Kulvi Outer Seraji Bible
ज़ैहसू 19
शमौन गोत्रे हेस्सै ज़ैगा
दुजी परच़ी निखल़ी शमौन गोत्रे नाओंऐं। तिन्नें टोली भेटी यहूदा गोत्रे सिऊंआं भितरी बांड। तिन्नें हेस्सै ज़ुंण नगरी आई तिंयां ती बेर्शेबा ज़हा लै शेबा बी बोला मोलदा,1 हसर्शूआल़, बाला, एसेम, एलतोलद, बतूल, होर्मा, सकाल़ग, बेथ-मकारबोत, हसर्शूसा, बेथ-लबाऊत, अर शरूहण, ईंयां ती तेर्हा नगरी तेता ओरी-पोरी गराऊंआं संघी।
इना संघै ती होर नगरी ऐन, रिमोन, एतेर अर आशान। ईंयां ती च़ार नगरी तेते ओरी-पोरी गराऊंआं संघी। तेखअ होर दखण रेगीस्तान बालात-बेर नगरी ज़ेता लै रामाह बी बोला, तिधी तैणीं आऐ इना नगरी फेर-फिरदै गराअं शमौन गोत्रे हेस्सै। शमौन गोत्रो हेस्सअ बणअ तिन्नें टोलीए साबै एतरअ ई। शमौन गोत्रा आल़ै लै दैनअ यहूदा गोत्रे हेस्सै आई दी ज़ैगा मांझ़ै किल्हैकि तिन्नें बांडै त खास्सअ डेऊअ द तैही डाहै शमौन गोत्रा आल़ै तिन्नां जैंदरी।
ज़बलून गोत्रा लै बांड
चिऊथी परच़ी निखल़ी ज़बलून गोत्रे नाओंऐं। ज़ुंण ज़ैगा तिन्नें हेस्सै आई तेते सिअं ती सरीद नगरी तैणीं। पछ़मा बाखा डेऊई तिन्नें सिअं मरला नगरी बाती उझै दबशेत छुंहंदी जोकनीम नगरी पार बाखा गाडा तैणीं। सरीदा का दुजी बाखा डेऊई तिन्नें सिअं पुर्बा बाखा किसलोताबर नगरीए सिऊंआं तैणीं आजू-आजू दाबरत नगरी तैणीं अर तिधा आजू ज़ाफी नगरी तैणीं। तिधा का डेऊई तिन्नें सिअं पुर्बा बाखा आजू गात-हेपेर नगरी अर इथकासीन नगरी तैणीं अर तिधा का फिरी नोहा नगरी बाखा रमोन नगरी तैणीं। तिधा का फिरी सह सिअं हन्नातोन नगरी तैणीं अर आजू पुजी इप्तहेल खागा तैणीं। ज़बलून गोत्रे हेस्सै आई दी नगरी थिई कत्तात, नहलोल, शिम्रोन, इदला, बेतलेम नगरी। ईंयां ती बारा नगरी तेते ओरी-पोरी गराऊंआं संघी। ज़बलून गोत्रे हेस्सै आई ईंयां ई नगरी तेते ओरी-पोरी गराऊंआं संघी।
इस्साकार गोत्रा लै बांड
च़ौथी परच़ी निखल़ी इस्साकार गोत्रे नाओंऐं। तिन्नें सिअं पुजी जज्रेल, कसुलोत, शूनेम, हपारैम, शिओन, अनाहरत, रबीत, किश्योन, एबेस, रेमेत, एनगनीम, एनहदा अर बेथ-पसेस नगरी तैणीं। होर डेऊई तिन्नें सिअं ताबोर, शहसूमा अर बेथ-शमेश नगरी तैणीं अर जरदण नदी दी हुई खतम। इहअ करै आई तिन्नें हेस्सै सोल़ा नगरी तेता ओरी-पोरीए गराऊंआं संघी। ईंयां एतरी नगरी अर गराअं आऐ इस्साकार गोत्रे बांडै अर तिंयां बस्सै तेथ आपणीं-आपणीं टोलीए साबै।
आशेर गोत्रा लै बांड
पांज़ूई परच़ी निखल़ी आशेर गोत्रे नाओंऐं तिन्नें खिंब अर टोलीए साबै। तिन्नें बांडै आई दी ज़ैगे सिअं ती हेल्कात, हली, बेतेन, अक्षाप, अलामेलेक, अमाद अर मिशाल नगरी अर पछ़मा बाखा डेऊई तिन्नें अह सिअं कर्मेल धारा बाती अर शिहोर्लिब्रात गाडा तैणीं। तेखअ फिरी सह सिअं पुर्बा बाखा बेथ-दगोन बाखा अर ज़बलून गोत्रे सिऊंआं छुंहंदी डेऊई तिन्नें सिअं इप्तहेल खागा बाखा अर उतरा बाखा पुजी बेथ-एमेक नगरी अर नीएल नगरी तैणीं। तिधा का डेऊई उतरा बाखा आजू काबूल, अब्रोन, रहोब, हम्मोन अर काना नगरी बाती आजू बडी नगरी सदोन तैणीं। तिधा का फिरी तिन्नें सिअं रामाह बाखा संघा पुजी सोर नाओंए फेर फिरदी उछ़टै गहल़ा आल़ी नगरी तैणीं। तिधा का फिरी तिन्नें सिअं होसाह बाखा लै अर अकज़ीब नेल़ देशा बाती हुई सह मांझ़ समुंदरै पुजी खतम। उम्मा, अपेक अर रहोब नगरी बी आई तिन्नें हेस्सै अर इहअ करै आई तिन्नें हेस्सै पठी बाई नगरी तेते ओरी-पोरी गराऊंआं संघी। अह एतरी ज़ैगा आई तेते नगरी अर गराऊंआं संघी आशेर गोत्रे हेस्सै तिन्नें खिंब अर टोलीए साबै तिन्नां लै ज़ैदात।
नप्ताली गोत्रा लै बांड
छ़हुई परच़ी निखल़ी नप्ताली गोत्रे नाओंऐं तिन्नें खिंब अर टोलीए साबै। तिन्नें सिअं डेऊई हेलेप पोर्ही ज़ान्नींम नाओंए ज़ैगा बडै महरूए बूटा पोर्ही अदामीनेकेब, जबनेल बाती पुजी लक्कूम अर जरदण नदी तैणीं। तिधा का फिरी तिन्नें सिअं पछ़मा बाखा अजनोताबोर अर तिधा का पुजी हुकोक, दखणा बाखा मिली ज़बलून गोत्रे सिऊंआं संघा अर पछ़मा बाखा आशेर गोत्रा संघै अर पुर्बा पुजी तिन्नें सिअं बाखा यहूदा गोत्रे सिऊंआं बाखा जरदण नदी तैणीं। तिन्नां लै ज़ुंण गहल़ा आल़ी नगरी आई तिंयां ती सिदीम, सेर, हमात, रकात, किनेरेत, अदामा, रामाह, हसोर, कादेश, अद्रोई, एन्हासोर, ईरोन, मिगदलेल, होरेम, बेथ-नाथ अर बेथ-शमेश। ईंयां ती उन्नीं नगरी अर इना नगरी ओरी-पोरीए गराअं तै लाऊआ। नप्ताली गोत्रे हेस्सै आई तिन्नें खिंब अर टोलीए साबै अह एतरी ज़ैगा तेते नगरी अर गराऊंआं संघी।
दान गोत्रा लै बांड
सातुई परच़ी निखल़ी तिन्नें खिंब अर टोलीए साबै दान गोत्रे नाओंऐं। ज़ुंण ज़ैगा दान गोत्रे बांडै आई, तेते सिऊंआं भितरी आई सोरा नगरी, अशतोल, ईरशेमेश, शालबीम, अजालोन, ईतला, एलोन, तिम्ना, अक्रोन, एलतके, गिबतोन, बालात, जेहूद, बेने-बराक, गात-रमोन, मेयर्कोन अर रक्कोन नगरी। जोपा नगरी सम्हने सिअं बी थिई तिन्नें। ज़ांऊं दान गोत्रा आल़ै आपणैं हेस्से ज़ैगा भेटी गई, तेता बाद छ़ेल़अ तिन्नैं लेशेम नगरी आल़ै संघै जुध। तिन्नैं पाऐ तिधे लोग मारी अर तैहा सारी ज़ैगा गिम्मी बस्सै तिंयां तिधी बी। तिन्नैं डाहअ लेशेम नगरी नाअं बी आपणैं मूल़ दादा-बाबे नाओंऐं दान। इहअ करै हुई एतरी ज़ैगा तेते नगरी अर गराऊंआं संघी तिन्नें खिंब अर टोलीए साबै दान गोत्रे।
खिरी दैनी ज़ैहसू लै बी ज़ैगा
ज़ांऊं सारै देशे बांड हई मुक्की, तेखअ दैनी इज़राईली नूने शोहरू ज़ैहसूए हेस्सै बी ज़ुदी ज़ेही ज़ैगा। ज़िहअ बिधाता हुकम त किअ द, तिन्नैं दैनी ज़ैहसू लै सह नगरी ज़ुंण तेऊ आप्पै मांगी ती। सह नगरी थिई एप्रैमे धारा बाखलै देशे नगरी तिम्ना-सेरी अर ज़ैहसू बस्सअ आपणीं टोली संघी तिधी।
एलीआजर प्रोहत, नूने शोहरू ज़ैहसू अर इज़राईली सैणैं ज़ुंण-ज़ुंण ज़ैगा बिधाते मेल़-ज़ोल़े खिम्भे प्रऊल़ी आजू शिलोह नाओंए ज़ैगा परच़ी पाई बांडी, तिंयां ती ईंयां ई। इहअ करै किअ तिन्नैं कनान देशो इज़राईली मांझ़ै बांडणैंओ काम पूरअ।
Source notes (1)
- Cross-reference 1 इति. 4:28
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.