Kulvi Outer Seraji Bible
ज़ैहसू 24
शकेम सोभी इज़राईलीओ झाल़अ
ज़ैहसू किअ शकेम सोभी इज़राईलीए गोत्रो झाल़अ। तेऊ शादै इज़राईले सोभै सैणैं, प्रोढै, पांच़ अर कार-करिंदै। तिंयां सोभ हुऐ तिधी परमेशरे खिम्भा सेटा हाज़र। ज़ैहसू बोलअ सोभी लोगा लै इहअ, “इज़राईलो परमेशर बिधाता बोला तम्हां लै इहअ, ‘खास्सी साला पैहलै तै एकी ज़मानैं थारै दादै-बाबै फरात दरैऊआ पार पुर्बा बाखा बस्सै दै अर तिंयां करा तै होरी देअआ-देबीए पूज़ा। तिन्नां मांझ़ै त एकी नाअं तेराह ज़ुंण आबराम अर नाहोरो बाब थिअ।1 तेखअ आणअ त मंऐं थारै दादा-बाबा मांझ़ै फरात दरैऊआ पारा का आबराम एऊ कनान देशा लै अर तेऊ आसा एऊ सारै देशै फेरी दैनी दी। मंऐं दैनी तेऊ लै खास्सी आद-लुआद। मंऐं दैनअ तेऊ लै शोहरू ज़हा नाअं इसहाक आसा। इसहाका लै दैनै मंऐं याकब अर एसाब दूई शोहरू। एसाबा लै दैनअ मंऐं धारा बाखो मुल्ख एदोम कि सह तेतो मालक होए, पर थारअ पल़दादू याकब डेऊअ आपणैं शोहरू-माठै संघी मिसर देशा लै।2 बादा का छ़ाडै मंऐं मोसा अर हारण संघा पाई मिसर देशा लै घोर आफ़त अर खिरी आणै तम्हैं तिधा का काढी।
“‘मंऐं आणै थारै दाद-बाब मिसर देशा का काढी पर मिसर देशे सैना किअ रथा घोल़े शुंआरी करै थारअ लाल समुंदरा तैणीं पिछ़अ। ज़ांऊं थारै दाद-बाब लाल समुंदरे बाढै शाचै, तिन्नें मांगी मुंह बिधाता सेटा लेर-पकार पाई मुखा मज़त अर मंऐं डाहअ थारै तिन्नां दादा-बाबा अर मिसरी मांझ़ै न्हैरअ करी। खिरी बहाऊअ मंऐं समुंदर मिसरी लोगा प्रैंदै, संघा किऐ तेथ डबेऊई खतम। तम्हैं आसा आपणीं आछी भाल़अ द कि मंऐं मिसर देशा संघै किज़ै किअ।
“‘तेखअ रहै तम्हैं खास्सी साला तैणीं रेगीस्तानै। तेखअ पजैल़ै मंऐं तम्हैं अमोरी लोगे देशै ज़ुंण जरदण नदी पुर्बा बाखा थिऐ बस्सै दै। तिन्नैं किअ तम्हां संघै जुधा लै मकाबलअ, पर मंऐं दैनी तम्हां लै तिन्नां प्रैंदै ज़ीत संघा हुऐ तिन्नें तेऊ देशे मालक तम्हैं। तिंयां किऐ मंऐं तम्हां नदरी खतम।3 तेखअ आअ मोआब देशो राज़अ सोपोरो शोहरू बलाक इज़राईला संघै जुधा लै। तेऊ दैनअ बोरे शोहरू बलाम गूरा लै समाद कि तम्हां लै किहअ करै फिटक लाए।4 पर मंऐं किधी लाई ती बलाम गूरे शूणीं। सह रहअ तम्हां लै बर्गत ई बर्गत दैंदअ लागी। इहअ करै बच़ाऊऐ मंऐं तम्हैं बलाम गूरा का। तेखअ आऐ तम्हैं जरदण नदी पछ़मा बाखा पार टपी जेरिहो नगरी नेल़। जेरिहो नगरीए लोगै किअ तम्हां संघै जुध। अमोरी, परिजी, कनानी हित्ती, गिर्गाशी, हिब्बी अर जबेशी लोगा संघै बी हुअ थारअ जुध, पर मंऐं ज़ताऊऐ तम्हैं तिन्नां सोभी का। थारै दुशमण ठुर्है तम्हां का दूर पर अह इहअ निं थारै कतीर अर तलबारे डरै हुअ। सह थिअ हुंह आप्पै ज़ुंणी तिन्नां लै आफ़त पाई अर तिंयां दरल़ाऊऐ। तिन्नां लै किअ मंऐं तिहअ ई ज़िहअ मंऐं जरदण पुर्बा बाखा अमोरी लोगे दूई राज़ै संघै किअ।5 मंऐं दैनअ तम्हां लै इहअ देश ज़ेता लै तम्हैं किछ़ै मैन्थ निं किई, बस्सणा लै दैनी एही नगरी ज़ुंण तम्हैं बणाईं ई दी निं आथी। ऐबै आसा तम्हैं तेथ बस्सै दै अर तिन्नां बेला का दाखा खांदै ज़ुंण तम्हैं लाई दी निं आथी अर तिन्नां जैतूने बूटा का आसा तम्हैं तेला काढदै ज़ुंण तम्हैं रोप्पै निं आथी।’6
“तैही रहै ऐबै बिधाते डरा हेठै अर तेऊए च़ाकरी करै मानदारी अर शुचै-पाक्कै रही करै। तिन्नां देअआ डाहै आप्पू का दूर ज़ेते पूज़ा थारै दाद-बाब फरात दरैऊआ पार पुर्बा अर मिसर देशै करा तै।7 ज़ै तम्हैं बिधाते च़ाकरी नांईं करनी च़ाहंदै, तैहा गल्ला लआ आझ़ ई सोठी कि तम्हां कसरी च़ाकरी करनी? तै तम्हां फरात दरैऊआ पार तिन्नां देबते च़ाकरी करनी ज़सरी च़ाकरी थारै दाद-बाब करा तै? कि इधी तिन्नां अमोरीए देअआ-देबीए च़ाकरी करनी ज़सरी ज़ैगा तम्हैं एभै आसा बस्सै दै? रही मेरी गल्ल, मुंह ता करनी आपणैं टबरा संघी सदा बिधाते च़ाकरी।”
तेखअ दैनअ सारी परज़ा ज़बाब, “बिधाता छ़ाडी होरी देअआ-देबीए पूज़ा निं हाम्हैं कधि लोल़ी किई! अह परमेशर आसा म्हारअ सह ई बिधाता ज़ुंणी म्हारै दाद-बाब मिसर देशे गलामी का आणै काढी, हाम्हैं आसा तेऊए बडै-बडै नुआहरै च़मत्कार आपणीं आछी भाल़ै दै। ज़हा-ज़हा देशा जैंदरा बाती हाम्हैं आऐ: तेऊ किई तेथ हर ज़ैगा म्हारी फाज़त। तेऊ काढै हाम्हां पुजणैं का आजी एऊ देशे बस्सै दै सोभ अमोरी अर होर लोग दूर ज़ुंण ऐहा ज़ैगा तै बस्सै दै। हाम्हां बी करनी बिधाते ई च़ाकरी किल्हैकि सह ई आसा म्हारअ परमेशर।”
ज़ैहसू बोलअ सोभी लोगा लै इहअ, “बिधाता ई आसा एक्कै असली पबित्र परमेशर ज़ुंण ज़ल़ण करा। मुंह निं लागा इहअ कि तम्हैं तेऊए च़ाकरी करी बोले। तेता लै लागणअ तम्हां पठी शुचै हणअ, पर ज़ै तम्हैं पाप या धोखअ करे, सह निं तेखअ तम्हां छ़ाडी गअ।8 ज़ै तम्हैं बिधाता छ़ाडी पराऐ देअआ-देबीए च़ाकरी करे, तेऊ फिरनअ तम्हां का पिछ़ू संघा लागणीं तम्हां सज़ा भुगतणी। तेऊ करनै तम्हैं खतम, च़ाऐ तेता का आजी सह तम्हां लै किहअ बी भलअ किल्है निं थिअ होए।”
लोगै बोलअ ज़ैहसू लै इहअ, “नांईं ओ हेरे! हाम्हां निं बिधाता छ़ाडी होरी देअआ-देबीए च़ाकरी करदै!”
ज़ैहसू बोलअ तिन्नां लै इहअ, “तम्हैं आसा आपणैं शाजत आप्पी कि आझ़ छ़ांटी तम्हैं बिधाते च़ाकरी करनी।”
तिन्नैं दैनअ ज़बाब, “हाँ, हाम्हैं आसा ऐहा गल्ले शाजत।”
ज़ैहसू बोलअ इहअ, “तै काढा सोभ तिन्नां पराऐ देअआ-देबीए मैहरै मुहुर्ती दूर! संघा खाआ सोह कि तम्हैं रहणैं इज़राईले परमेशर बिधाता लै शुचै-पाक्कै।”
लोगै बोलअ ज़ैहसू लै, “हाम्हां करनी परमेशर आपणैं बिधाते च़ाकरी अर हाम्हां मनणअ ज़िहअ सह बोला तिहअ हुकम।”
तेखअ किई ज़ैहसू तैहा ई धैल़ी तिन्नां मणछा संघै करार संघा दैनै तिन्नां लै तिधी शकेम नाओंए ज़ैगा बिधी-बधान कि तिंयां तिहअ करे। 9 ईंयां सारी गल्ला डाही ज़ैहसू परमेशरे बधाने कताबा दी लिखी। तेखअ डाहअ तिधी तेऊ बडै महरूए बूटा हेठै एक लाम्मअ पात्थर घैऊई ज़ुंण बिधाते पबित्र ज़ैगा नेल़ थिअ।10 तेखअ बोलअ ज़ैहसू सोभी लोगा लै, “अह पात्थर हणअ म्हारअ शाजत, ज़िहअ कि एऊ पात्थरै हेरी तिंयां सोभै गल्ला शूणीं ज़ुंण बिधाता हाम्हां लै बोली। तैही हणअ अह थारअ शाजत, इहअ निं हआ कि तम्हैं आपणैं परमेशरा लै खिरी हुधिए!” तेखअ दैनी ज़ैहसू सोभी लोगा लै डेऊणे ज़ाज़त अर सोभ पुजै आपणीं-आपणीं तिन्नां ज़ैगा ज़ुंण तिन्नें बांडै ती आई दी।
ज़ैहसू अर एलीआजर प्रोहते मौत
बादा का गअ खिरी बिधातो दास नूनो शोहरू ज़ैहसू एकी शौआ दसा साले अमरा ज़ांऐं। तेऊए ल्हास डाही तिन्नें एप्रैम गोत्रे धारा बाखे मुल्खै गाश नाओंए धारे उतरा बाखा तिम्ना-सेरी नाओंए नगरी तेऊए आपणीं ज़ैगा घोरी दाबी।11
ज़ैहसूए पोस्तीए सैणैं मणछ ज़ुंण ज़ैहसू बाद ज़िऊंदै रहै, तिन्नैं त आपणीं आछी भाल़अ द कि बिधाता इज़राईला लै किहै-किहै महान काम किऐ तै, तिंयां बी रहै आपणीं ज़िऊंदी ज़िता इज़राईले परमेशर बिधाते च़ाकरी करदै लागी।
इज़राईली ज़ुंण युसुफे हस्तू मिसर देशा का आप्पू संघा आणै तै, तिंयां डाहै तिन्नैं शकेम तैहा ज़ैगा दाबी, ज़ुंण याकबै शकेमे बाब हमोरे12 आद-लुआदा का एकी शौआ च़ंदीए सिक्कै मोल दैई लई ती। तैही हुऐ आजू युसुफे आद-लुआद तैहा ज़ैगे मालक।13
हारण प्रोहतो शोहरू एलीआजर प्रोहत बी गअ खिरी ज़ांऐं। सह डाहअ तिन्नें गबेह नाओंए नगरी दाबी, ज़ुंण नगरी एप्रैम गोत्रे हेस्सै आऐ दै धारा बाखे मुल्खै थिई। सह नगरी ती एलीआजर प्रोहते शोहरू पिनहासे बांडै दैनी दी।
Source notes (13)
- Cross-reference मूल. 11:26; 12:1
- Cross-reference मूल. 36:8; बधा. 2:5; 34:5; लुआ. 3:10
- Cross-reference गण. 21:21,33
- Cross-reference गण. 22:5
- Cross-reference लुआ. 23:28; बधा. 7:20
- Cross-reference बधा. 6:10
- Cross-reference मूल. 35:2; एज. 20:7
- Cross-reference लेब. 19:2
- Cross-reference लुआ. 15:25
- Cross-reference मूल. 12:6
- Cross-reference ज़ैह. 19:50
- Cross-reference शकेमे बाब हमोरे मूल. 33:19
- Cross-reference मूल. 50:25; लुआ. 13:19; शधा. 7:16; मूल. 33:19
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.