Kulvi Outer Seraji Bible
आयूब 16
आयूबै दैनअ एलीपजा लै ज़बाब
तेखअ दैनअ आयूबै इहअ ज़बाब,
इना एही गल्ला आअ हुंह शुणदी,
ज़ेही झेठ तम्हैं किई, तेता करै उझ़िआ होर बी झोशा।
तम्हैं इना नथोघी गल्ला केभै मुक्कणैं करी?
तम्हैं किज़ू गल्ला पिछ़ू आसा इहै भुल़्हखदै लागै दै?
ज़ै हुंह थारी ज़ैगा हंदअ अर
थारी हालत मुंह ज़ेही हंदी,
तै सका त हुंबी तम्हां लै इना ई गल्ला बोली
अर एही गल्लो सका त मुंह तम्हां लै हर्हल फरेऊई।
पर हुंह निं तम्हां ज़िहअ आथी,
मुंह दैणअ त तम्हां लै राम्बल़ी सलाह खोज़ी हैअ,
मुंह करनी ती थारी एही झेठ ज़िहअ करै थारअ दुख घटदअ।
पर मुल्है निं ऐबै मेरै बोल़णैं करै
किछ़ै मज़त च़ाल्ली भेटी अर
नां मेरै च़ुप्पी रहणैं करै मेरी दाह दी राम च़ाल्लअ भेटी।
परमेशरै निं मुंह दी तराण ई डाहै,
तेऊ किअ मेरअ घअर-टबर पठी बरैबाद।
तेऊ किअ हुंह कैद ज़िहअ कि हुंह आसा तेरअ दुशमण,
हुंह शुक्कअ-मुक्कअ पठी अर
मेरी घेरीए बोजा आसा ऐहा गल्ले शाजत।
परमेशर डाहा मुल्है ज़ीद, तेऊए रोश्शै धेल़अ-च़िरअ हुंह पठी,
सह भाल़ा मुंह बाखा दांद कटिल्ली अर लाल-पिंऊंल़ी आछी करी।
लोग लागै मुल्है हास्सदै अर सुहांगा करदै,
तिंयां झाल़्हिआ मुंह फेर संघा बाहा मेरै थोथरै तमाच़ै।
परमेशरै शोट्टअ हुंह पापी मणछा जैंदरी,
तेऊ डाहअ हुंह कदुष्ट मणछे बशै पाई।
मेरै ती सोभी गल्ले मौज़
हुंह त राज्ज़ी-मौज़ी ज़िऊंदअ लागअ द,
पर परमेशरै ढाकअ हुंह कैल़ै का,
संघा किऐ मेरै धरनीं झेची करै ठोर-ठोर।
धरना का खल़अ बी झ़ैऊअ तेऊ एता लै कि सह
फेरा-फेर कतीरै बाही मुल्है नशाणअ लाई सके!
तेऊए कतीरा करै हुअ हुंह छिझ-बरिझअ,
धरनीं लागी लोधल़े छेरा!
पर तज़ी बी निं तेऊ मुल्है झींण फिरी!
सह रहअ जोधै ज़िहअ भिई-भिई मुंह च़िक्कदअ लागी।
दुखी हई डाहै मंऐं आपणीं घेरी च़िथल़ै बान्हीं,
संघा रहअ हारी करै इधी धूल़ै-माट्टै जैंदरी बेशी।
लेरी-लेरी हुअ मेरअ मुंह बी लाल,
मेरी शुंआंईं आछी अर आछी फेर पल़ी काल़ी हेर।
एतरअ हई बी निं मंऐं किज़ै उपद्रभ किअ,
परमेशरा सेटा मेरी अरज़ आसा शुची।
“हे धरती, ज़ुंण मुल्है बूरअ हुअ, तेता निं च़ोरी डाही!
नसाफ मांगणा लै ज़ुंण मंऐं लेर-पकार पाई
सह निं लोल़ी च़ुप्पी हुई।
मेरअ आसा अज़ी बी स्वर्गै एक शाजत,
ज़ुंण मुंह बच़ाऊंणै आल़अ बकील आसा।
मेरै साथी-संघी हेरअ हुंह शोटी डाही,
पर हुंह पाआ परमेशरा सेटा आशूए छ़ो-छ़न्द।
हुंह च़ाहा इहअ मणछ कि मुंह बाखा मेरअ बकील परमेशरा सेटा मेरी गल्ला एही करे,
ज़िहअ कुंण आपणैं साथीए तैणीं अरज़ करा।
किल्हैकि मेरी रही ऐबै थोल़ी ज़ेही अमर,
तेखअ लागणअ हुंह तैहा बाता हांढदअ ज़ेता का कोहै फिरी निं एछदअ।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.