Kulvi Outer Seraji Bible
ज़ैहसू 3
इज़राईली डेऊऐ जरदण नदी टपी पारा बाखा लै
दुजै धैल़ै दोत्ती गऐ ज़ैहसू अर सारै इज़राईली दोत्थी उझ़ुई, तिन्नैं खोल्है शितीम आपणैं खिम्भ संघा आऐ जरदण नदीए बाढै अर पार टपणै का आजी पाऐ तिन्नैं तिधी डेरै। चिई धैल़ै बाद डेऊऐ इज़राईली टोलीए सैणैं खिम्भे डेरै जैंदरी संघा किअ इहअ हुकम, “ज़ांऊं तम्हां का लेबी प्रोहतो दल परमेशर बिधाते करारे मणशू च़की हांढदअ शुझिए, आपणैं खिम्भ झाल़ी लागै पिछ़ू हांढदै। तम्हां का निं बातो थोघ आथी, तिन्नां भाल़ी लागणअ तम्हां का थोघ कि कैहा बाता डेऊणअ। पर तिन्नां का रहै कोई दूई हज़ार हाथ1 पिछ़ू-पिछ़ू हांढदै लागी, करारे मणशू नेल़ निं डेऊई आथी।”2
तेखअ बोलअ ज़ैहसू सारी परज़ा लै, “तम्हैं करा आपणीं शुधी किल्हैकि काल्ला करनअ बिधाता तम्हां जैंदरी महान च़मत्कार।” तेखअ किअ दुजै धैल़ै दोत्ती ज़ैहसू प्रोहते दला लै हुकम, “करारे मणशू च़की हांढा सारी इज़राईली परज़ा का आजू-आजू।” ज़िहअ ज़ैहसू बोलअ, तिन्नैं किअ तिहअ ई।
बिधाता बोलअ ज़ैहसू लै इहअ, “आझ़ करनअ मुंह इहअ कि आझ़ा बाद करनअ सोभी इज़राईली तेरअ महान मणछे रुपै अदर, ताकि तिन्नां का थोघ लागे कि ज़िहअ हुंह मोसा संघै थिअ, तिहअ आसा हुंह ताह संघै बी। करारे मणशू च़कणै आल़ै प्रोहता का डाह इहअ खोज़ी, ‘ज़ेभै तम्हैं जरदण नदी सेटा पुजे, तेभै रहै बाढै पाणीं दी होथी खल़्हुई।’”
ज़ैहसू बोलअ इज़राईली लै इहअ, “मुंह नेल़ एछा, संघा शूणां कि थारअ परमेशर बिधाता तम्हां लै किज़ै बोला। एथ निं बैहम डाही ई कि बिधाता काढणैं कनानी, हित्ती, हिब्बी, परिजी, गिर्गाशी, अमोरी अर जबेशी देशे तम्हां नदरी तिन्नें देशा का बागै, ताकि तम्हां का थोघ लागे कि तम्हां संघै आसा ज़िऊंदअ परमेशर।3 भाल़ा! पृथूईए मालको करारो मणशू आसा जरदण नदी दी तम्हां आजू डेऊणैं आल़अ, तम्हैं करा इहअ, आप्पू मांझ़ै छ़ांटा इज़राईले बारा मर्ध हर गोत्रा का एक-एक। ज़ांऊं पृथूईए मालक बिधाते करारे मणशू च़कणै आल़ै प्रोहते च़रण जरदण नदी दी छ़ुंए, तेभी हणीं जरदण नदी बगणीं बंद। उपरा बाखा उंधै बाखा लै बगणैं आल़अ पाणीं थम्हणअ तिधी।”
सह थिई लऊंणींए रीत, अर भराल़ै ती जरदण नदी खास्सी भर्हुई दी। ज़ांऊं इज़राईली जरदण नदी पार टपणा लै आपणैं खिम्भ झाल़ै, प्रोहत डेऊऐ करारे मणशू च़की तिन्नां सोभी का आजू। ज़ेही ई तिन्नैं जरदण नदीए पाणीं दी गंईं डाही,4 जरदण नदीओ पाणीं खल़्हुअ तिधी तेथ बाझ़अ सारतान नाओंए ज़ैगा नेल़ आदम नगरी उंधै सारै पाणीं दी शाफल़। तिधा उंधै अराबा समुंदर ज़ेता लै खार समुंदर बी बोला, सह पाणीं शुक्कअ पठी अर सारी इज़राईली परज़ा टपी जरदण नदी पार जेरिहो नगरी नेल़ रेगीस्तानै। बिधाते प्रोहत रहै करारे मणशू च़की जरदण नदी मांझ़ा-मांझ़ी शुक्की ज़ैगा तेभै तैणीं खल़्हुई ज़ेभै तैणीं सोभै इज़राईली मणछ जरदण नदी पार टपी निं मुक्कै।5
Source notes (5)
- Footnote दूई हज़ार हाथ कोई एक किलूमीटर
- Cross-reference लुआ. 19:12
- Cross-reference लुआ. 34:9-10
- Cross-reference लुआ. 14:21
- Cross-reference लुआ. 14:22; 2 राज़. 2:8
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.