रूत

रूत

मोआब देशा का आणी दी नुश हुई इज़राईला दी मशूर

भेत

लिखणैं आल़अ: एही निं थोघै पर कई बोला इहअ कि अह कताब आसा शमूएल गूरै लिखी दी।

सन: 1030 का 1010 ईसा आजी

पहल़णैं आल़ै: इज़राईली

ऐहा कताबा दी आसा तेऊ ज़मानें गल्‍ला ज़धू इज़राईली प्रैंदै पांच़ो राज़ हआ त। एथ आसा इहअ कि एकी मोआब देशे बेटल़ी किअ इज़राईली संघै बैह। तेसे लाल़ै मरनै का बाद बी रही सह शुची-पाक्‍की आपणीं शाशुईए च़ाकरी करदी लागी अर तेसे दिलै ती इज़राईले परमेशरा लै बी खास ज़ैगा। अह टबर हुअ इज़राईली लै बादा का सोभी का खास किल्हैकि तैहा मोआबी बेटल़ीए आद-लुआदा मांझ़ै ई का थिअ आजू दाबेद राज़अ।

रूता का लाऊआ आसा ऐहा कताबा दी तेसे शाशअ नाओमी ज़ुंण आपणैं लाल़ै अर दूई शोहरू संघै बेतलेम नगरी का मोआब देशा लै डेऊऐ तै। लाल़ै अर आपणैं दुही शोहरू मरनै का बाद आई सह बेतलेम नगरी लै बापस फिरी अर तेसे दूई नुशा लै बोलअ तैहा पेऊकै डेऊणा लै। ज़ेठी डेऊई पेऊकै लै फिरी पर कान्हीं रूत नाओंए नुश निस्सी तैहा छ़ाडी। बादा का किअ नाओमी रूतो बैह आपणैं ई टबरा बाखे एकी बोआज़ नाओंए मणछा संघै।

बधाने साबै निं मोआबी इज़राईली बणी सकदै तै। पर ऐहा कताबा दी लागा हाम्हां का थोघ कि रूत रही बिधाता लै पठी शुची-पाक्‍की अर तैहा भेटी इज़राईली संघै रल़णें ज़ाज़त। रूत बोला ती नाओमी लै इहअ,

“ज़िधा लै तूह डेओए, मुंह डेऊणअ ताह संघै तिधा लै अर रहणअ बी मुंह तिधी ज़िधी तूह रहे। ज़ुंण लोग तेरै आसा, मेरै बी हणैं तिंयां ई अर ज़ुंण परमेशर तेरअ आसा सह ई हणअ मेरअ बी परमेशर। ज़िधी तूह मरे, मुंह बी मरनअ तिधी अर दाबी बी लोल़ी हुंह तिधी ज़िधी लोग ताह दाबै। मुल्है लोल़ी बिधाते घोर सज़ा पल़ी ज़ै हुंह मौता का सुआई किज़ू होरी गल्‍ला पिछ़ू ताखा ज़ुदी होए।”

(1:16,17)

कताबे बांड

नाओमी आई आपणीं नुशा संघै बेतलेम नगरी लै बापस फिरी 1:1-22

रूत डेऊई बोआज़े खेचै 2:1—3:18

बोआज़ै किअ रूता संघै बैह 4:1-22