Kulvi Outer Seraji Bible
आयूब 37
“ढिशा भाल़ी लागा मेरअ दिल ज़ोरै-ज़ोरै धुक्क-धुक्क करदअ,
तम्हैं सोभै शूणां परमेशरो बोल,
ज़ुंण गुल़ूबिज़ल़ू ज़ेही छ़ेल़ छ़ाडा।
सह लाआ पृथूई प्रैंदै सारै सरगै,
एकी पुंझ़ा बिज़ल़ीए झ़प्प-तल़प्पी।
तेखअ शुण्हिंआं तेऊए बोला का निखल़ी दी ढिम्हां-गल़िम्हीं,
बिज़ल़ी डाहा कबल्ली झ़प्प-तल़प्पी लाई।
परमेशर दैआ नुआहरी गल्ला हणैंओ हुकम,
तेऊए इहै महान कामां निं हाम्हैं समझ़ी सकदै।
सह दैआ धरती दी हिंऊंआं पल़णैओ हुकम,
सरगा का दैआ पाणींए छ़ो-छ़ंध तरैल़ी।
सह लाआ मणछे कामां-काज़ा दी रोक,
ताकि हाम्हां सोभी का थोघ लागे कि सह किज़ै सका करी।
बणें ज़ीब बी लुक्का ढुंखरै, डुआरै अर
आपणीं-आपणीं जुहल़ी भितरी।
सह आणा दखण दिशा बाखा का ढिश-डुआल़अ
अर उतर दिशा बाखा हिंऊंद।
परमेशरे शाह करै लागा पाणीं दी शाण,
बडै-बडै सअरा प्रैंदै ज़म्मा तेते पाट।
बादल़ा लै झाल़ा सह खास्सअ भाफ,
संघा लागा तेता का बिज़ल़ी च़मकदी।
ज़ेही परमेशरे मरज़ी हआ, बादल़ सिक्का तिहै ई ओर्ही-पोर्ही,
तिंयां करा सारी पृथूई दी तिहअ ई,
ज़िहअ सह तिन्नां लै हुकम करा।
परमेशर बरशाऊआ धरती दी पाणीं,
कई बारी दैआ सह हाम्हां लै तेता करै सज़ा
अर कई बारी करा सह तेता करै हाम्हां लै झींण।
आयूब, थोल़ी घल़ी दै धैन भाल़ै, संघा शुण,
परमेशरे नुआहरै कामें बारै कर बच़ार।
ताखा आसा थोघ कि परमेशर ढिश-बागरी किहअ करै डाह आपणैं बशै
अर बादल़ा का बिज़ल़ीए झ़प्प-तल़प्पी किहअ करै लागा।
ताखा आसा थोघ कि सरगै बादल़ ओर्ही-पोर्ही किहअ करै ठुर्हा?
अह नोखअ काम आसा परमेशरे कारीगीरी
ज़ुंण सोभै गल्ला ज़ाणा।
गरमींए घमास्सा करै हआ तेरी घेरीए झिकल़ै प्रसिन्नै करै लुच़-लुच़ै
ज़ांऊं दखण दिशा बाखा तात्ती बागरी दहई प्लुशी शोटा।
सरगा छ़ैणां लै कै तूह परमेशरे मज़त करी सका
ज़ुंण तेऊ शिश्शै ज़िहअ च़मच़मांदअ आसा बणाअं द?
ऐबै दै तूह हाम्हां लै शिक्षा कि परमेशरा लै किज़ै बोल़णअ?
ऐबै निं म्हारै मन्नैं बोल़णा लै किछ़ै रहअ।
परमेशरा लै कै पैहलै फैल़अ लोल़ी दैनअ कि हुंह च़ाहा गल्ला करनअ?
कोहै मणछ निं आप्पू बरैबाद हणअ च़ाहंदअ।
एभै निं हाम्हैं सरगै च़मच़मांदै प्रैश्शै बाखा भाल़ी सकदै
किल्हैकि एते च़मक आसा भाल़णा लै बेघै खास्सी,
बागरी करा सरगा निम्बल़ै।
उतर दिशा बाखा एछा परमेशर च़मच़मांदै सुन्नैं ज़िहअ,
तेऊए च़मच़मांदै झ़ामणा भाल़ी फिरा हाम्हां सोभी दर्छ़णअ।
परमेशरो बल आसा खास्सअ महान अर हाम्हैं निं तेऊ नेल़ डेऊई सकदै,
पर तज़ी बी आसा सह भलअ अर धर्मीं, सह निं हाम्हां बरैबाद करदअ।
तैही करा लोग परमेशरो अदर,
सह निं तिन्नां बाखा धैन बी दैंदअ
ज़ुंण आप्पू लै अक्ली आल़ै हणैंओ दखाअ करा।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.