेया विश्वास नि कित्तेया जो पौलुसे बोलिया थिया। 25जेबे सेयो आपू बीचे एक मत नि ऊए, तेबे पौलुसो री एसा एक गल्ला बोलणे पाँदे चली गे, “पवित्र आत्मे यशायाह भविष्यबक्ते रे जरिए तुसा रे बाप-दादेया खे ठीक ई बोलेया,

26“जाई की इना लोका खे बोल कि सुणदे तो रणे, पर समजणे नि

और देखदे तो रणे, पर दिशणा नि।

27कऊँकि इना लोका रा मन मोटा और तिना रे कान पारी ऊईगे रे और तिने आपणी आखी बंद करी ती रिया,

एड़ा नि ओ कि सेयो कदी आखी ते देखो और कानो ते सुणो और मनो ते समजो और फिरो और आऊँ तिना खे ठीक करुँ।

28“तेबे तुसे जाणो कि परमेशरो रे एस उद्धारो री कथा दुजिया जातिया गे पेजी ती री और तिना सुणनी।” 29जेबे तिने ये बोलेया तो यहूदी आपू बीचे बऊत बईस करने लगे और तेथा ते चली गे। 30से पूरे दो साल तक आपणे खर्चे रे कअरो रे रया 31और जो तेसगे आओ थे, तिना सबी ते मिलदा रया और बिना रोका-टोका ते बऊत निडर ऊई की परमेशरो रे राज्य रा प्रचार करदा ऊआ और प्रभु यीशु मसीह री गल्ला सिखांदा रया।