Kulvi Outer Seraji Bible
आयूब 35
एलीहू रहअ बोल्दअ लागी,
“आयूब, तेरअ इहअ बोल़णअ आसा गलत कि
तूह आसा परमेशरा संघै धर्मीं।
ज़ुंण तूह परमेशरा लै इहअ बोला, ‘मेरै पापा करै ताह किज़ै फरक पल़ा?
मेरै पाप नांईं करनै करै मुंह किज़ै फाईदअ भेटअ?’
एतो ज़बाब लाअ मंऐं ताल्है अर
तेरै साथी लै कठा दैई।
उझै दै सरगा बाखा लै भाल़णीं!
भाल़ बादल़ केतरै उछ़टै आसा!
ज़ै तूह पाप करे, तेता करै निं परमेशरा किछ़ै हान्नी हंदी।
ज़ै तूह भिई-भिई बी रहे पाप करदअ लागी,
तेता करै कै परमेशरा किज़ै फरक च़ाल्लअ पल़ी?
ज़ै तूह खास्सअ धर्मीं बी होए, तेता करै तंऐं परमेशरा लै किज़ै सान लाई?
परमेशर निं ताखा किछ़ै मांगदअ आथी।
तेरै पापा करै पल़ा मणछा फरक ज़ुंण ताह ई ज़िहै आसा
अर तेरै भलै करनै करै हआ तिन्नें मज़त।
ज़ै लोग ऐन छेऊऐ, तै पाआ तिंयां लैल़ा-पकारा,
तिंयां मांगा कहा इहै का मज़त ज़ुंण तिन्नां बच़ाऊई सके।
पर तज़ी बी निं तिंयां तेऊ परमेशरा लोल़दै आथी
ज़ुंणी तिंयां बणाऐं दै आसा अर
ज़ुंण तिन्नां लै आफ़तीए बगती बी खुशीए गिहा दैआ बोल़णैं।
तिंयां निं तेऊ परमेशरा बाखा फिरदै ज़ुंण तिन्नां लै अक्ल दैआ अर
च़ेल्लू-पखीरू अर पशू का खास्सी समझ़ दैआ।
तिंयां पाआ लेर-पकार पर परमेशर निं तिन्नां लै ज़बाब दैंदअ
किल्हैकि तिंयां आसा घमंडी अर कदुष्ट।
पर इहअ बोल़णअ बी आसा गलत कि परमेशर ज़हा का सारअ बल आसा, सह निं तिन्नें शुणदअ अर
परमेशर निं तिन्नां बाखा धैन ई दैंदअ।
आयूब, तूह बोला इहअ कि ताखा निं परमेशर शुझदअ ई आथी,
पर तेऊ हेरनअ तेरअ नसाफ करी
ज़ै तूह सबर डाही न्हैल़ी बोल़े।
तूह सोठा इहअ कि परमेशर निं सज़ा दैंदअ अर
सह निं पापा बाखा खास्सअ धैन दैंदअ।
तैही करा तूह एही नथोघी गल्ला,
ताखा निं आप्पू ई थोघ लागदअ कि तूह किज़ै बोला।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.