Ti-tô 3

1Cóq ca-tớih nha-án cam-máng a-lứng peh máh ti-cuôi puô nha ti-cuôi sút, cóq sŏ́ng ính táq cứp ar-náq ŏ, 2êq u saq ti-cuôi can-nŏ́h, ma cóq át ar-toi, bôn mít khun, a-lứng cóq bôn nhéq mít can-nính lam-bŏt ada cứp náq ti-cuôi. 3Co top he te nsuôi mu chứng la máh ti-cuôi a-chơ a-lứng lớiq peh, cam-máng níc par-nai ngai tar-thu a-lứng táq sol dyôn cứp nốh he ính mu chứng dŏq táq ar-náq saq, táq pôq tớq callong luaih a-lứng tar-uan, i-ôiq ca-míq, nha a-ính tar-tuôq. 4Ma ndóng callong iên ŏ a-lứng mít sruiq na Yang Arbang Pilŏ́ng, Choi Ta-mống top he, dŏq a-páh, 5iki Án choi top he, ma tới co te ar-náq he táq te ti-nớng tu-pứng ndon top he khoiq táq, ma co callong srui-táq te Án, vít a-rau práh te car-nian liêh a-lứng cơt tám me loi co nhơ Yang Ar-vai, 6la Án ndon Yang Arbang Pilŏ́ng khoiq dyôn clưi cliai tớq top he dŏq Choi Ta-mống top he la Yang Choi Ta-mống Yê-su, 7dŏq cơt ti-nớng ŏ co nhơ callong choi mát te Án, top he cơt máh ti-cuôi chúng tưi máh mun a-rớq callong ng-cong lư ar-lớih te callong tu-mống díh sút pang. 8Par-nai ndô la piaiq lư dŏq ki-nứm, a-lứng cư ính mái chom níc máh callong ndô, táq dyôn máh ti-cuôi khoiq tin Yang Arbang Pilŏ́ng dŏq me dyôn car-siat te callong mŏp cháq táq ar-náq ŏ. Máh ar-náq ngki la ŏ a-lứng tar-náp ada a-ưi ti-cuôi. 9Ma cóq viar máh par-nai ngai tar-miên nốh a-chơ, te chớiq ngai ta-ran te a-chúc a-chiac, te ar-náq tar-luaih a-lứng lớiq piaiq te phep rit co nha-án tar-miên te callong ndô a-lứng lớiq bôn tar-náp a-mớh. 10Cóq dyŏq ti-cuôi mmo te top i-nha ính par-yáh vít mu chư lớiq la bar chư cóq dyŏq ti-cuôi ngki, 11co chom dyơ ti-cuôi a-rớq ngki cóc véc a-lứng táq luaih, la co án táq tíq cháq án bôm.

12Ndóng cư yua A-tê-ma lớiq la Ti-cha-cơ tớq nga mái, cư ính mái tớq nga cư tớq vel Ni-cô-bô-li, co cư ính át ti-ngôi nhéq ki-sái ng-ngiat tớq vel ngki. 13Cóq mái dông án ndon tar-tông par-nai Sê-na a-lứng A-blô pôq ada car-siat, crơng a-mớh nha-án ớq bôn mái choi crơng ngki. 14Máh em ai tớq top tin top he mu chứng cóq rian ca-tóng táq níc ar-náq ŏ dŏq têq bôn tớc khám cha, dŏq lớiq bôn cơt ti-cuôi ớq tar-náp.

15Nhéq máh ti-cuôi át a-lứng cư cơiq par-nai a-lang mái. Cóq mái car-bánh car-suanh máh ti-cuôi ndon a-moih top he tớq callong tin. Seq callong choi mat át a-lứng cứp náq i-nha.