Kulvi Outer Seraji Bible
आयूब 2
आयूब हुअ रोगी
तेखअ हुऐ एकी धैल़ै भिई बिधाते स्वर्ग दूत बिधाता सेटा कठा, राख्स बी गअ तेतरी तिधी पुजी। बिधाता हेरअ तेऊ का पुछ़ी, “तूह केस्सी गअ एथ पुजी?”
राख्सै दैनअ बिधाता लै इहअ ज़बाब, “हुंह आअ सारी पृथूई हांढ-फेर दैई।”
बिधाता लागअ राख्सा का पुछ़दअ, “ताह मेरै दास आयूबा भाल़ी हुई बी ताह दसल्ली? मंऐं कै बोलअ त कि तेऊ सान शुचअ-पाक्कअ अर भलअ मणछ निं पृथूई दी कोहै आथी! सह करा मेरअ सोभी का खास्सअ अदर अर बूरअ करनअ निं तेऊ कधू सोठअ बी आथी। तंऐं बोलअ थोघै बाझ़ी मुल्है ज़ोरा-ज़ोरी तेऊए सारी ज़ैदात बरैबाद करना लै, एतरअ हई बी आसा सह मुल्है तिहअ ई भरोस्सैमंद।”
राख्सै बोलअ बिधाता लै इहअ, “ज़ेभै तैणीं मणछे आपणीं घेरी दी खास्सी दाह निं होए, तेभै तैणीं हेरा सह ज़िरी, पर ज़िऊंदै रहणा लै सका सह किछ़ बी करी। तेऊए देही दी हाड-मास्सा दी ला भाल़ै दाह, तेखअ भाल़ै तूह तेऊ दैणअ तेरै नाओंआं लै बी फिटक!”
बिधाता बोलअ राख्सा लै इहअ, “च़ल्ल ठीक आ, ज़िहअ तूह च़ाहा तिहअ कर, पर हेरे मारी निं तेऊ आथी।” तेखअ लागअ राख्स बिधाता सेटा का हांढदअ अर आयूबे सारी घेरी काढै तेऊ मुंडा उंधै घुंढी तैणीं बडै-बडै झोशा लांदै दुखणैं।
आयूबा लागी सारी घेरी खरोक्खणी सह बेठअ छ़ारे रूल़ी प्रैंदै, संघा लागअ फुटै दै गाडल़ूए ठिक्करै करै घेरी खरोक्कदअ। तेऊए लाल़ी लागी तेऊ लै इहअ बोल्दी, “तूह अज़ी बी बिधाता दी करा भरोस्सअ? अज़ी ताह दसल्ली निं हुई? पोर्ही मर बिधाता लै फिटक दैणा लै संघा लाग मरदअ।”
आयूबै बोलअ तैहा लै इहअ, “तूह केही ऐडै ज़ेही गल्ल करा! बिधाता ज़ेभै हाम्हां लै भलाई करा, तेता लै हआ हाम्हैं राज्ज़ी! ज़ै बिधाता हाम्हां लै आफ़त पाई, तेता किल्है निं हाम्हैं मंदै?” एतरी आफ़त पल़ी बी निं आयूबै बिधाता लै बूरअ बोली किछ़ै पाप किअ।
आयूबे चअन साथी आऐ तेऊ झेठू
आयूबे चअन साथी तेमान नगरी एलीपज, शूही ज़ैगा का बिल्दाद अर नमाती नगरी का सोपर। ज़ांऊं तिन्नां सेटा कुंणी खोज़अ कि आयूब आसा खास्सअ बमार, तिंयां आऐ तेऊ सेटा झेठू। आयूबे घअरा नेल़ पुजदी हेरअ दूरा ई का तिन्नैं आयूब भाल़ी पर तिंयां निं तेऊ बछ़ैणीं सकै! ज़ांऊं नेल़ पुजी राम्बल़ै करै सह बछ़ैणअ, तिन्नैं लाई हिक्की-सल़िक्की लेरा अर तिन्नैं धैल़ै तेऊ दुखै आपणीं घेरीए झिकल़ै बी अर धरना का शोट्टअ उझै तिन्नैं माट्टअ-गट्टअ आपणैं मुंडा प्रैंदै।
तिंयां रहै साता धैल़ी साता राची तैणीं तिधी आयूबा सेटा बेशी, पर तिन्नैं निं तेऊ संघै किछ़ै गल्ला किई, किल्हैकि तिन्नैं सोठअ इहअ कि अह निं ऐबै ऐहा दाह का बिज़री ठीक हणैं आल़अ आथी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.