Kulvi Outer Seraji Bible
ज़ैहसू 21
लेबी गोत्रा लै नगरी
इज़राईली तै कनान देशै शिलोह नाओंए ज़ैगा डेरै पाऐ दै। खिरी डेऊऐ लेबी गोत्रे टोलीए सैणैं एलीआजर माहा प्रोहत अर नूने शोहरू ज़ैहसू अर इज़राईली सैणैं सेटा लै। तिंयां लागै तिधी तिन्नां लै इहअ बोल्दै, “बिधाता आसा म्हारै बारै आपणैं दास मोसा का इहअ हुकम किअ द कि म्हारै हेस्सै बी एछणी रहणा लै नगरी अर तेता फेर डागै च़राऊंणा लै घैहणीं।” तेखअ ज़िहअ बिधाता हुकम त किअ द, तेते साबै दैनी सोभी इज़राईली सैणैं आपणैं-आपणैं हेस्सै मांझ़ै लेबी गोत्रा लै नगरी अर तेता फेर घैहणीं।
तिन्नां नगरी बांडणां लै ज़ांऊं परच़ी पाई, सोभी का आजी निखल़ी लेबी गोत्रा मांझ़ै कहाती टोलीए नाओंऐं परच़ी। ज़ुंण कहाती हारणे प्रोहते खिंबा का आजू आद-लुआद थिऐ, तिन्नां कहाती लै दैनी यहूदा, शमौन अर बिन्यामीन गोत्रे हेस्सै मांझ़ा का पठी तेर्हा नगरी। तिन्नां का लाऊआ ज़ुंण होर कहाती टोलीए थिऐ, तिन्नां लै दैनी एप्रैम, दान, अर मनिश्शे आधै गोत्रे हेस्सै मांझ़ा का परच़ी पाई दस नगरी बांडी।
गर्शोनी टोली आल़ै लै दैनी बाशान मुल्खै इस्साकार, आशेर, नप्ताली अर जरदण पुर्बा बाखा बस्सै दै मनिश्शे गोत्रे हेस्सै मांझ़ा का परच़ी पाई तेर्हा नगरी बांडी।
मरारी टोली आल़ै लै दैनी तिन्नें खिंबे साबै रूबेन, गाद अर ज़बलून गोत्रे हेस्सै का बारा नगरी परच़ी पाई बांडी।
ज़िहअ बिधाता आपणैं गूर मोसा का हुकम त किअ द, तेही ई दैनी इज़राईली ईंयां एतरी नगरी परच़ी पाई बिधाता का पुछ़ी करै लेबी गोत्रे सोभी टोली लै बांडी।
यहूदा, शमौन अर बिन्यामीन गोत्र बांडै का लेबीए बांडै नगरी
सोभी का आजी निखल़ी लेबी गोत्रे कहाती टोलीए नाओंऐं परच़ी ज़ुंण हारणे खिंबा का थिऐ। तिन्नां लै दैनी यहूदा, शमौन अर बिन्यामीन गोत्रे हेस्सै मांझ़ा का ईंयां नगरी:
धारा बाखे मुल्खै यहूदा गोत्रे बांडै आई दी किर्यात-अराबा नगरी अर तेता फेर-फिरदी घैहणीं संघी दैनी तिन्नां लै। ऐहा नगरी नाअं त अनाके बाब अराबे नाओंऐं पल़अ द, ज़ेता लै हेब्रोन नगरी बी बोला। पर तैहा नगरीए खेच अर गराअं तै पैहलै ई यपुन्नें शोहरू कालेबे हेस्सै दैई हेरै दै अर तिंयां रहै तेऊए ई।
हेब्रोन नगरी थिई शरण नगरी मांझ़ै एक। अह नगरी दैनी हारणे प्रोहते खिंबा लै तेते फेर घैहणीं संघी। एता का लाऊआ दैनी लिब्ना, जतीर, एश्तमो, होलोन, दबीर, ऐन, युता अर बेथ-शमेश नगरी तेता फेर फिरदी घैहणीं संघी। इहअ करै दैनी यहूदा अर शमौन गोत्रे हेस्सै का लेबी गोत्रा पठी नौ नगरी। बिन्यामीन गोत्रे हेस्सै का दैनी लेबी गोत्रा लै च़ार नगरी: गबोन, गिबा, अनातोत अर अलमोन नगरी। इहअ करै दैनी लेबी गोत्रा लै तेर्हा नगरी अर तेता फेर घैहणीं, ज़िधी तिंयां प्रोहत बस्से ज़ुंण हारणे खिंबा का थिऐ।
एप्रैम, दान अर पछ़मा बाखा मनिश्शे गोत्रे हेस्सै का लेबीए बांडै नगरी
लेबी गोत्रे कहाती टोलीए होरी खिंबे बांडै दैनी एप्रैम गोत्रे हेस्सै का नगरी अर घैहणीं। तेता लै पाई तिन्नैं परच़ी। एप्रैम गोत्रे हेस्सै आऐ दै धारा बाखे मुल्खै दैनी तिन्नां लै शरण नगरी शकेम तेता फेर घैहणीं। एता का लाऊआ दैनी तिन्नां लै, गज़ेर नगरी, किबसैम, अर बेथ-हारोन नगरी तेता फेर घैहणीं संघी। दान गोत्रे हेस्सै का दैनी एलतके, गिबतोन, अजालोन, गात-रमोन ईंयां च़ार नगरी इना फेर घैहणीं संघी। जरदण पछ़मा बाखा बस्सै दै मनिश्शे आधै गोत्रे हेस्सै का दैनी तनाक अर गात-रमोन ईंयां दूई नगरी तेता फेर घैहणीं संघी। कहाती टोलीए इना खिंबा लै दैनी पठी ईंयां दस नगरी तेता फेर घैहणीं संघी।
पुर्ब मनिश्शे, इस्साकार आशेर, नप्ताली गोत्रे हेस्सै का लेबीए बांडै नगरी
लेबी गोत्रे गर्शोनी टोली भेटी जरदण नदी पुर्बा बाखा बस्सै दै मनिश्शे आधै गोत्रे हेस्सै मांझ़ै बाशान मुल्खे दूई नगरी। तिंयां ती शरण नगरी गोलान अर बशतरा नगरी तेता फेर घैहणीं संघी। इस्साकार गोत्रे हेस्सै मांझ़ै दैनी तिन्नां लै किश्योन, दाबरत, अर्मूत अर एनगनीम ईंयां च़ार नगरी तेता फेर घैहणीं संघी। आशेर गोत्रे हेस्सै का दैनी गर्शोनी टोली लै मिशाल, अबदोन, हेल्कात अर रहोब नगरी तेता फेर घैहणीं संघी। नप्ताली गोत्रे हेस्सै मांझ़ै दैनी तिन्नां लै गलील मुल्खे शरण नगरी कादेश, हमात-दोर अर कर्तान ईंयां चअन नगरी तेता फेर घैहणीं संघी। इहअ करै हुई ईंयां पठी तेर्हा नगरी ज़ुंण गर्शोनी टोलीए हेस्सै तिन्नें खिंबे साबै तिन्नें बांडै आई।
लेबी मांझ़ै होर ज़ुंण मरारी टोली बच़ी तिन्नें खिंबे साबै दैनी तिन्नां लै ज़बलून गोत्रे हेस्सै का जोकनीम, कारता दिम्ना अर नहलोल ईंयां च़ार नगरी तेता फेर घैहणीं संघी। एता ला लाऊआ दैनी रूबेन गोत्रे हेस्सै का बेसेर, जहास, कदमोत अर मेपात ईंयां च़ार नगरी फेर घैहणीं संघी। गाद गोत्रे हेस्सै का दैनी गलाद मुल्खै शरण नगरी रामोत, होर दैनी माहानीम, हेशबोन अर ज़जार ईंयां च़ार नगरी तेता फेर घैहणीं संघी। इहअ करै दैनी लेबी खिंबे मरारी टोली लै पठी बारा नगरी परच़ी पाई बांडी।
बाकी इज़राईली जैंदरी दैनी लेबी गोत्रा लै ईंयां अड़ताल़ी नगरी तेता फेर घैहणीं संघी।
इज़राईली हुऐ सारै कनान देशे मालक
इहअ करै दैनी बिधाता इज़राईली लै सह सारै देशे ज़ैगा, ज़ेही तेऊ तिन्नें दादा-बाबा संघै करार ती किई दी। ज़ांऊं तिन्नैं सह सारअ देश गिम्मी हेरअ, तेखअ बस्सै तिंयां तिधी। बिधाता दैनी तिन्नां च़ऊ बाखा सुख शांती ज़ेही बिधाता तिन्नें दादा-बाबा का ज़बान दैनी ती। इहअ निं तिन्नों कुंण दुशमण ई रहअ ज़ुंण तिन्नां संघै जुध करने बारै सोठी सके किल्हैकि बिधाता किअ इज़राईली लै इहअ कि तिंयां ज़ितै आपणैं सोभी दुशमणा का। इज़राईली लै ज़िहअ-ज़िहअ दैणें करार बिधाता तिन्नां संघै किई ती, तिंयां गल्ला किई बिधाता सोभै पूरी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.