हबकूक

हबकूक

बिधातो गूर हबकूक

भेत

लिखणैं आल़अ: हबकूक

सन: 612 का 605 ईसा आजी

ऐहा कताबे पैहलै दूई धैअ खोज़ा हबकूक अर बिधाते हुई दी गल्‍ले बारै। हबकूक खोज़ा बिधाता का खरी कि यहूदा मुल्खै आसा ज़ुल्म अर पाप भर्हुअ द। बिधाता दैआ ज़बाब कि तेऊ लाऐ बाबेल देशे सैना यहूदा मुल्खा लै सज़ा दैंदी छ़ाडी। तेखअ खोज़ा हबकूक एही खरी कि अह हणीं बेनसाफी किल्हैकि बाबेल देशे लोग तै यहूदा मुल्खे परज़ा का होर बी खास्सै पाप अर ज़ुल्म करनै आल़ै! तेखअ खोज़ा बिधाता कि बाबेल देशा बी लागणीं सज़ा भुगतणी।

हबकूक सोठा त इहअ कि परमेशरै ज़ुंण आप्पू लै आसा छ़ांटै दै, तिन्‍नां निं सह तिन्‍नें दुशमणे हाथै कष्ट भुगतणै दैंदअ। पर परमेशर दैआ तेऊ लै ज़बाब संघा करा तेऊओ विश्वास पाक्‍कअ। ऐहा कताबो मकसद आसा इहअ कि मणछे फाज़त करनै आल़अ आसा बिधाता अर ज़ुंण बिधाते आसरै रहे, तिन्‍नां डाहा बिधाता बच़ाऊई:

“कदुष्ट मणछ हणैं खतम, पर धर्मीं मणछ रहणैं तिन्‍नें विश्वासा करै ज़िऊंदै।”

(2:4)

कताबे बांड

हबकूके बिधाता सेटा खरी 1:1—2:20

हबकूके बिधाता सेटा अरज़ 3:1-19