मलाकी

मलाकी

बिधातो गूर मलाकी

भेत

लिखणैं आल़अ: मलाकी

सन: 430 ईसा आजी

अह कताब आसा तेऊ ज़मानै बाद लिखी दी ज़धू यहूदा मुल्खे कई मणछ बाबेल देशे गलामी का फिरी आऐ तै, पर एज्रा अर नहेमया बापस फिरनैं का थोल़ी आजी। बिधातो भबन त भिई हेरअ द च़िणीं अर प्रोहत तै बिधाते च़ाकरी करदै लागी गऐ दै। पर तिन्‍नां धैल़ै बी आसा ती खास्सी खरी अर लोगै तै हैअ ई हेरअ द चोल़ी कि यहूदा बी कधू भरपूर हणअ होए।

प्रोहत अर यहूदा मुल्खे परज़ा निं बिधाते तेही कदर करदै आथी तै ज़ेही हुई लोल़ी दी। बल़ीदान बी करा तै तिंयां नथोघै अर नां बधाने साबै राम्बल़ी ज़िन्दगी ज़िऊंदै तै ज़िहअ हुअ लोल़ी त। तिंयां तै रैनै-गरीब मणछा हंतदै लागै दै, होर ता होर लोग दैआ तै आपणीं बेटल़ी हेरा-हेरी छ़ाडी।

मलाकी दैनी लोगा लै चतैनगी, खासकर प्रोहता लै, कि बिधाता ज़ुंण करार इज़राईला संघै आसा किई दी, तेता लै रहा शुचै-पाक्‍कै। प्रोहता लागा त तिहअ ई बल़ीदान करनअ ज़िहअ बधाना दी आसा खोज़अ द, अर परज़ा लागा त बिधाता लै आपणीं साल-फसला का दसुअ निसब बिधाता लै ज़रूर दैणअ। तैही दैणीं ती बिधाता तिन्‍नां लै बर्गत।

“आपणीं साल-फसल अर कमाई मांझ़ै आणा दसुअ निसब मेरै भबना लै, ताकि मेरै भबनै खाण-पींण पुगतअ रहे। ज़िहअ हुंह बोला तिहअ करा, तेखअ भाल़ै तम्हैं कि मुंह किज़ै करनअ। इहअ बोला हुंह बिधाता ज़ुंण स्वर्गे सारी सैनो मालक आसा। तम्हां का जाणअ शुझुई कि मुंह तम्हां लै केही खास्सी बर्गत दैणीं! ज़ेतरी च़िज़ा मुंह तम्हां लै दैणीं तेता करै हणैं थारै घअर भरी, मुंह दैणीं तम्हां लै बर्गत सरगा का पाणीं ज़ेही तरैल़ी।”

(3:10)

कताबे बांड

बिधाता झ़ूरा इज़राईला लै 1:1-5

प्रोहता का सुआल 1:6—2:9

करार ज़ुंण खतम किई 2:10-17

प्रभू एछणअ धरती लै 3:1-4

बिधाता लै विश्वास घात निं करा 3:5-15

बिधाता दैणीं धर्मीं लै नांम अर कदुष्ट मणछा लै सज़ा 3:16—4:6