Kulvi Outer Seraji Bible
आयूब 5
हाक्का लाई मांग मज़त
“आयूब, ज़ोरै-ज़ोरै ला हाक्का हैनूं तेरी मज़त करदअ कुंण एछा कि नांईं?
झ़ाणीं कुंण स्वर्ग दूत ताह सेटा एछी जाए!
ज़ीद-मिश करा ऐडै अर
कबुधी मणछा मारी खतम।
मंऐं आसा भाल़ै दै ऐडै मणछ सफल हंदै,
पर तिन्नां लागा हेरा-हेरी फिटक
संघा हआ तिंयां पठी बरैबाद।
तिन्नें लुआद छ़ुटा बाझ़ी आसरै अर
तिन्नें मज़त करदअ निं दालता दी कोहै निखल़दअ।
मांणक्करै अर भुखै मणछ गिम्मा तिन्नें
बाल़-शोहल़ लाऐ दै खेचा का साल-फसल बी
अर तिन्नें ज़ैदात पाआ पठी लुटी।
आफ़त निं धूल़ै जैंदरा का एछदी अर
नां खेचा का दुख पज़दअ।
ज़िहै आगीए कूंडा का उझै लुपल़ै निखल़ा,
तिहअ ई आसा मणछ दुख भोगणा लै बणअ द।
आयूब, ज़ै तेरी ज़ैगा हुंह हंदअ,
मुंह करनी ती परमेशरा का अरज़ कि सह मेरी मज़त करे।
ज़ुंण महान काम सह करा, तेते थह निं हाम्हैं लोल़ी सकदै,
ज़ेतरै सह च़मत्कार करा, तेता निं हाम्हैं गणी सकदै।
सह दैआ पृथूई लै हिंऊंद-भराल़ अर
खेचा लै सरग हणैं।
सह आसा परमेशर ई ज़ुंण भोल़ै मणछा उछ़टै दी बशैल़ा,
ज़हा शोग हुअ पल़अ द, तेऊ लै आणा सह खुशी।
च़लाक मणछे करा सह सारी बिक्री बृथा,
ज़ुंण कदुष्ट आप्पू छ़ल़ैघ समझ़ा तिन्नां चैल़ा सह तिन्नें ई
बूरी बिक्रीए ज़ज़ाल़ा दी अर तिंयां निं किछ़ू गल्ला दी सफल हंदै।
तिन्नां लै हआ धैल़ी दपहरै न्हैरअ अर
तेथ रहा तिंयां तोफदै लागी।
पर परमेशर बच़ाऊआ रैनै-गरीबा मरनै का,
कदुष्ट मणछा निं सह तिन्नां हंतणैं दैंदअ।
रैनै-गरीबा रहा आशा अर
कदुष्ट मणछे खाख डाहा परमेशर बुदरी।
तेऊ मणछा लै भाल़ केही खुशी हणीं
ज़हा परमेशर आप्पै नैरा!
ज़ेभै सह नैरे, तेता निं बृथा समझ़ी।
ज़ुंण ज़खम सह दैआ, तेतो करा सह लाज़ बी आप्पै,
ज़ुंण तेऊए हाथै रोग एछा,
तेता करा सह नरोगै बी आपणैं हाथै।
तेऊ डाहणअ तूह छ़हा आफ़ता का बच़ाऊई,
सात आफ़ता बी होए, तैबी निं तेरी किछ़ै हान्नी हणीं।
ज़ेभै नकाल़ पल़े, तेभै डाहणअ तेऊ तूह ज़िऊंदअ,
जुधा दी निं तेऊ तूह दुशमणे तलबारा करै मरनै दैणअ।
तेऊ डाहणअ तूह कोल़े मारा का बच़ाऊई,
ज़ै बनाश बी एछे तैबी बी निं ताह किछ़ै हैल़अ हणअ।
बनाश अर नकाल़े धैल़ै बी रहणअ तूह राज्ज़ी-खुशी,
नां ताह बणें ज़ीबे डअर-भगैर हणीं।
तेरै खेचै निं बाहंदी-बऊंदी बारी टूंक बी निखल़णअ,
नां बणें ज़ीब ताह खांदै बच़ोटदै एछणैं।
इहअ करै रहणअ तूह आपणैं डेरै दी राज्ज़ी-मौज़ी।
तेरै डागै चैणैं मांझ़ै बी निं किछ़ै हान्नी हणीं।
तेरी आद-लुआद बी हणीं आजू खास्सी,
तिंयां हणैं घैहणीं घाह ज़िहै खास्सै।
ज़िहअ लऊंणींए ऋता खहल़ै नाज़े काशीओ रूल़ लागा,
तेही हणीं तेरी खास्सी अमर अर तूह मरनअ ऐन प्रोढअ हई।
आयूब, हाम्हैं ज़ाणअ-भाल़अ आपणीं अमरा इहअ ई,
ईंयां गल्ला आसा शुची अर ईंयां गल्ला हुई ताह मनणी।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.