A-páh Baih 15

1Dyơ cư hôm mui tíc pưt a-lứng si-leh can-nŏ́h tớq pilŏ́ng: tu-pul náq tar-neng chón dông tu-pul a-ái ar-cúh, máh callong talloiq tháng, co callong ính táq na Yang Arbang Pilŏ́ng khoiq táq nhéq tớq nha-án.

2Cư lư hôm bớr a-mớh ngki a-rớq dơq ving ca-vang na tallớng bôn car-chúc a-lứng uih. Máh ti-cuôi chíl rap ta-niêng pan-nán ngki, ta-niêng mol rup án, a-lứng ta-niêng sôq na nốh án, chón ta-yứng tớq dơq ving ca-vang tallớng, kéu tallư na Yang Arbang Pilŏ́ng. 3Nha-án cứh alhoiq cứh na Môi-se, ti-cuôi táq ar-náq na Yang Arbang Pilŏ́ng, a-lứng alhoiq cứh na Cưu A-cái, idô:

“Yang Ơi Yang Arbang Pilŏ́ng, Án Sút Pưt,

máh ar-náq Án pưt lư a-lứng si-leh.

Ơi Puô na máh cứp pang,

ngê Án ti-nớng tu-pứng a-lứng crái piaiq.

4Yang Ơi, nnáu lớiq sáng a-dáh

a-lứng lư lớiq cứh ayô nốh Án?

Co nưm mu náq Án práh ŏ.

Co nhéq máh cứp cruông lư tớq

a-lứng sang tám chứng mát Án,

co máh ar-náq ti-nớng tu-pứng na Án khoiq bôn a-páh.”

5Vít máh ar-náq ngki, cư me, dúng sang na prới car-hŏt tớq pilŏ́ng khoiq dŏq pốh. 6Tu-pul náq tar-neng kéu tu-pul a-ái ar-cúh ngốh te dúng sang, tớc tám pớc na prới práh ŏ, tar-laq, a-lứng dŏq ca-tớn khán na dyeng pa-niar a-pơm. 7Dyơ mui te puan lám pan-nán dyôn ada tu-pul náq tar-neng tu-pul ti-ngan na dyeng pớnh máng callong ính táq na Yang Arbang Pilŏ́ng, Án tu-mống ti-ngôi díh sút pang, nic-níc. 8Dúng sang tuc-chúc cu-nhiêq co ang ưr na Yang Arbang Pilŏ́ng a-lứng co chức sút Án, ớq nnáu têq mot nga dúng sang ti-ngôi ndóng tu-pul a-ái ar-cúh na tu-pul náq tar-neng bôn táq nhéq.