Kulvi Outer Seraji Bible
ज़ैहसू 6
जेरिहो नगरीओ बनाश
इज़राईली डरै ती जेरिहो नगरीए प्रऊल़ी हूल़ी डाही दी, नां कुंण नगरी भितरी एछी सकदअ त अर नां बागै डेऊई सकदअ त। तेखअ बोलअ बिधाता ज़ैहसू लै, “जेरिहो नगरी लाई मंऐं राज़ै अर तेऊए सैना संघी तेरै बशै करी। तूह अर तेरी सैना करै छ़हा धैल़ी तैणीं धैल़ नगरी फेर धैल़ीए एक फेरी दैई। सात प्रोहत हांढै करारे मणशू आजू-आजू गाभे शगैठे नर्शिंगै लई। तेखअ दैऐ सातुई धैल़ी नगरी फेर सात फेरी अर तिंयां प्रोहत रहै नर्शिंगै बाज़दै लागी। ज़ांऊं प्रोहत खास्सी घल़ी तैणीं कोहरै शाहै नर्शिंगै बाज़े, तेता शूणीं करै सारी परज़ा ज़ोरै-ज़ोरै ज़ै-ज़ैकार अर तेभी ढुल़णीं नगरी फेर फिरदी दुआल गोधी का धरनीं। तेखअ सका तेरी सैना ज़िधी आसा तिधा ई का तिन्नां सम्हनै उझै उखल़ी नगरी भितरा लै ठुर्ही।”
नूने शोहरू ज़ैहसू शादै प्रोहत संघा किअ तिन्नां लै हुकम, “बिधाते करारो मणशू च़का अर तम्हां मांझ़ै हांढा सात ज़ण्हैं रिठे सात नर्शिंगै लई तेता आजू-आजू।” तेखअ किअ ज़ैहसू लोगा लै हुकम कि करारे मणशू पिछ़ू एछा नगरी फेर फेरी दैई अर अस्त्र-शस्त्रा आल़ै शूरबीर हांढा बिधाते करारे मणशू आजू।
ज़िहअ ज़ैहसू लोगा लै हुकम किअ, तिहै ई लागै सात प्रोहत बिधाते करारे मणशू आजू-आजू नर्शिंगै बाज़दी-बाज़दी हांढदै। तिन्नां सोभी का आजू डेऊऐ अस्त्र-शस्त्रा आल़ै इज़राईली शूरबीर अर बाकी लोग रहै करारे मणशू पिछ़ू हांढदै लागी अर तिंयां प्रोहत रहै नर्शिंगै बाज़दै लागी। ज़ैहसू त सोभी लै इहअ डाहअ द बोली कि ज़ेभै तैणीं हुंह आप्पै तम्हां लै ज़ै-ज़ैकार करनैओ हुकम निं करे तेभै तैणीं रहै सोभै च़ुप्प-च़ुप्पै हांढदै लागी आप्पू मांझ़ै बी निं गल्ला करी। इहअ करै दैनी ज़ैहसू अर तिन्नैं सोभी बिधाते करारे मणशूए नगरी फेर फेरी संघा पुजै आपणैं खिम्भे डेरै दी बापस फिरी संघा काटी सह राच तिधी।
दुजै धैल़ै गअ ज़ैहसू दोत्थी उझ़ुई तेखअ निखल़ै तिंयां फेरी लै, ज़िहअ तिन्नैं पैहली धैल़ी किअ त, तेऊ ई साबै लागै सोभी का आजू अस्त्र-शस्त्रा आल़ै शूरबीर हांढदै। तिन्नां पिछ़ू लागै गाभे शगैठे नर्शिंगै बाज़दी सात प्रोहत हांढदै, तेता पिछ़ू बिधाते करारे मणशू च़की प्रोहत अर सोभी का पिछ़ू बी तै अस्त्र-शस्त्रा आल़ै शूरबीर हांढदै। प्रोहत रहै नर्शिंगै बाज़दै लागी। ऐहा दुजी धैल़ी बी दैनी तिन्नैं नगरी फेर फेरी संघा पुजै आपणैं डेरै फिरी। इहै ई रहै तिंयां छ़हा धैल़ी तैणीं धैल़ नगरी फेर एक-एक फेरी दैंदै लागी।
सातुई धैल़ी1 बी गऐ तिंयां दोत्थी उझ़ुई, संघा दैनी तिन्नैं नगरी फेर सात फेरी। सिधी सातुई धैल़ी दैनी तिन्नैं सात फेरी। सातुई बारी ज़ांऊं प्रोहतै नर्शिंगै बाज़ै, ज़ैहसू बोलअ लोगा लै, “ज़ै-ज़ैकार करा, अह नगरी दैनी बिधाता तम्हां लै! नगरी अर एते हर च़िज़ा करै पठ खतम किल्हैकि ईंयां आसा बिधाता लै अर्पण। सिधी रहाब कंज़री अर तेसे नातै-रिश्तैदार डाहणैं ज़िऊंदै किल्हैकि तैहा दैनअ त तिन्नां दूता लै आसरअ ज़ुंण हाम्हैं ऐहा नगरीए भेख लंदै छ़ाडै तै।2 पर तम्हैं डाहै खैल, ज़ुंण च़िज़ा पठी खतम करनी, तेता का निं आप्पू लै किछ़ै लागी डाहंदै, इहअ करी निं इज़राईली लै आफ़त अर बरैबादी पाई। सुन्नैं-च़ंदी, कांस्सै अर लोहे बणाऐं दै चाण-भांडै डाहै बिधाता लै ज़ुदै अर तिन्नां करै बिधाते भढारै कठा।”
प्रोहतै बाज़ै नर्शिंगै अर तेता शूणीं लागै सोभै लोग ज़ोरै-ज़ोरै ज़ै-ज़ैकार करदै अर नगरी फेर-फिरदी दुआल ढूल़ी गोधी का धरनीं अर इज़राईली सारी सैना पेठी फेरा-फेर ज़िधी तिंयां थिऐ, तिधी का नगरी भितरी संघा किअ तैहा सारी नगरी कबज़अ।3 इज़राईली पाऐ नगरी दी होछ़ै-प्रोढै, मर्ध-बेटल़ी सोभै मारी। तिन्नैं निं डागै-धअण, भेडा-बाकरी अर गाधै बी ज़िऊंदै छ़ाडै।
ज़ैहसू पुछ़ै तिंयां दूई ज़ण्हैं ज़ुंण तैहा नगरीए भेख लंदै आऐ तै, “तैहा राहाब कंज़रीए घअरै डेओआ, संघा आणा तैहा अर तेसे नातै-रिश्तैदारा बागा लै, ज़ेही तम्हैं तैहा लै ज़बान आसा दैनी दी।” ज़िहअ ज़ैहसू हुकम किअ, तिंयां डेऊऐ तेसे घअरा लै संघा आणी तिन्नैं राहाब बागा लै। तेसे ईज-बाब, भाई-बैहणी, टबर अर सोभ रिश्तैदार ज़ुंण तेसे घअरै थिऐ तिंयां बी आणै तैहा ई संघै, संघा डाहै इज़राईली डेरै नेल़ बशैल़ी। तेखअ चैल़ी तिन्नैं सारी नगरी आग अर सोभ च़िज़ा किई दहई खतम। सिधी सुन्नैं-च़ंदी, कांस्सअ अर लोहे चाण-भांडै निंयैं तिन्नैं, संघा डाहै बिधाते पबित्र ज़ैगा भढारै। ज़ैहसू डाहै राहाब कंज़री अर तेसे सोभ नातै-रिश्तैदार ज़िऊंदै। आझ़ बी आसा तिन्नें खिंब आजू इज़राईली संघै रहंदै लागै दै। किल्हैकि ज़ुंण दूत ज़ैहसू जेरिहो नगरीए भेख लंदै छ़ाडै तै, तैहा डाहै तै तिंयां च़ोरी।
तेखअ दैनी ज़ैहसू तेभी सोह काढी सोभी इज़राईली लै चतैनगी, “ज़ुंण बी ऐहा जेरिहो नगरी भिई बणाणें कोशिश करे, तेऊ लागणअ बिधातो फिटक,
‘तेते आथरी च़िणदा बारी मरनअ तेऊओ ज़ेठअ शोहरू,
अर तेते प्रऊल़ी बान्हदा बारी मरनअ तेऊओ कान्हअ शोहरू।’” 4
बिधाता रहअ ज़ैहसू संघै अर तेऊ किअ सह सोभी कामां लै सफल, इहअ करै हुअ सह सारै कनान देशै मशूर।
Source notes (4)
- Footnote सातुई धैल़ी सातुई धैल़ीओ मतलब थिअ तिन्नें बधाने साबै इहअ कि तिन्नां लागा ती तैहा धैल़ी दोत्ती-दोत्थी नगरी फेर सात फेरै दैणी
- Cross-reference लेब. 27:28-29
- Cross-reference इब्रा. 11:30
- Cross-reference 1 राज़. 16:34
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.